Helgin í myndum

Eins og ég hef áður sagt.

Safnað í sarpinn!

Byrjum á byrjuninni!

Við urðum að kaupa þetta sökum Family Guy!

Við urðum að smakka þetta sökum Family Guy!

Loft... í dós! Sætt loft... í dollu? Borðaðu 1 svona á dag (helst ekki samt) og eftir að þú lætur vaða yfir móðuna miklu mun skrokkurinn haldast í fullkomnu ástandi næstu 3000 ár á eftir.

Slóð tortímingar og eyðileggingar...

...og efra vinstra horni myndarinnar hér að ofan hvílir siiiiiig...

...ójöah!

Nammiskál sem búið er að fleyta súkkulaðinamminu af. Ég er súkkulaðisek. Ókei. Þessi skál er ekki alveg minn tebolli en allt er nammi í harðindum gott fólk!!

Hmm hmm, harðindum!?!

Höldum áfram.

Þessum var svo stútað síðar sama kvöld að auki við, jebb, að ómynduðu auki við bragðaref, 100 tonn af hnetum og súkkulaðikökufudge með pistasíum sem var gómsætara en þetta gómsæta þarna um árið!

Sukk á sukk ofan á sukkinu sem var sukkað á!

Mikið sukk!

Svo var haldið af miðbæ brott og upp í sveit þar sem beið eitt stykki hótelherbergi á Rangá. Það var notalegt. Virkilega ljúft. Æðislegt hótel, alger friður, út í miðju algleymi.

Þessi sveitarúntur er einvörðungu Ernunni minni að þakka -

Þessi tók á móti gestum í anddyrinu! Hann var hress.

(Er sumsé að tala um manninn þarna vinstramegin á myndinni. Svoleiðis reitti af sér brandarana.)

Þar sem sukkdagurinn var haldinn töluvert hátíðlegri en þurfa þykir slátraði undirrituð þessu líka fína kjúllasalati! Ekkert til að gráta úr sér augun yfir af hamingju en vel útilátið og mikið af grænmeti!

Euan fékk sér slumburger og að sjálfsögðu gott fólk. Að sjálfsögðu rændi ég bita... um! Bitum.

Og frönskum.

Næstum öllum frönskunum en hver er að telja?

Og það má að sjálfsögðu ekki gleyma, þó svo ég hafi verið voða þæg með kjúllasalat í ferðatöskunni þetta kvöldið, að nokkrum súkkulaðirúsínum, Picnic og *hóst* ís *hóst* var sporðrennt.

ÓKEI.. höldum áfram. Sjáið hvað það er fallegt veður.

APP-EL-S-ÍN

*egomaniac*

Svo skulum við ekkert ræða morgunverðarhlaðborðið!

Ég elska.... ég eeeelska morgunverðarhótelmegahlaðborð jafn mikið og ég elska barnaafmæli og farmingar/útskriftarveislur!

Þar finnur maður allskonar... af allskonar! Öööölsk!

En sökum áðurnefnds ofursukks og smásukks degi og dögum áður, var þetta morgunmaturinn minn!

Getið margfaldað þennan disk með 3!

Hann var... ofur!!

Öðruvísi slóð eyðileggingar!

Skruppum svo til Eyja í leiðinni og upplifðum Landeyjahöfn!

Gleði að geta í raun "skroppið" til Eyja. Magnað.

Hann er ekki sannfærður... yfir hverju er enn óljóst!

Ahhh... góð, sveitt helgi.

Borðaði þó líka duglega og hollt og æðislegt eins og skyr og hnetur og milljón grænmeti og allt sem er eðall.

Ákvað bara að taka til svínaríið því það er svo miiiikið skemmtilegra!

Eins og sumir, sem horfa á formúlu 1, og vonast eftir árekstrum.

• A: "Hvernig var keppnin?"
• B: "Æjjiii, ekkert aksjón. Enginn sem klessti á dekkin eða neitt."

Þannig að græðgi, upp á sitt besta, í formi áts = aksjón!

Best að koma sér í gírinn fyrir næstu tvo mánuði. Húhhh!

Ég ætla aldrei að borða aftur

Sagði hún og stakk upp í sig eplabita!

Fimmtudagur til sunnudags. Hvað get ég sagt. Eitt, allsherjar fyllerí hvað mat og matartengdar gersemar varðar.

Fimmtudagur:

Ég og Erna fórum ofurhressar á sjóræningabíó. Sú var tíðin, strumparnir mínir, að 1000 krónukallar dugðu fyrir bíóferð og eilitlu bíó-áti.

Við skulum minnast þessa með 1 mínútu þögn!

*þögn* fyrir utan smá smjatt á súkkulaðibita

Nú þarf að versla sér gleraugu og innan nokkurra ára, þá þarf líklegast að klæða sig upp í galla svo hægt sé að taka þátt í bíómyndinni sjálfri.

Það mun kosta ykkur frumburðinn.

Þar sem ég er átvagl af guðs náð þá dugði ekkert minna en M&M og Dumble. Erna er poppskaffarinn!

Takk fyrir og amen.

Föstudagur:

• 6 sneiðar af 12" pizzu með rjómaosti, beikon og pepperóní...já.. næstum heil pizza og já, þetta pizzucomó er eðall!
• 1 lítill bragðarefur með Snickers, kökudeigi og oreos
• nammi fyrir Álbrand og ömmu hans

Laugardagur:

Nokkuð þæg frameftir degi. Tók Húsafells- og Reykholtsrúnt.

Að auki við grassetu og almennt afslappelsi endurnýjaði ég kynni mín við löngu gleymdan tilgang lífsins.

RISATRAMPÓLÍNIÐ

Bara Átvaglið og börnin!!

Þvílík hamingja!

Endaði svo í grilluðu lambi hjá móður og föður sem var guðdómur í hryggformi.

En var það nóg? ÓNEI!!!

• Datt inn á bbq kjúklingapizzu og kanilbrauðstangir hjá Dominos seinna um kvöldið
• 5 tonn af hnetum og rúsínum

Sunnudagur:

Vaknaði með hugann allan við meinlætalifnað, vatnsdrykku og hjólarúnta EN:

• 3 ískúlur sökum óviðráðanlegs ofurveðurs og ofurveðrum skal ætíð fagna með ís!!
• Kaffihúsahafrakaka
• Eplakökusneið með rjóma
• Franskar handa 23 sjómönnum
• Súkkulaðimuffins

Ahhhh!

Ég get því ekki sagt að helgin hafi verið slæm. Onei. Hún var góð. Kannski aðeins of góð ef það er þá hægt.

Tók eldhresst Tabata í hádeginu í dag, strunsaði heim með hugann við hjólatúr en beilaði á því sökum spennings við að klára þessa mynd:

Sit því núna, menningalegri en ofviti andskotans, á Café París. Sötra kaffi og te í bland, tek alvarlegar "þungt hugsi" störur út í tómið með 12 mínútna millibili, segi "mmmyyeees", fnasa, dæsi, teikna og endurtek hringinn á nýjan leik eftir vel ígrundaða skyggingu á teikningunni minni.

Maður verður að lifa sig inn í kaffihúsahlutverkið mín kæru. Láta eins og áhyggjur alheimsins liggi einvörðungu á manns eigins herðum og Guðbrandur bíði eftir því að þú finnir lausnina við hungursneið og volæði!

Ég ætlaði að segja 42 en það er víst frátekið.

*sööööötr*

Spaghettijól 2010

Jólin komu og þau fóru.

Með stæl.

Góðmundur og allir hans félagar léku lausum hala og áttu mikið meira en bara sjö dagana sæla. Eins og mamma orðaði það þegar undirrituð mætti í Gúmmulaðihöllina á aðfangadag.

"Guð minn góður, þarna kemur dökkhærða beinagrindin frá Hrauninu og étur okkur út á gaddinn!!"

Ég var kölluð Skeletor það sem eftir lifði kvölds.

Velmegunarbelgurinn stendur svo langt út frá miðjunni að stafurinn "Þ" ætti að skammast sín og taka "D" sér til fyrirmyndar. Tærnar sjást ekki þegar litið er niður á þær, fyrir utan þá óumflýjanlegu staðreynd að ég lít niður á tær bara almennt - ljótbífur með meiru, og þar sem einusinni gætu mögulega hafa talist verið útlínur á skrokknum eru óskilgreind mörk ítroðslu og geypileg góðæris ummerki. 2007 ofát án landamæra.

Stóðst ég jólaprófið í ár?

Já... svo um munar. Nokkurra daga áti var pakkað saman í eina kvöldstund og afganga daginn eftir.

Annar í áti sló ekki slöku við og var síður er svo eftirbátur sykurvímu og rjómasturtu aðfangadags. Vélindað fylltist rétt fyrir klukkan 21:00 á aðfangadag og ég þurfti að halla höfðinu aftur til þess að geta:

1. Andað
2. Borðað meira
3. Stundað annan í áti

Ég er ógeð.

Þriðji í áti var nokkuð slakari en forverar hans tveir, slakari í þeim skilningi að ekki var étið frá morgni til kvölds... meira bara... kvölds! Ef til er græðgisblætisguð í þessum heimi þá mun ég eflaust heimsækja hann í nokkrar vikur eftir að ég hverf yfir móðuna miklu.

Gott fólk, yfir helgina náði undirrituð að slurka í sig um það bil kílói af graut. Rúmlega. Geri aðrir betur. Ég og Rísó eigum að sjálfsögðu í leynilegu ástarsamandi, matarpervismi af hæstu sort. Einkennist af troðslu, þar til grjón eru uppurin, og eftirsjá þegar umrædd stund rennur upp.

Kærið mig!

Jólin eru þó alltaf yndisleg með meiru. Við höfðum það ljúft, gott og allt sem talist getur uppáhalds í þessum heimi. Mikið sem við erum heppin að geta átt, og leyft okkur, daga sem þessa í faðmi fjölskyldu og vina.

Látum myndirnar tala. Velmegunabumban var/er of hræðileg til að ég fari að sporta þeirri náhvítu synd framan í alþjóð. Ég vil helst ekki að þið missið matarlystina mín kæru. Þið verðið bara að trúa mér.

Yfir og út, þar til annað kemur í ljós.

Æði "hressar" jólasystur.

Grautarhermennirnir mínir! Ég át heila skál... ein... og óstudd!

Tók 2,5 daga í gjörninginn.

Jólalax með heimagerðri ofursósu.

Fjórir diskar og já, ég ét mig yfirleitt alltaf sadda af forrétt!

Sadda sjáið til... ekki pakksadda! Restin af kvöldinu fer í það.

HAHH!!

Þetta er nákvæmlega eins og atirðið úr Christmas Vacation - þegar kalkúnninn er skorinn!

Og já... ekki hafa áhyggjur gott fólk.

Afi fékk blessað jólarassgatið á öndinni! Ef aumingjans öndin hefði nú bara vitað hvað beið hennar.

Greyið!

Myndin hér að neðan er bönnuð innan 18!

Þið getið svo margfaldað neðangreindan skammt með 3,5.

Munið mín kæru, ég lýg aldrei til um magn af mat sem ofan í gapholið hverfur!

Margfalda þennan með 3,5 mínus kartöflur á 1 disk.

Millimál.

Í öll mál... helst.

Áthvíld og pakkaupprífelsi.

Kósíheit.

Kjaft, spjall, raus, mas, hlátur, meiri pakkar.

Gúmfey sokkar - ómissandi á jólunum!

Eins og með jólaöndina, ef það eru ekki sokkar þá eru ekki jól... óhh... dramtíkin!

Grautarstundin runnin upp mín kæru!

Óheilögrjómasletta með grjónum!

GUÐ MINN GÓÐUR

Fallegt ungrú... jólafallegt!

Jebb.

Eigum við að fara út í stærðfræðina hérna?

Marföldun í hæsta gæðaflokki.

Neðangreint * 7.

Og það var bara aðfangadagsátið, annar- og þriðji ekki með taldir!

Smá slökun áður en herskarinn mætir!

Átþreyta og kjötsviti upp á sitt besta!

Loks mætti rest af Speghettiliðinu í Höllina. Húsið var bókstaflega morandi í fólki!

Sæta fína Guðrún Hrefnan mín.

Sæta og fína Helgan mín.

Jólasnær með jólagleraugun

 

Annar í afgangs-áti.

Og nei, átið átti sér ekki stað í þeirri röð sem myndirnar gefa til kynna.

Þið megið vita það, ójá, að grauturinn er alltaf það fyrsta sem inn um varirnar fer annan í áti! Helst þrjár skálar.

Þar á eftir kemur laxinn og öndin en gröðguð í eftirrétt.

Þannig rúllar Spaghettilýðurinn!

Þriðji... í áti!

Frómasían og rækjukokteillinn hennar ömmu er ómissandi 26. át.

Jebb.

Sinnum 3.

Hérna gat ég hinsvegar ekki meir. 

Ketið fékk átvaglsfrí.

En ástæðan var einfaldlega...

...ójeah!

Eftirréttarsítrónufrómasía!!

Ég vil heyra ykkur segja FJÓRIR!

"FJÓRIIIIIIR"

Ofátsgræðgismúrinn hefur hérmeð verið felldur, sprengdur og grafinn! Tvöfalt. Þrefalt... Margfalt.

Svona nú... allar syndir og ósyndir upp taldar í máli og myndum.

Pheew *anda inn*-*anda út*

Vona að þið hafið ekki sofnað á leiðinni!

Svo er ekki nema korter í 2011. Vissuð þið þetta?

Jáhérnahéri og allir hans fylgdarmenn.

Súkkulaði biscotti með espresso, valhnetum og hvítum súkkulaðibitum

Enn eru tveir dagar í jólin og, trúið því eða ekki, fleiri ofur sykurbombuuppskriftir bíða birtingar síðan í fyrra.

Ég segi samt ekki meir. Held ég sé dáin og farin til himna!

2009 - ó hvað ég elska þig!

Súkkulaði biscotti með espresso, valhnetum og hvítum súkkulaðibitum

2 bollar hveiti

1/2 bolli kakóduft, ósætað

1 - 2 msk espresso duft eða instant kaffi. Malað.

3/4 tsk matarsódi

1/2 tsk lyftiduft

1 tsk salt

6 msk smjör, 85 gr. uþb

1 bolli sykur

2 stór egg, hrærð léttilega

1 tsk vanilludropar

1 bolli - valhnetur, gróft saxaðar og hvítir súkkulaðibitar

113 gr. dökkt, gott súkkulaði

Kanilsykur til að strá yfir

Aðferð:

1. Hita ofn í 175 gráður.

2. Sigta saman þurrefni - allt nema sykur.

3. Hræra saman smjöri og sykri á meðalhraða, þangað til ljóst að lit. Um það bil 2 mínútur. Bæta þá eggjunum út í og halda áfram að hræra, 2 mínútur.

4. Lækka hraðann og bæta þurrefnunum samanvið í þremur skömmtum, þangað til rétt blandað og deig er farið að taka á sig mynd. Blanda hnetum og súkkulaði samanvið.

5. Skipta deiginu upp í 2 stóra bita, eða 3... eða 4... fer eftir því hversu stórt biscotti þú vilt fá. Ég skipti því í 4 og fékk minni kökur. Fletja aðeins út svo myndist hálfgerður ferhyrningu. Deigið er mjög meðfærilegt. Ágætt að vinna þetta á smjörpappírnum sem þeir koma til með að bakast á.

6.  Setja inn í ofn í 15 - 25 mínútur. Fer eftir stærð. Mínir voru inn í 20 mín. Passa að hafa þá ekki of stutt, annars krumslast þeir í sundur þegar reynt er að skera í þá. Leyfa að kólna í 10 - 20 mín.

7. Skera í 1 - 1,5 cm þykkar sneiðar, leggja á hliðina og inn í ofn aftur í 8 - 10 mínútur.

8. Taka út úr ofni, leifa að kólna smá og loks færa yfir á grind til að kæla alveg.

9. Borða með kaffi, kaffi... kaffi og meira kaffi... deyja svo hamingjusamur... hmm?

Vonandi þó eftir allmörg hamingjurík og krúttaraleg ár.

Það má líka borða þetta með kakó eða mjólk, ég leyfi það.

Viðburðarríkur dagur

Dagurinn í myndum.

Byrjaði sakleysislega.

Svo gerðist þetta.

Undirbúningur fyrir piparkökuhúsagerð!

Ásamt kökum og öðrum kræsingum.

Smá smakk frá mér.

Svo ákvað ég að taka smá rækt á þetta. Chiaskyr eftir atið.

Ohhh hef ekki fengið mér chiaskyr í langan, langan tíma!

Þvílík hamingja.

Chiaskyr og kanill með vanillu torani = grjónagrautur.

Chiaskyr varð að veruleika í dag af því að Svava mín kær sendi á mig chiafræ, mér til óbilandi ánægju og hamingjugleði! Eeeelsku besta mín, takk aftur fyrir.

Svo gerðist þetta!

Barnaafmæli!

Óguð!

Einn af mínum 8 akkilesarhælum.

Fullkominn vettvangur ofgræðgisáts og annarrar syndsamlegrar matarpervirsku.

Svo gerðist þetta!!!

Fannar... ég á núna eldhúsborð!

Preis ðe lord.

Súkkulaði Mokka súperkökurnar litu dagsins ljós í kvöld!

Jebb, þær eru jafn góðar og þær líta út fyrir að vera.

Ásamt... já, tvöfalt já og amen með flöde!

Gott fólk!

Uppáhalds, uppáhalds smákökurnar mínar! Einföldustu hafrakökur sem þið finnið.

Algert! Uppáhald!

Hélt ég hefði týnt uppskrifitinni en nei, fann'ana! Þær eru svo frábærar að þær fá sitt eigið uppskriftablogg á næstu dögum. Uppáhalds kökurnar mínar og pabba. Alltaf fyrstar til að hverfa.

Sykur, vanilla, smjör og hafrar! Þetta kombó klikkar bara ekki.

Súkk-mokka kökurnar fá líka sér blogg. Þær eru svaðalegar.

Það sem stendur þvi uppúr jólabakstri 2010 eru einföldu ofurhafrakökurnar, súkk-mokka, biscotti og hafrakökurnar frá því í gær.

Ahhh!

Núna ætla ég að súkkulaðihúða þessar karamellur og fara svo að sofa.

Jólin eru eftir 4 daga!

Hólí-hell... nei... ég meina... Holí jólí!

Djefulli hlakka ég óstjórnlega mikið til!

Bakstri lokið...

...að minnsta kosti fyrir daginn í dag.

Súkkulaði-Mokka deig hinkrar inn í ísskáp ásamt óskorinni karamellu.

Eggjalausu-hafrakökurnar - nema með heslihnetum og súkkulaðibitum.

Æðislegar, kryddaðar hafrakökur með rúslum og muldum hnetum. Mjööög seigar og djúsí og skemmtilegar að bíta í. Geri þessar pottþétt aftur.

Engiferkökur, kryddkökur, með hvítum súkkulaðibitum. Mjúkar í miðjuna með stökka skel. Kannski smá þurrar, en koma á óvart. Ekki mínar uppáhalds í þessu holli samt sem áður.

Biscotti með möndlum og hvítum-/dökkum súkkulaðibitum.

Einfaldar hafrakúlur eru á dagskrá í næstu viku. Þær eru uppáhalds.

Ahh hvað það er gott að setjast niður.

Húsið ilmar eins og bakarí.

Held ég hafi borðað þyngd mína í deigi - mylsnu - kökum í dag.

*átvaglshimnaríki*

Mjúkar saltkringlur

Mikið assgoti hef ég staðið mig vel í 2009 bakstrinum í fyrra.

Smá brauðgerð til að vinna upp á móti sykursjokki síðustu daga. Þið verðið ekki fyrir vonbrigðum með þessar. Treystið mér bara.

Ætla að útbúa þessar snúllur aftur í næstu vikur. 

Mjúkar saltkringlur

• 1,5 bollar volgt vatn
• 1 msk sykur
• 2 tsk salt
• 1 og 1/4 tsk þurrger
• 4,5 bollar hveiti
• 57 gr. ósaltað bráðið smjer
• Olía
• 15 bollar vatn
• 1 bolli matarsódi
• 1 stórt egg
• sjávarsalt

Aðferð:

1. Hræra saman vatni, sykri, salti og geri í skál. Láta sitja í 5 mínútur. Ætti að myndast froða. Froða er góð.

2. Blanda þá samanvið bráðnu smöri og hveiti. Ef þú ert með hrærivél, nota deigkróg og láta hræra þangað til deigið losnar frá hliðum skálarinnar. Annars bara hnoða.

3. Færa deigið í olíuborna skál, snúa klumpnum við svo hann húðist allur olíu. Breiða klút yfir skálina og leyfa deiginu að hefast í klukkustund.

4. Skipta deiginu í 8 - 16 hluta. Fer eftir því hversu margar kringlur þú vilt. Getur líka útbúið stangir. Rúlla deiginu í pulsur og gera svona!

5. Nú þarf að sjóða kringlurnar. Gerir þær mjúkar og gefur þeim fallega brúnan lit. Láta vatn og matarsóda sjóða. Færa 1 - 2 kringlur í pottinn. Eftir 30 sek, snúa kringlunni við og láta sjóða 30 sek í viðbót. Fjarlægja úr potti, þetta aðeins og koma fyrir á bökunarpappír. Endurtaka með rest. Ef kringlurnar detta í sundur í vatninu, taka þær uppúr eftir að suðu er lokið og púsla þeim aftur saman á bökunarpappírnum.

6. Pensla með eggjablöndu (egg og vatn) og strá með salti.

7. 225°C heitur ofn í 14 mínútur og voila! Saltkringlur til að vinna á móti öllum sykrinum! Færa þær strax á grind til að kæla og guð minn almáttugur... afsakið guðlastið.

Þessar kringlur eru geggjaðar!

Karamellu- og kanilpopp með pecanhnetum

Hef gert þetta margoft síðan síðustu jól með allskonar tilfæringum, breytingum og kryddútúrsnúningum. Hnoða poppið í bolta, búa til popp-sleikjó, húða með súkkulaðikaramellu, nota sem millilag í köku, bæta Nóakroppi út í, eplaköku-kanilpopp...

Þetta bregst ekki!

Gott fólk, má ég kynna eitt af mínu uppáhalds heimabruggaða ofurnammiátsgleðioghamingju! 

Karamellu-pecan kanilpopp 

• 12 bollar poppað poppkorn. Uþb 1/2 bolli baunir.
• 1 bolli gróflega saxaðar pecanhnetur
• 1 bolli púðursykur
• 1 tsk kanill
• 1/4 bolli sýróp eða hunang
• 113 gr. smjör
• 1/2 tsk matarsódi
• 1 tsk vanilludropar
• Smá sjávarsalt (Því salt og karamella... óbeiibeh)
• Hvítt súkkulaði

Aðferð:


1. Hita ofn í 120 °C og leggja bökunarpappír yfir t.d. eldhúsborðið! (Fer kannski eftir skammtastærð, ég bjó til popp fyrir heila þjóð)

2. Setja popp og pecanhnetur í stóra skál eða geyma í stórum potti. Ég hef þetta allt í pottinum sem ég poppa poppkornið í. Hann þarf að vera mjög stór.

Það er að sjálfsögðu hægt að kaupa tilbúið popp. Herre gud... bara svo gaman að heimapoppa!

3. Hræra saman púðursykri og kanil, í miðlungs stórri skál. En þó stærri skál en þú heldur. Ójá! Ekki vanmeta heita karamellu.

Skerið svo smjörið í litla bita og setjið yfir sykurinn og loks sýróp eða hunang yfir smjerið.

Sjááið'etta!!! Ohhhhhh smjöööör!

• Góði Guðmundur. Gefðu mér einn dag þar sem ég get étið smjör, sykur, ís, rjóma og súkkulaði einvörðungu, án stopps og án viðbjóðsseddutilfinningar, án þess að fá hjartaáfall og stútfullar æðar af almennri óhamingju!

Hmm... það er eins gott að við fáum ekki uppfyllta eina ósk frá æðri máttargíröffum yfir ævina. Þá á ég ekkert inni þegar ég stend fyrir framan ljónið í Afríku á komandi misserum.

• Ella: Óguð Óguð Óguð Ó-Góði Guðmundur...
• Guðmundur... ekki svo góði: NA-HAAAHAAA.... bíddu bíddu bíddu. Manstu um árið. Smjörið.. manstu. Hahh.. súkkulaði... jáá vina mín. Soner'etta. Sjáumst eftir smá!

4. Henda inn í örbylgju í 30 sek., taka út og hræra saman. Henda aftur inn í örbylgju í 2 mínútur, taka út og hræra aftur. Aftur, örbylgja, 2 mínútur - líka gott að fylgjast bara með því. Eftir þennan tíma ætti karamellan að vera byrjuð að bubbla mjög mikið. Ef hún bubblar ekki er hægt að setja hana smá inn í örbylgjuna aftur en passa verður að elda hana ekki of mikið. Annars harðnar hún og breytist í risakaramelluklump.

Sem er svosum allt í lagi. Ekki græt ég það.

En ekki það sem við leitumst eftir hér.

Hún ætti að líta um það bil svona út.

5. Fjarlægja úr örbylgjuofni og hræra vanillu og matarsóda samanvið. Blandan blubblar mjög mikið upp við þetta. Hræra vel, hræra fljótt - karamellan stífnar nokkuð hratt við þetta samspil ofurefna.

6. Hella karamellu yfir popp og pecanhnetur og hræra vel þangað til allt gums er karamelluhúðað.

Stilltu þig... ekki klára poppið!

7. Dreifa á bökunarplötu, útataða í bökunarpappír, og inn í ofn í 30 mín. Hræra í á 10 mín fresti. Eftir 30 mín tékka á poppinu til að sjá hvort það sé nógu hart. Ef ekki, baka í 5 mín aukalega. Annars taka út, salta smá, og reyna að éta ekki allt í einu.

Reyna.

Í alvöru, það er mjög, mjög erfitt að reyna að reyna ekki.

Mjög erfitt.

Bræða svo hvítt súkkulaði og dreifa yfir gleðina! Ójá, ég sagði það!

Bræða... hvítt... súkkulaði yfir herlegheitin. *yfirlið*

Þetta er eitt besta, og einfaldasta, ofurnammi sem ég hef smakkað... skulum ekki tala um karamellusprengjurnar út á ís.

Tilvalið í jólapakkann. Einfalt. Hægt að útbúa í tonnavís!

Usss!!!! Svei þér kerling!

Daim hnetukaramella

Síðan í fyrra. Jú... mikið sem gleymdist í ógleymanlegum skilningi.

Ég held ég þurfi ekkert að segja neitt um þetta. Myndin gott fólk... myndi segir allt sem segja þarf.

Óguð!

Daim hnetukaramella 

1 bolli sykur

1/2 bolli ljóst sýróp

1/4 tsk salt

1/4 bolli vatn

2 msk smjör

1 bolli hnetur

1 tsk matarsódi

 

Aðferð:

1. Setja bökunarpappír í bökunarform/glerfat, ferhyrnt/kringlótt/hjartalaga, og leggja til hliðar.

2. Í stórum potti, yfir meðalhita, sjóða sykur, sýróp, salt og vatn þangað til sykurinn er uppleystur.

3. Hræra hnetunum út í og halda áfram að sjóða þangað til hiti á hitamæli nær 300 °F eða 150°C. Ég held ég hafi verið yfir pottinum í rúmar 40 mín. Þori samt ekki að segja alveg til um það. Líka hægt að athuga hvort gleðin sé til með því að hella smá karamelludropa í mjög kalt vatn. Ef hann skilur sig strax í harða þræði þá er þetta tilbúið.

4. Taka af hita, hræra smjöri/smjörlíki strax samanvið svo og matarsóda, og hella í ílátið með bökunarpappírnum. Hér er svo hægt að strá súkkulaðibitum yfir og dreifa úr þeim þegar þeir bráðna. Þarf ekki.

Pff.. þarf ekki.

Það gerir krumsið samt einstaklega ofurgott. Þið vitið það. Ekki reyna að neita því.

Kæla svo aðeins við stofuhita og koma fallega fyrir inn í ísskáp. Taka svo út úr ísskáp (neiii Elín, í alvöru?) og brjóta í bita.

Þið vitið hvað þið gerið næst. Mmhmmm!

Snjóboltar - kókosboltar

Meira 2009 konfekt. Eitthvað sem ég hef verið að búa til frá því ég var púpa. Ég á það til að detta í kókosgírinn og kókos getur verið svo ljúffengislega góður. Þessir boltar eru æði. Karamelló, stökkir utaná og mjúkir að innan!

Það heyrist "kram knús krús" þegar þú bítur í þá = mjöög hár átvagls- og áferðaperrastuðull.

Ef þú borðar Bounty... þá borðar þú þessar krúttusprengjur svo sannarlega líka.

Snjóboltar

• 1 dl kókos
• 1 dl sykur
• 1 dl hveiti
• 1 eggjahvíta
• Súkkulaði að eigin vali. Til að húða (þarf ekki)

Eiiinfaalt

Aðferð:

1. Setja allt saman í skál og hræra vel. Deigið verður mjög klístrað.

2. Móta litlar kúlur úr deiginu. Stærð efti skapi og nennu - muna þá að aðlaga bökunartímann. Rúmlega tíkallastærð = fullkomlega krispí og mjúkir og karamella og hamingja og regnbogar og hvolpar!!!

Alls ekki hlutdræg... þið ráðið auðvitað stærðinni mín kæru.

Tíkallastærð!! En þú veist... þið ráðið!

*regnbogar*

Ráðið alveg sjálf.

Raða kúlum á bökunarpappír.

 

3. Setja inn í 175° heitan ofn í 4 - 6 mínútur eða þangað til botninn er rétt gylltur. Taka út úr ofni og kæla.

4. Bræða súkkulaði og velta boltunum upp úr því.

5. Borða, njóta, brosa og að sjálfsögðu... regnbogar.