Hugmyndir að "hollari" eftirréttum

Svona af því að helgin er hinumegin við hæðina. Nokkrar hugmyndir að "hollari" útfærslum af góðgæti, millimáli, bita, áti...

...og já, ég rændi einstaka myndum/hugmyndum af netinu

Jógúrt með hunangi

Eins einfalt og það hljómar. Jógúrt með smá hunangi og jafnvel berjum/hnetum/krumsi og hamingju.

Banana ís - þetta er í miklu uppáhaldi hjá mér.

Skera banana niður í sneiðar, setja í ílát/poka, frysta, mauka! Til að gera þennan ofur þá væri hægt að setja út í blenderinn/matvinnsluvélina dökkar súkkulaðispænir og jafnvel smá mjólk. Bera fram strax - bara gott og alveg eins og ís. Treystið mér!

Banana frostpinnar

Skera banana niður í bita nú eða í tvennt. Pota priki upp í rassinn á aumingjans bönununum. Krakkar elska svona. Svo bara leika!

Velta hverjum banana upp úr dökku bræddu súkkulaði og dýfa ofan í hnetumulning/kókos/múslí. Líka hægt að velta þessum gulu hamingjusprengjum upp úr hunangi og svo hnetukrumsi.

Inn í frysti og japla á með bros á vör!

Bláber með bananasósu

Bláber í skál! Check!

Banani, smá ricotta ostur, létt ab-mjólk, sítrónusafi, hunang - blanda. Check!

Hella yfir bláberin og jafnvel toppa með súkkulaðispænum! Double check!

Grillaðir ávextir

Einfalt, fljótlegt, gott. Grilla t.d. banana/ananas/perur/epli/mango - ekki of mikið þroskað. Strá með kókos, jafnvel borða með hunangs jógúrti!

Eftirrétta panini/burrito

Tvær sneiðar af heilhveiti brauði nú eða heilhveiti tortillur, smyrja með smá náttúrulegu hnetusmjöri/sultu, jafnvel raða með jarðaberjum eða banana og kremja í grilli. Voila. Dreypa ogguponsu hunangi yfir brauðið eða t.d. flórsykri til að vera fensí.

Tortilla - náttúrulegt hnetusmjör - smá sykurlaus sulta - banani - vefja - BURRITO!

Jarðaberja og appelsínumix með pistasíum og ricotta

Ohhh... svo gott. Hræra saman t.d. 2 msk rauðvínsediki, 1 msk hunangi setja til hliðar. Skera niður jarðaber og setja í skál ásamt hnetum og niðurskornum appelsínum. (skera úr þeim kjarnann og reyna að sleppa öllu hvítu) Hella edikblöndunni yfir ávextina, hræra létt, setja á disk (reyna að sleppa vökva) og mylja ricotta ost yfir.. nú eða jafnvel geitaost. Ef þú vilt lifa hættulega geturðu saltað/piprað dýrðina smá - annars bara súkkulaðispænir eða kókos

Ofnbökuð epli

Annaðhvort hollari týpu af eplaköku eða taka eplin sjálf og baka þau. Af því ég öölska heit, krumsuð epli.

Skera innan úr þeim kjarnann og fylla svo holuna með einhverju gúmmulaði. Blöndu af hnetum/þurrkuðum ávöxtum/kanil/hunangi sem dæmi. Setja í eldfast mót, setja smá vatn í mótið og inn í 180° heitan ofn í 25 - 30 mínútur. Jafnvel setja ogguponsulitla smjörklípu ofan í hverja holu.

Svo væri líka hægt að kreysta safa úr appelsínu eða nota hreinlega appelsínusafa, hella yfir eplin áður en þau eru bökuð. Myndast ágætis "sýróp" sem hægt er að nýta nú eða.. úr því ég er byrjuð, búa til smá sýróp á pönnu fyrst. Appelsínusafi, hunang, kanill, negull, kardimommur - hita þangað til þykkt og hella yfir eplin og inn í ofn! Mmmmm....

...sagði einhver ís? Banana ís?

Frosin vínber

Inn í frysti og út eftir nóttina! Æðislegt að japla á svoleiðis á kvöldin nú eða barasta þegar maður liggur út á palli í góðu veðri með bumbuna upp í loftið! Bumba út í loftið -> mjög mikilvægt atriði í sólbaði! 

Svo væri eflaust hægt að útbúa allskonar sheika eða búðinga/mousse úr tofu og fleiri gleðilegheitum. Þetta er svona það sem mér datt í hug án þess að þurfa að hugsa mikið (já, ég er löt í dag) - einfalt, fljótlegt. Er líka með nokkrar hugmyndir af ágætis nartkostum þar sem uppskriftirnar mínar fela sig. Súkkulaðikökur, muffins ofl. 

Þið kannski hjálpið mér við að finna eitthvað fínt til að bæta við þennan lista? Hvað er ykkar uppáhalds? 

Hollustukaka sem ekki þarf að baka

Bjó til ofurheilsu-afmælisköku fyrir mömmu. Fann uppskrift um daginn sem ég Ell-aði svolítið upp. Hrákaka full af döðlum og gleðilegheitum. Mamman er eins og ég, döðluæta. Uppskriftina er hægt að dúlla sér með eftir hentisemi. Bæta í hana fleiri/færri hnetum, þurrkuðum/ferskum ávöxtum, múslí - í raun hverju sem er.

Döðlu- og banana súkkulaðikaka með valhnetum og kókos

500 gr. döðlur. Ég notaði 300. gr. þurrkaðar og 200. gr ferskar.

2 mjög vel þroskaðir bananar

1 tappi vanilludropar. Má sleppa.

3 msk. kakó. Meira ef vill.

1 bolli hafrar. Mætti mylja hafrana í matvinnsluvél.

70. gr kókosolía

100 gr. muldar valhnetur

50 gr. dökkir súkkulaðibitar. Má sleppa ef vill.

Hræra döðlur saman í matvinnsluvél þangað til nokkuð vel blandaðar. Bæta þá bönununum við. Rest af hráefnum bætt út í nema valhnetum og súkkulaðibitum. Ef það er ekki til matvinnsluvél á heimilinu þá er flott að hita döðlurnar í t.d. örbylgju, merja þær og blanda svo bönununum við. Hella blöndunni í skál og bæta út í hana valhnetum og 30 gr. súkkulaðibitum. Hella blöndunni í mót og inn í ísskáp í amk 2 tíma.

Ég blandaði svo smá olíu, hunangi og salti saman við möndluflögur og ristaði í ofni. Möndlurnar setti ég yfir kökuna og stráði rest af súkkulaðibitum og kókos yfir þær.

Þetta var æði. Virkilega góð og skemmtileg að borða. Væri flott að setja hana í frystinn rétt áður en hún er borin fram því blandan verður aldrei eins og "kaka". Meira eins og þykkur búðingur. Til að gera kökuna "kökulegri" væri t.d. hægt að setja meira af höfrum og jafnvel nota bara þurrkaðar döðlur. En mér fannst hún æði nákvæmlega eins og hún var. Fór með hana í ömmuveislu um helgina og komst að því að ís og þessi kaka eiga afskaplega vel saman (má ekki vera of hollt á nammidögum )  Mmmmm... þessa geri ég pottþétt aftur!

'Hollari' súkkulaðikaka

Heilhveiti, hunang, kakóduft. Það er alveg hægt að fá sér nokkrar sneiðar af þessari án þess að fá sorry-álfinn í heimsókn. Hún kom líka á óvart. Hún kom svo sannarlega á óvart þessi!

Heilusamlegri súkkulaðikaka

Hita ofn í 175 gráður.

1 bolli létt AB-mjólk eða ósætað eplamauk. Ég notaði AB.

3 msk hunang eða agave.

1 tsk vanilludropar

3/4 bolli heilhveiti

4 msk kakóduft

2 tsk lyftiduft

1/2 tsk matarsódi

1/2 tsk salt

1/4 bolli muldar möndlur eða t.d. valhnetur

1 msk mulið súkkulaði (mætti setja upp í 1/4 bolla ef vill. Ég notaði dökkt, 75%.)

Aðferð:

Hræra saman Ab-mjólk, hunangi og vanilludropum í stórri skál. Blanda saman við AB-mjólkurblönduna hveiti, kakódufti, lyftidufti, matarsóda, salti, hentum og súkkulaði. Passa að ofhræra ekki. Hella í bökunarform, ég notaði 20 * 20 cm álbakka, og baka í 20 - 30 mínútur, eða þangað til prjóni, sem stungið er í kökuna miðja, kemur út svo til hreinn.

Niðurstaða:

VÁ! Ég var sko ekki að búast við þessari útkomu! Ég á eiginlega ekki orð.. vá! Mjúúúk, létt í sér en samt djúúsí eins og brownie! Mjög sterkt kakóbragð af henni ef ykkur þykir svoleiðis gott. Palli kjammsaði og spurði hversu mikið af súkkulaði ég hefði bætt út í þetta.. jah, 1 msk! Þið verðið að prófa, þessi kaka er æðisleg! Bragðast mjög óhollt en er full með flóknum kolvetnum og trefjum, andoxunarefnum (hoho.. 75% súkkulaðið) smá próteini og hollu fitunni sem allir þurfa í skrokkinn!

Hvað myndi ég gera öðruvísi næst?

Ég held ekki neitt. Kannski nota valhnetur í staðinn fyrir möndlur. Það væri æði! Ég er samt enn að furða mig á þessum æðislegheitum. Ofboðslega er þetta gott!

Verður eitthvað næsta skipti?

Hahh... hefði vel getað sleppt þessari spurningu. Uppáhaldslistinn minn hefur eignast nýjan vin!

Glútenlausar súkkulaði muffins

Hér kemur þá uppskriftin af muffins kökunum sem ég bjó til í fyrradag! Versogú!

Sigga Hrönn leyfði mér að heyra um daginn hvernig hennar útgáfa af Hafra og möndlukökunum hefði tekist. Alltaf svo gaman að fá innsýn í það hvernig fólk gerir uppskriftir að sínum eigin eftir smag og behag. Þannig lærir maður mest og prófar sig áfram. Hún tiltekur í kommentinu sínu að hún noti hirsi þar sem það er minna glúten í því en höfrum. Þá varð ég svolítið forvitin og ákvað að skella í glútenfríar muffins. Að sjálfsögðu lagðist ég í net-víking og fann nokkrar sniðugar uppskriftir og gúllaði loks saman í þessa.

Glútenlausar súkkulaði muffins - 12 litlar muffins

Hita ofn í 180 gráður.

1/4 bolli mjög fínt malað kókosmjöl

1/4 bolli kakóduft

1/4 tsk salt

1/2 tsk matarsódi

3 egg

1/4 bolli olía

1/4 bolli hunang eða t.d. agave. Ég notaði hunang.

6 ferskar, stappaðar döðlur. Mætti líka sleppa döðlum og bæta öðrum skammti af hunangi í staðinn eða öðrum sætara.

1 tappi vanilludropar

Aðferð:

1. Í skál, blanda saman kókosmjöli, kakódufti, salti og matarsóda.

2. Í annarri skál, blanda saman eggjum, olíu, hunangi, döðlum og vanilludropum.

3. Blanda þurrefnum saman við 'blautefni' og blanda mjög vel. Blandan er mjög þunn.

4. Setja í bökunarform. Ég setti bréfform ofan í álformin.

5. Baka í 20 - 22 mínútur. Ég var með mínar inn í 20 mínútur.

6. Kæla og njóóta. Má líka spisa heitar.

Niðurstaða:

Æææðislegar. Fluffy, mjúkar og kókosbragðið kemur skemmtilega fram í hverjum bita. Mikið súkkulaðibragð, en ekki svo að það yfirgnæfi og eigni sér muffinsið! Það heyrist líka muffins hljóð þegar bitið er í þær. Ohh, gaman þegar vel tekst til. Vinnufólkið mitt andaði þeim líka að sér sem segir mér að þær hafi verið góðar

Hvað myndi ég gera öðruvísi næst?

Bæta kannski ofan á þær súkkulaðibitum, jafnvel einhverju krumsi út í deigið. En það er líklegt að það leki niður á botn þar sem deigið er mjög þunnt. Annars þyrfti ekki að fiffa þær neitt til. Held það væri nóg að setja eitthvað gott "krem" ofan á þær.

Verður eitthvað næsta skipti?

Það verður næsta skipti. Það held ég nú! Sjáið þið bara myndina hér að neðan... gætu þær verið flottari?

Kókoskúlur

Held áfram að útrýma hráefnunum sem ég á í nammiskápnum. Það er barasta að ganga nokkuð vel! Kúlur, hnettir og boltar af ýmsum toga hafa orðið til úr því sem eftir var, allt assgoti vel heppnað verð ég að segja.

Kókoskúlur

150 gr. döðlur og 150 gr. gráfíkjur. Rétt rúmlega bolli. Ég notaði þurrkað.

30 gr. þurrkaðar bananasneiðar. Tilraun síðan í gær - má sleppa.

1/2 bolli möndluflögur

2 msk möndlusmjör. Notaði heimagert rúsínu og kanil.

1/2 - 1 bolli kókos. Ég notaði 1/2.

3 - 5 msk kakó. Ég notaði 3.

1 tsk vanilludropar

1 tsk kanill

1 - 3 msk hunang. Ég notaði 2 msk.

Byrjaði á því að hita döðlur og gráfíkjur aðeins í örbylgju, því ég geymdi þær í ísskáppnum, svo í matvinnsluvél og matvinnsluvélaði smátt. Bætti þá rest af hráefnum út í, nema hunangi. Bætti hunangi við í restina eða þangað til áferðin á blöndunni var orðin flott að mínu mati, og hægt var að rúlla í kúlur. Döðlurnar og fíkjurnar gera þó sitt gagn. Það gæti farið svo að engu hunangi þurfi að bæta við, sérstaklega ef döðlurnar eru ferskar.

Hér væri líka hægt að bæta einhverjum góðum líkjör við eða rommi. Úha! Jæja, kúla massann og velta svo upp úr kókos, kakó, flórsykri, engu ... og voila!

El subbó!

Væri líka sniðugt að nota litla ísskeið til að skúbba í kúlur.

Ef þú vilt meira súkkulaðibragð, bæta við 1 - 2 msk., aukalega, af kakódufti. Ég eelska bragðið af döðlum og fíkjum og vildi ekki týna því. Að nota 3 msk. af kakódufti gefur gott súkkulaðibragð en ekki nógu mikið til að yfirgnæfa bragðið af þurrkuðu ávöxtunum. Mmhmmm! Þessi uppskrift þolir líka, mjög vel, meira af kókos. Ef þú ert kókosæta, þá er um að gera að kókosa þetta upp þangað til þú segir stopp.

Heimagerðar kókoskúlur fyrir utan allt samviskubit! Ég er ekki að segja að maður eigi að raða þessum elskum ofan í sig bara af því að þær eru hollari en Snickersbiti. En ef nammiguðinn er alveg að gera þig geðveika(n), þá er þetta mjög samviskulaust snarl. Ein kúla er nóg til að fullnægja sykurþörf vikunnar. Mjög sætar, yndislega bragðgóðar, þéttar í sér og gaman að bíta í.

Banana og döðlu flatbrauð með möndlum og sítrónuberki

Púslaði saman hálfgerðu flatbrauði/sætabrauði í tilraunaskyni um daginn. Ætlaði alltaf að krafsa niður það sem ég gerði en af einhverju dularfullum ástæðum gleymdi ég þessu aftast í hnakkanum á mér. Gumsið kom samt svo skemmtilega vel út að ég ákvað loks að henda uppskriftinni hingað inn! Æhj, þetta er svosum engin uppskrift per se, bara raða hráefnunum á deig og henda inn í ofn. Engu að síður... þá er þetta það sem átti sér stað þennan örlagaríka sunnudag! (Hafa dramatíkina í lagi)

Fletja t.d. pizzadeig út eins þunnt og kostur er á. Væri örugglega líka hægt að nota tortilla köku. Pensla með 1 tsk olíu og þar á eftir sultu. Ég notaði sykurlausa sultu með blönduðum skógarberjum. Þarnæst raðaði ég bananasneiðum og niðurskornum ferskum döðlum á deigflötinn. Eftir það raspaði ég sítrónubörk yfir bananann og döðlurnar og stráði pínkulítið af sjávarsalti og möndlum þar yfir. Þarnæst setti ég rjómaost í bitum yfir herlegheitin og stráði loks pínkupons af mozzarella yfir gumsið í heild sinni. Þessu skellti ég svo inn í 175 gráðu heitan ofn þangað til osturinn varð fallega gylltur. Ég hafði þetta þó aðeins lengur inn í ofni en svo. Bakan varð þar af leiðandi stekkri en hún hefði annars orðið - mjög gott.

Það sem gerir þetta gums svona frábært, í minni bók, er sítrónubörkuinn! Hann er stjarnan í þessu annars ágæta púsluspili! Geggjað að bíta í stökkt brauð, mjúkan sætan banana, karamellizeraða döðlu, pínku salt og fá svo ferska bragðið með sítrónunni! Bara geggjað! Væri eflaust frábært að raða á þetta örlítið af hráskinku, eða beikoni, og ólívum.

Gaman að þessu. Ég er að sjálfsögðu, eins og þið eflaust vitið, mikill sykurgrís - allt sem er sætt fíla ég í botn. Þar af leiðandi er þetta gums, þó ómerkilegt sé, góðumegin við línuna hjá mér 

Heilhveiti og hafra möndlukökur

Fann svo eðal fína uppskrift á netinu einn daginn að ég prentaði hana út. Full af flóknum kolvetnum, trefjum, prótein og hollri fitu. Fullkomið í morgunmatinn og/eða með kaffinu! Búin að hlakka mikið til að prófa og lét loks verða af því. Fylgdi henni 110%, eitthvað sem ég geri yfirleitt aldrei. Hefði nú betur pimpað hana svolítið upp a la Ella. En hún á sér enn von!

Heilhveiti og hafra möndlukökur

Hita ofn í 170 gráður.

1/2 bolli hafrar. Ég notaði grófa hafra.

2/3 bolli möndlumjöl. Ég muldi möndlur í matvinnsluvélinni.

1/2 bolli hveitikím.

1/2 bolli heilhveiti.

3 msk hunang og 3 msk möndlusmjör. Notaði heimagert kanil- og rúsínumöndlusmjör.

1 tsk. matarsódi

2 hrærð egg.

Í stórri skál hræra saman hafra, möndlumjöl, hveitikím og heilhveiti. Setja til hliðar. Hita hunang og möndlusmjör í örbylgju, þangað til létt bubblar, og hræra létt saman. Hella matarsódanum strax saman við hunangsblönduna. Blandan byrjar strax að lyftast og verður létt og froðukennd þegar matarsódinn er hrærður saman við. Hella hunangsblöndunni út í hafrablönduna og hræra létt. Þá hella eggjunum út í þangað til klístrað deig myndast.

Móta litlar kúlur úr deiginu, ég bleytti á mér hendurnar í nokkur skipti til að rúlla kúlurnar út, raða á bökunarpappír.

Inn í ofn í tæpar 10 mínútur eða þangað til rétt gylltar. Þessar voru inni aðeins of lengi.

Bíða svo með að borða á meðan myndataka á sér stað. Gott próf á hversu viljasterk(ur) þú ert!

Niðurstaða:

Það vantar í þær allt krydd - eru þar af leiðandi svo til "bragðlausar". Hunangið er þó nóg til að sæta, fyrir minn smekk. Þær mýkjast nokkuð upp við geymslu, eins og flestallar hafrakökur gera, og eru, þrátt fyrir kryddleysi, afskaplega mildar og bragðgóðar. Áferðin er virkilega skemmtileg. EN... það vantar þetta "Hmmm... góóðar kökur" element í þær!

Hvað myndi ég gera öðruvísi næst?

Þær skal kryddast. Vanilludropar, kanill, salt, múskat.. hvað sem hugurinn girnist. Jafnvel súkkulaðispænir og/eða þurrkaðir ávextir og hnetur ef þú ert í þannig skapi. Ég myndi líka, ef þú vilt t.d. bjóða gestum, dýfa botninum á þeim í bráðið súkkulaði. Væri geggjað!

Verður eitthvað næsta skipti?

Ég verð að prófa aftur með endurbætum!

Fíkjur, undursamlegar fíkjur

Þurrkaðar fíkjur eru æðislegar. Dísætar og karamellukenndar. Gaman að bíta í þær. Seigar að utan, mjúkar og djúsí að innan með pínkulitlum fræjum sem poppa þegar bitið er í þau! Fullkomnar sem sætusnarl, ef maður er t.d. í 'nammibindindi' og sykurpúkinn alveg að stúta sálartetrinu. Þessi kúlublanda var einróma samþykkt í vinnunni minni. Sem er gleðilegt fyrir mig og átvaglið hið innra.

Fíkju og fræboltar

1 bolli þurrkaðar fíkjur. Um það bil 170 gr.

1 bolli sólblómafræ

Niðurrifinn börkur af lítilli sítrónu

2 msk hörfræ. Má sleppa.

1/4 tsk salt

1 - 3 msk hunang og/eða agave sýróp

Viðbætur, ef vill, sem hægt er að bæta í deigið eða rúlla kúlunum uppúr: kanill, kakóduft, flórsykur, hnetumulningur, kókos....

Hella sólblómafræjunum í matvinnsluvél og mala þangað til nokkuð fínt. Þá bæta við fíkjunum og jú, hræra þangað til nokkuð fínt. Ef þú vilt gera matvinnsluvélinni greiða, þá er gott að skera þær í minni bita. Þegar fræ og fíkjur eru orðin að svo til fínu mjöli, bæta við sítrónuberki, salti, hörfræjum og 1 msk hunangi. Hræra vel saman. Ef hægt er að útbúa kúlur úr deiginu, á þessu stigi, þannig að þær haldist saman, þá má byrja að rúlla. Annars bæta við annarri msk hunangi og hræra aftur eða þangað til kúlurnar molna ekki sundur. Bæta núna 'viðbótum' við, ef vilji er fyrir hendi, annars rúlla upp úr kakódufti, kanil ofr.

Hafið þið ekki smakkað samskonar fíkjukex og sést á myndinni hér fyrir neðan?

Ef svo er, þá eru þessar kúlur svo til eins og gumsið sem er inn í kexinu hvað áferð varðar. Bragðið er æði. Sítrónubörkurinn gefur skemmtilegt "Hmm.. hvað er þetta?" í hvern bita og frískar mjög upp á sætar fíkjurnar! Karamelluboltar með meiru og hunangið lætur aðeins vita af sér. Dúllið sem liggur svo utan á kúlunum gefur þeim mismunandi líf, kanill og súkkulaði eru í uppáhaldi hjá mér. Svo eru þær að sjálfsögðu á holla listanum, sem er alltaf jákvætt. Mikið gott.. mikið gaman!

Heilsusamlegt "nammi"

Ég var að spá í að taka mig til og prófa að búa mér til nokkrar uppskriftir af "trufflum" eða nammikúlum í hollari kanntinum. Einfaldlega af því að ég á tonn af fræjum, hnetum og gumsi og það er einfalt og skemmtilegt að útbúa svona nammi. Ekkert fár. Yfirleitt fer allt hráefni í blender, það blandað til bana og húðað (eða ekki) með einhverju sniðugu. Svo er líka svo gaman að borða svona bitastórt nammi!

Hafra- og ávaxtakúlur

1/2 bolli hafrar

1/3 bolli graskersfræ

1/3 bolli hnetur. Ég notaði möndlur. Átti ekkert annað.

1 msk rúsínur

1/3 bolli þurrkaðir ávextir. Ég notaði ferskjur og kirsuber.

1 msk mulin hörfræ

2 msk döðlu- og jarðaberjasulta. Eða hvaða sulta önnur sem þú átt og kýst frekar.

Mylja hafra þangað til fínir. Ég muldi mína í matvinnsluvél. Bæta þá við hnetum og graskersfræjum og mylja aftur þangað til nokkuð fínt, mega vera stórir bitar hér og þar. Bæta þá við rúsínum, þurrkuðum ávöxtum og hörfræjum. Blanda aftur en í þetta skipti má blandan vera grófari - þangað til allir stórir bitar af þurrkuðum ávöxtum eru svo til horfnir. Stærstu mættu vera á stærð við grjón. Þá er ekkert annað eftir en að bæta við sultunni. Blandan er tilbúin þegar hún fer að festast við veggi matvinnsluvélarinnar. Þá er deigið, ef deig má kalla, mótað í litlar kúlur og stungið inn í ísskáp.

Skemmtilegt á bragðið. Sætt og súrt á sama tíma með hnetukeim og skondnu kikki frá graskersfræjunum. Held ég myndi prófa t.d. sólblómafræ næst og jafnvel einhverja sniðuga hnetublöndu.

Áferðin er flott. Deigkenndar, ef það er til, þéttar. Eins og litlar karamellur. Mjúkar, með fræ- og hnetubitum inn á milli. Alls ekki þurrar. Það væri jafnvel hægt að móta botn úr þessu deigi nú eða "granola" stykki. Ekki hafa áhyggjur þó þær líti út eins litlar kjötbollur - þær leyna á sér.

Ekkert sem er ekki 'æskilegt' við þessar elskur. Sykurlausar, fullar af flóknum kolvetnum, trefjum, hollum fitum og próteinum. Fullkomið snakk milli mála, í morgunmat, með kaffinu nú eða bara til að bíta í þegar snarl-andinn kallar!

Súkkulaðibitakökur

Jújú. Helgarnammistuð í gangi - 75% súkkulaðibitar notaðir í kökurnar í staðinn fyrir döðlur eða þurrkaða ávexti. Ómæ... en gott, ómæ!

Súkkulaðibitakökur - 8 stórar kökur

Stilla ofn á 200 gráður.

Þurrefni:

1/2 boli heilhveiti

1/2 bolli hafrar, ég notaði grófa.

1/4 tsk matarsódi

dass salt

1/4 bolli súkkulaðibitar

1/4 bolli hnetur eða þurrkaðir ávextir eða meira súkkulaði

Blautefni:

2,5 kúfaðar msk hnetusmjör. Ég notaði 1 msk aðkeypt og 1,5 heimagert möndlusmjör.

1 msk olía

1/2 dl hunang

2,5 msk Undanrenna

1 tsk vanilludropar

Hræra þurrt saman í stórri skál og setja til hliðar. Blanda blautu saman í annarri skál og hella yfir þurrefni og blanda vel. Móta kúlur úr deiginu og þrýsta vel á þær, því kökurnar koma ekki til með að leka mikið út sjálfar í ofninum. Ég hafði mínar t.d. aðeins of þykkar því deigið er nokkuð klístrað. Ætla að nota blauta skeið næst þegar ég geir þetta og hafa þær næfurþunnar.

Inn í ofn í um það bil 7 mínútur, eða þangað til fallega gylltar.

Nohhhm!

Best að borða þær heitar með mjólkurglasi! Mhmmm... æðislegt að mylja þær yfir graut á morgnana, út í skyr/jógúrt, með banana-ís...

...nú eða bara narta þegar nartarinn lætur í sér heyra!

Niðurstaða:

Æðislegar. Mjög bragðgóðar. Stökkar að utan, mjúkar að innan - meiriháttar áferð. Kannski svolítið þurrar en ekkert til að æpa yfir. Til að gera þær allar stekkri er spurning hvort notaður sé 1 dl sykur í staðinn fyrir 1/2 dl hunang?

Hvað myndi ég gera öðruvísi næst?

Gera kökurnar þynnri og stærri og baka aðeins skemur. Nota valhnetur eða pecanhnetur í staðinn fyrir möndlur og jafnvel nota létt AB-mjólk í staðinn fyrir mjólk og/eða meira af olíu til að reyna að gera þær meira "djúsí"? Allar ábendingar, úrbætur, viðbætur vel þegnar að sjálfsögðu

Verður eitthvað næsta skipti?

Ójá...