Dramatísk endurkynni og brómberjahafrahamingja

BÚÚAHHH... HAHH... brá þér?

Fyrsti grautur síðan 25.05.2011 takk fyrir sælir góðan daginn Illugi og amma hans...

...sem var frekar óhress með uppátækið og bölsótaði ungu kynslóðinni fyrir óæskilegan hárvöxt og ömurlegan tónlistasmekk.

Sem kom grautnum hinsvegar ekki rassgat við!

TADAAA

Hello beautiful!

Þessi skál var ofur. Og innihald hennar ofur í öðru veldi sinnum pí. Skálin var hjúmöngus. Valin með einbeittum brotavilja, enda rúmmál þess sem kvikindið innhét... hjúmöngus.

Innihélt verandi lykilorð.

Brotavilji morgunsins var jafn tær og stærðin á YOYO ísboxunum. Þar eru ekki til lítil box, onei. Þar er einvörðungu ein ríkisstærð af risaboxum sem eru sérstaklega hönnuð með græðgisátvögl í huga því það vita allir að græðgisátvögl kunna ekki að fylla... ekki... upp í allt boxið!

Góður ís engu að síður.

Magnað hafragrautarát gott fólk. Stórmagnað.

Þetta át var svo viðbjóðslega magnað að hvorki ég, né skítfúla amma Illuga, áttuðum okkur á því hvað átt hafði sér stað þegar allt í einu grautur hætti að streyma inn fyrir átvaglsins varir og ekkert heyrðist nema skríkjandi kling og bang í smáskeiðinni þegar hún ítrekaða small í botn, og hliðar, ofurskálarinnar sem nú var orðin tóm.

Jóseppur og Mörfía alls þess sem er mood killer í heiminum.

Þessi upplifun var svo mögnuð að hún var næstum jafn suddaleg og að vera staddur í miðri orgíu þar sem allir eru gullfallegir og æðislegir og viljugir og gjafmildir og þú ert fetishið þeirra...

...get ég ímyndað mér. Því ég veit svo mikið hvernig það er að vera fetish í gullfallegri orgíu.

En það hlýtur bara að vera nokkuð magnað.

Athugið samt að ég sagði næstum... næstum er ekki alveg eins og alveg eins, nei, það er næstum.

ÞETTA er hinsvegar meira en bara næstum. Þetta ER! Ohhhh sweet baby jesus.

• 1/2 bolli hafrar
• 1 msk chia fræ
• 1 msk husk
• Rúmur bolli frosin brómber 
• 1 eggjahvíta
• Skúbba hreint prótein
• Væn lúka möndlur
• Smá salt, vanilludropar, kanill, kaffi, múskat
• Vatn eftir smekk

Eigum við að tala um þykkildisofurhamingju borðað með hníf og gaffli og tuggið svo öll áferðarskilningarvit springa með tilheyrandi fnasi, stunum, rymji og smjatti í bland við óneitanlega dásamlegt bragð af kanil og múskatsparki í bland við dísæt ber og kaffiilm? Ha? Eigum við að ræða þetta eitthvað?

Nei... hélt ekki...

Það tók mig góðar 10 mínútur að klára kvikindið.

Ég brosti og grét, troddaði og brosti... og grét... svo hló ég... troddaði meira, grét smá meira... gleymdi að anda... brosti... mundi að anda... grét... allan tíman.

Þetta át var hvorki tignarlegt, fallegt, siðmenntað eða útpælt. Þetta var hreint og beint trodd.

Ahhhh, hafrar.

...

Hey! Svo útbjó ég þetta um daginn! Það innihélt m.a. banana og meiri karamellu!

MUAAAHAHAHAAAA......

...meira um það seinna.

Adéu!

Morgnarnir eru bestir

04:50

Bleik skál full með banana- og kanilgraut.

Fallega skreytt með afgangs salthnetumulning og bláberjum, sem yfir nóttina, breyttust í rúsínur. Fallega skreytt... en samt... svo grá! Greyið.

Hefði ég nú aulast til að skera út á þetta svo gott sem banana og smá eplakrums þá væru þessar myndir gullfalega fínar.

Buxur gott fólk, síðmorgunbuxur og sokkar í stíl við grautarskálina. Planað, ráðlagt og skipulagt.

Eða þannig.

Átvaglið mundi sumé eftir kuldakasti síðustu myndatöku og fyrirhyggjusemin drap næstum græðgispúkann í morgun. En bara næstum... því buxurnar voru á röngunni og vasarnir stóðu út í loftið eins og eyrun á Guffa.

En grauturinn var góður. Eins og alltaf yfirleitt.

Bananabiti extraordinaire skríður úr felum! Ekki svo viss um að honum hafi þótt það góð hugmynd 2 sek eftir að þessi mynd var tekin.

05:22 

Hjólað af stað í ræktarhýsi með aukahring og lúppu í ferhyrning.

Enganvegin umhugað um eigin öryggi, tók ég myndavélina og vídjóaði dásamlegheitin, á tvíhjólinu, í morgunsárið. Að stýra með einari, á hjóli, með myndavél, og tala við sjálfa sig í leiðinni án þess að taka kollhnís er... kannski... ekki... jafn stórkostlegt afrek og ég ætlaði mér að útlista.

Mmm... jebb.. gleymume'ssu!

Mikið, mikið.... miiikið sem ég elska að nýta morgnana í góðu veðri, kyrrð og blíðu.

Í miðjum hjólaklíðum hugsaði ég með mér af hverju í ósköpunum vindurinn næði að græta kvendið svona svakalega. Hvort hann væri viljandi að reyna að smokra sér bak við gleraugun til þess eins að vera með leiðindi.

Eftir 5 sekúndna vangaveltur, og vindbiturð, uppgötvaði ég þó, mér til mikillar aulahamingju, að glirnurnar hvíldu sig á höfðinu á mér. Húrra fyrir því.

10 stig, niðurávið, fyrir greindarvísitöluna og eggjaskurnleysið reyndar líka.

Eggjaskurn verandi ósýnilegi hjálmurinn sem situr á toppstykkinu!

En þrátt fyrir heimskulegheitin tel ég mig knúna til að segja ykkur frá þessu öllusaman... hví? Ég tók meira að segja mynd til sönnunar og gagns!

Hvaða hvati liggur hér að baki hef ég ekki hugmynd um en ég held ég skrái önnur 10 stig í kladdann hjá sjálfri mér fyrir vikið.

Niðurávið.

Sama útsýni og í fyrra, sami hringur. Með hið gullfallega, bláa, IKEA í baksýn.

Trúi ekki að það sé rétt svo tæplega ár síðan.

05:58

Handleggum formlega refsað.

Fyrir hvað munu þeir aldrei vita blessaðir.

07:00

Hleðsla gúffuð hratt og örugglega eftir æfingu.

 

Hjólið mundað og þeyst á hraða ljóssins í vinnustöðvar þar sem sturtan var tækluð og einum gríðarlega vel metnum kaffi sporðrennt í góðra félaga hópi.

07:30

Morgunklúbburinn.

Já, það eru greinilega allskonar klúbbar sem tilheyra ákveðnum tímum dags hér um slóðir og hádegissalatið bara í tveggja tíma fjarlægð.

*gleði*

Segið mér nú góða fólk, hvar kaupir maður sér almennilega eggjaskurn á höfuðið?

Inn með trefjar, út með sykur

Amk ákveðna tegund af sykri! 

Ég varð fyrir svolitlu áfalli í gær.

Sparki í rassinn, vitundarhugljómunarofursjokki.

Þetta er eitthvað sem ég vissi alveg. Eitthvað sem flestallir vita en hugsa kannski ekki svo mikið út í.

1 kókdós = 1 bjórdós

Fyrir utan vímuna

Og við gefum börnunum okkar kók!

Frúktósi, high fructose corn syrup. Eitur fyrir skrokkinn. Ég er seld. Búið að troða þessu í allan fjandann, afsakið orðbragðið. Brauð, gosdrykki, ávaxtasafa, barnamat (þurrmat)... barnamat gott fólk!!! Slekkur á leptíninu sem segir þér að þú sért saddur, sem þýðir að þú troddar óumflýjanlega meira þrátt fyrir að skrokkurinn sé löngu búinn að fá nóg. Jafn mikið eitur og alkóhól.

Sugar, the bitter truth fyrir þá sem hafa áhuga!

1, 2 og 3 mín kæru. Núna er tími til kominn að lesa vel á pakkningar, baka brauðin sín sjálfur og borða það sem móðir jörð hefur upp á að bjóða. Paleo matarræði, það sem hellisbúarnir settu ofan í sig. Grænmeti, ávextir, hnetur, kjöt. Trefjar og aftur trefjar. Lykilinn að góðri heilsu gott fólk.

Dramatík dagsins hérmeð lokið.

Þar sem undirrituð var svoleiðis uppfull af andlegri biturð og frúktósagremju, sá trefjaljósið margfalt, hélt dýrið uppá þessa vitrun með risaskál af iGraut skreyttum bláberjum, kanil og smávegis kaffisparki.

Góður dl. hafrar, 150 gr. eggjahvítur, 1/2 banani, vatn, örbylgja.

Kanill, kaffi, salt.

Bláber, ísskápur, einfalt, gott, skeranlegt, ákkúrat, fínt... og framvegis.

Myndataka fóru hálfpartinn út og á ská sökum morgunkulda. Græðgin var ívið sterk þegar augnlokin opnuðust, með smá ískri - það var frekar truflandi, og þegar andinn er slíkur eyðum við ekki 10 sek í að klæða okkur í almennilegar brækur.

Sokkarnir voru eina flíkin sem var í stíl við morgunkuldann.

Fór svo út að hjóla stundvíslega kl: 5:30. Tæklaði ræktina kl: 06:00, þar sem brjósti og baki var stútað, gúllaði Hleðslu á slaginu 06:58, beint upp á fákinn aftur og brunaði í vinnuna. 

Morgunkaffið yfirstaðið og núna er ég að súpa kanilte. Ahhhh!

Ég held ég þurfi, með sorg í hjarta, að endurskoða Torani neysluna gott fólk. Sykurlaust sýróp, það hlýtur að vera maðkur í mysunni...

...eða frúktósi.

Morgunsteypa

Tóm steypa.

Kannski ekki tóm.... og afskaplega bragðgóð. En næstum of mikið þykkildi fyrir þykkildisins smekk.

Sem gerist sjaldan.

Sagði samt næstum... næstum er næstum, það "er" ekki.

Afgangs skyr, 20 gr. hafrar, 1 tappi ómægod3 lýsi, Torani, 1 msk chia, vanilludropar og smá mjólk.

Sítrónusafi + sítrónubörkur.

Rúmlega tsk af hvoru þessara.

HRÆARA

Og ísskápa.

Daginn eftir!!

HOHOOOOO.... þykkildi Hansson. Svoddan grjót að ég þurfti að bæta út í gvömsið smá auka skyri, og að sjálfsögðu möndlum fyrir knús og kram.

Steypuþykkildi eður ei, ég kvarta núll og borða með bros á vör því gumsið var ekkert nema ofur.

Ef þið viljið þynna þykkildið - bæta bara við smá vatni eða mjólk eða soja eða hot sauce...

...hvað? Ég hef ekki hugmynd um hvað kveikir á morgunverðarbjöllunum þínum!

Út, ekki seinna en núna!

AfmælisSvava, frararskjótar, gæludýr

Byrjum á byrjuninni 

AFMÆLISSVAVA!!!!!

20 ára þetta litla dýr.... litla... dýr.

Til hamingju með daginn þinn snúður. Afmælisgrautur og Pavlova eru fyrirsjáanleg fyrirbæri í þinni nánustu framtíð.

Hressileg lyftingaræfing tekin í morgun.

Stálsnið fyrir æfingu (Steel Cut Oats). Líta svolítið út eins og gömul kotasæla... en góðir voru þeir maður! Hvíldu sig í ísskáp yfir nótt, með skyri og vanillu, og tóku vel á móti undirritaðri í morgun.

Kanillinn lét sjá sig eftir fyrstu 4 bitana. 

Hleðsla eftir æfingu. Eiginlega bara af því það er einfalt að grípa í kvikindið og skúmma með í töskunni.

Labbaði líka í hús sportsins í morgun... og í vinnuna... og hlakka mikið til að labba heim úr vinnu líka.

Heilbrigðin svoleiðis skín út um ras.....ið á manni.

Afsakið orðbragðið og allt það.

Gleðilegt.

Hringdi í afa minn blessaðan í gær og fékk, með góðfúslegu leyfi, að ræna hans sérlega tvíhjóla fararskjóta. Er hann ekki yndislega fínn að lána mér gripinn? Sækj'ann sumsé á eftir.

Jú... jú það held ég nú.. hú.

Ég er samt barnabarn gott og kem til með að skila dýrinu á góðviðrisdögum þegar gamlinn vaknar, eins og undirrituð um daginn, með ofvirkt hjólablæti á heilanum.

Nú hefst því hjólatíð gott fólk. Sjáum hvort Aspasinn verði abbó. Aspasinn sem er svo fararskjóti fyrir laumufarþega af áttfættlingasortinni. Alveg magnað. Ég hverf frá grænu þrumunni í 20 mínútur og þegar ég læt sjá mig þar aftur er þessi skvísa búin að útbúa sér heimili.... og byrjuð að éta.

Ekki svo ósvipað mér svona þegar ég hugsa um það!! Like!

Eins ömurlega óþolandi og mér þykja köngulær vera, þá kem ég til með að sætta mig við þetta gæludýr því hún var svo sæt að velja bílinn minn sem flet. Krúttið. Það er líka afsakpega vel metin rúða sem skýlir mér frá bölvítinu, því hún er nefnilega svo stór og hættuleg. Ég get þar af leiðandi fylgst með úr pínkulítilli fjarlægð þegar hún veiðir eitthvað sniðugt OG ég er búin að skýra hana.

Lúlú. Sjáum hvað hún tórir þarna lengi.

"OHM NOM NOM NOM"

Svo við höldum áfram að tala um fararskjóta, jah, og gæludýr, þá kynni ég til leiks hálfbróður minn, í 13 ættlið... á ská... Jöfur ofurtöffara.

Kannski ég fái hann frekar lánaðan en hjólið? Þyrfi samt að lita hann grænan til að friða samviskuna.

Ekki svo góð hugmynd geri ég ráð fyrir.

Flottir feðgar verð ég að segja. Svakalega fallegur hesturinn. Líður ekki að löngu þangað til ég fer að spóka mig á baki, usss hvað ég hlakka til.

Pabbi... faðir minn kær, nú þarf að verða sér úti um annað hross. Hmm... ha...

Í hálfbróðurhúsi eiga líka heima tvö folöld. Sæturassar. Þannig er það nú bara.

Heimalingur og fjósaköttur með meiru. Þessi blessaður er með athyglissýki á háu stigi, þjáist af "Hér er ég" heilkenninu. Eltir mann út um allt og hleypur þetta handrið á enda án þess að blása úr nös.

Sjááið bara hvað hann er væminn og klístraður hahh! Ahh hvað kisur geta nú verið fínar :)

Ég komst ekki í þrektímann í gær - búúú, en á morgun. Á morgun gott fólk byrjar gleðin.

18:00 - 18:40, þetta verður gott sumar!

Jæja ljúfust. Hádegissalat í tveggja tíma fjarlægð. 

Glóir sem gull

Bæði morgunhimininn klukkan 4:45 í morgun!

Sjááið hvað þetta er gullfallegt!

Og Gullbylgjan sem ákvað að spila þetta snilldarinnar lag!

"Sííímtólið teeeeek, taaala í þaaaaað, tiiiil þeeeess að seeeegja þér...."

Gullbylgjan er án efa mín uppáhalds ofurstöð - seventís og hamingja.

Ekki örvænta. Ég lofa, ég var að keyra, skipta um gíra, stýra og fylgjast með veginum. Ég hélt bara á myndavélinni. Aspasklukkan er líka korteri of fljót þessi elska. Hef ekki haft nennu, né vilja, til að breyta henni.

Því, þið vitið, það er svo svakalega tímafrekt og erfitt.

Talandi um aspas.

BWAAAHAHAHAHAHAAAAA.....

...sá þessa uppstillingu í Hagkaup í gær og froðufelldi úr hlátri. Uppvakninga-aspas gott fólk! Kominn til að ljóstillífa þig til ólífis!

Ég meina'ða. Ha. Hverskonar eiginlega framstilling er þetta hahaha. Hvers á aumingja aspasinn að gjalda?

"Fyrirgefðu, já, ég ætla að fá einn aspas. Bara einn. Þennan lengst til hægri undir þessum sem liggur á ská á móti ljósa aspasnum. Já, einmitt... ákkúrat þennan.

Ég fæ svo einn poka hjá þér líka"

Aaaaallavega... 

Í gærkveldið ákvað ég að lifa hættulega og sjóða mér pott af "Steel Cut Oats". Jebb. Heilir hafrar sem búið er að splæsa niður í tvo eða þrjá hluta. Sumsé, mun minna unnir. Ekki þessir sem við þekkjum vanalega, þessir pressuðu. Onei, þessir láta þig vinna fyrir peningunum og neyða þig til að nota geiflurnar.

Og ómæ grautarinnar heilagur andi alls sem er áferðaperralegt og edorfínlosandi til átu... í þessu lífi og næsta.

EKKERT SVONA... dramatík, þá sérstaklega matardrama, er fullkomlega leyfileg fyrir klukkan 8 á morgnana.

En í fullri ofuralvöru, þá vara þetta svaða. Ég gerði svosum ekki mikið við gumsið annað en að blanda samanvið skyr (ofan í dollunni að sjálfsögðu), vanillu, kanil og bláber. Átti ekki torani. Vildi spara hafragrautsskreytarann eilítið og smakka þetta hreint og beint og haaaaaalalujah systir! Skóflaði þessu inn í ísskáp eftir samansuðu í gærkvöldi og hljóp frammúr í morgun til að smakka.

Tilbúin??

Ohm... ohm nohm nom 

Já... takk... förer!

Þykkildi yfirtók alheiminn og áferðaperinn er búinn að vera að klappa mér á öxlina síðan áti lauk. Ég svoleiðis skar gumsið í tvennt gott fólk. Gleðin við að tyggja litlu hafraklumpana kollverpti efitirvæntingunni við átið, til hins betra, og eftir sat eitt, hamingjusamt, átvagl.

Nei, það verður ekki alveg jafn mikið úr þessu og pressuðum höfrum. Pressuðu dýrin verða meira deigó og skemmtilegir. Það væri eflaust hægt að sjóða þessa betur, meira, lengur og það kem ég til með að gera næst og sé hvaða snilld ég uppsker við það.

Ohm nohm nohm.

Hlakka mikið til næstu grautardaga. Það held ég nú.

Dagskráin í dag:

• 08:00 - Ommiletta
• 11:00 - Hádegisnart
• 12:00 - Tabata
• 13:30 - Hámark
• 15:30 - Án efa eitthvað ét sökum óviðráðanlegs síhungurs
• 18:00 - Kvöldmatur 
• 19:00 - Þrekgrunnur að víkingaþreki

Ketilbjöllur, ólympískar lyftingar, blandaðar bardagaíþróttir, högg, spörk og annað álíka ofurspennó í kvöld.

Eeeeeeheeeeeeek hvað ég hlakka til!

Sárar kinnar

Mikið sem rassinn fær nú stundum að kenna á því blessaður. Hnébeygjur. Móðir allra lappa-, rassa ofuræfinga.

Æji hvað ég ölska svona æfingar. Hnébeygjur, réttstöðulyftur, framstig, planka, upphífur og vabeha.

Fæturnir hafa samt verið kátari. Það vottar fyrir töluverðum skjálfta og ég veit, ég veit jafn vel og ég elska það að borða graut, hvað harðsperrurnar á morgun eiga eftir að stuðla að hægagangi, uppsetu erfiðleikum og kvíðahnút í maga í hvert sinn sem ég fer á klósettið!

Já, ég sagði það. Sjáið fegurðina nú fyrir ykkur!

Ef ég væri partur af hóp, sem af einhverjum ástæðum væri verið að elta af ljóni... því hver veit, kannski... kemur ljón... þú veist, vappandi inn í vinnu á morgun... þá væri ég bestaðasti besti vinur allra í hópnum.

Grautur fyrir æfingu í morgun. Klassíski óbrigðuli, ekki svo fallegi, með kanil-, kakó og kaffiblöndu ásamt dass af Engilbert.

HRÆRA

Hámark eftir æfingu, sökum óundirbúnings, og beint upp í vinnu í einn kaffi. Við mér blasti fjall af vínberjum. Bókstaflega. Þvílíka berjahrúgu hef ég ekki augum litið í langan tíma. Hún var svo stórkostleg að ég þurfti að festa hana á mynd!

Núna, þegar ég hugsa til baka, er ég ekki alveg viss um af hverju mér þótti þetta svona stórkostlega magnað og yfirskilvitslega æðislegt.

Eftiræfingumóða? Double rainbow syndrome?

Ahhh!

Fyrsti kaffibolli dagsins... með Everestvínber í baksýn. Ég segi ykkur það, kaffi númer eitt er svoleiðis hamingja og gleði fyrir öll skilningarvit. Mikið sem ég elska ákkúrat þetta móment á morgnana.

Hey! 

Munið þið eftir því þegar ég flutti síðast? Hvernig ég flutti síðast?

Ef ekki... þá er hér upprifjun!

Ég endurtók leikinn í gær!

Fékk Bankann lánaðan á nýjan leik.

Hér er fagröðunarmanneskja á ferð. Fagmanneskja... með meiru!

Fagmanneskja segi ég!

BIBLÍAN GOTT FÓLK!

Ef ykkur vantar að flytja eitthvað þá tek 250 kall á tímann, 150 kall ef eitthvað:

• rispast
• brotnar
• bráðnar
• hverfur

Ég er enn netlaus.

Bú á það!

Gulrótarkökugrautur

Reyndar engin kaka.

Bara.. gulrótargrautur. En, það hljómar svo, svo, ekki rétt.

Gulrótar-gratur! Gulrótar-köku-grautur! Þetta er hið minnsta grautur með gulrótarköku-innihaldsefnum.

Numero uno

Skelltu rót í blender!

Ég fékk töfrasprota í jólagjöf... elsk, elsk... elsk! Eeeelska hann blessaðan.

RÖRA

Numero dos 

Um það bil 20 gr. hafrar í skál ásamt slatta af vanillu/heslihnetu torani og vatni, örbylgja í góða mínútu. Kannski 1,5 min. Bæta þá kúfuðum 3 tsk gulrótarrifrildi út í og hræra.

Numero tres 

Næst slást í leikinn um það bil 100 gr. af eggjahvítum og gumsinu hrært vel saman. Aftur inn í örbylgju, kannski mínútu. Taka þá út og bæta við kanil, múskati, negul og smá salti. Hræra vel.

Mest af kanil, næstmest af múskó og minnsta af negul - það er amk. það sem flýtur mínum bát.

Numero quatro 

Aftur inn í öbylgju, 1 - 2 mínútur eða þangað til "þurrt". Taka þá út og hræra upp, hella aukalegum jah, 20 gr. eggjahvítu útí og hræra saman þangað til vel blandað og mjúkt og fallegt og fiðrildi. Eggjahvítan eldast þegar hún er hrærð saman við sjóðandi heitt gumsið. Ég geri þetta til að fá svona eðalfína silkiáferð. Krydda meira ef vill.

Hafragrautsskraut

Blanda saman smá torani + skyri, ekki borða. Alls ekki borða takk, grauturinn á þetta skyr.

Framsetning - mjög mikilvægt fyrir bragð og gæði grautsins

Koma graut fallega fyrir í þartilgerðri gulri skál, sletta með skyri og skreyta með rest af rifrildi.

Borða strax eða ísskápa.

Ég ísskápaði.

Smakkast eins og gulrótarkaka. Ég segi það satt og lýg enganveginn. Skelfilega jákvætt átið sem átti sér stað í morgun og allsvaðaleg matarperviskan sem fylgdi í kjölfarið. Hægt að "betrumbæta" með t.d. smá púðursykri, hörfræjum og jafnvel chia. Ég tala nú ekki um muldar valhnetur.

...

Nei... ég ætla ekki að tala um þær!

Gulrótarkökugrautur.

Kominn til að vera þessi elska. Kominn til að vera.

Gulur er liturinn

Miðað við hvað myndirnar eru óskýrar svona í morgunsárið, þá á bæði skálin, og textinn á skálinni, vel við.

Nema... jah, hér er um graut að ræða.

Bahh... hvað er smá grautur milli vina, tungumála og meininga?

Tomato - potato

Vaknaði, borðaði, ræktaðist a-la Fannar og lét næstum lífið. Get svo svarið það þessar æfingar!!

Öööölska þær.

Skondið, í fyrsta setti nær maður kannski 30 froskum á tilteknum tíma. Í öðru setti einsetur maður sér að taka aðra 30, en nær kannski upp í 23. Í þriðja og síðasta setti peppar maður sig upp í huganum og hugsar "ok... þú getur þetta kvenmannsbelgur... koma svo... amk 18, 18, 18..." og svo, þegar á hólminn er komið, og það eru 5 sekúndur eftir af æfingunni, þá uppgötvar maður að 18 hefur breyst í "eiiiinn enn, áfram svo... bara... eiiiinn" og þú ert í raun að telja elleftu endurtekninguna.

Það telst vera ágætis æfing... vel í lagt ekki satt? Ahh...

Annað sem ég öööölska...

...er þessi skál.

Hún er svo fín og krumpuð og gul.

Einn einfaldur torani með bláberjum og ristuðum hörfræjum, síðan í gær.

Gott gult óskýrt start í þreytumóki.

Gúllaði svo í mig ómynduðu skyri og banana, eftir æfingu, í hungurmóki.

Aðeins meira gult í matarplanið í dag.

Þarf að redda mér einhverju gulu í hádegismat.

Yfir og út.

Einfaldur + BioBú

Einn einfaldari en allt einfalt.

1. Hafrar
2. Vatn
3. Heslihnetu torani
4. Örbylgja
5. Salt
6. 1 - 2 eggjahvítur
7. Hræra
8. Blá.. berja?
9. Skyra
10. Voila!

Gull glimrandi fallegt ekki satt?

Torani + salt gera karamellueffekt sem ég er orðin hættulega háð, hvað grautarmall varðar. Skuggalega gott. Eggjahvíturnar eldast um leið og þú byrjar að hræra þeim við sjóðandi heitan grautinn svo það er óþarfi að örbylgja á nýjan leik. Bláberja dýrið, frosin í þessu tilfelli, og bera fram í skál til heiðurs aspassins míns.

Keypti Bio-Bú skyrið í gær til prufu.

Það bragðaðist eins og skyr.

Magnað... ekki satt?

Eina sem gæti mögulega skilið að er áferðin. Bio-Bú er mun mýkra og rjómakenndara en hreint KEA. Ekki neikvætt í mínum kladda. Ekki svo jákvætt að ég skipti úr KEA. Svipar mjög til Grískrar jógúrtar. Væri geðveikt að taka væna gommu og blanda út í graut. En ekki núna.

Neibb.

Karamellugrautargræðgin var einum of yfirgripsmikil í morgunsárið til að leifa nokkur hliðarskref eða steppdans á hafragrautslínunni.

Stundum langar manni bara í pylsu með tómat og steiktum, jú nó!

Þetta var ein... góð.. grautarskál!

Eða... þið vitið. Innihaldið.

Hef ekki lagt í að éta skálarnar ennþá.

Mikil var þó jákvæðnin sem gekk á í þessu áti.

Þó það sjáist ekki á myndunum þá var ég svo hund helvíti jákvæð að ég hefði getað kveikt á ljósaperu með hugará(t)standinu einu saman.

HRÆRA

Ok... allt í lagi.

Orðum, lýsingum, aðferðum.. ofaukið. Ég virðukenni það.

Ég hefði kannski ekki getað kveikt á ljósaperu...  en kerti, já.

Allt tekur þó enda. Grautar eru því miður ekki undanskildir í þeim efnum.

Fékk nýtt Karvelio plan í gær.

Ég veit hverjum hann hefur viljað hefna sín á þegar hann setti þessar æfingar saman, en hann tekur það svo sannarlega út á mér!

Hahh!! Ég get ekki beeðið með að byrja á þessum mánuði!!! Mjööög djúsí æfingar.