Amk 11,5 tímar þangað til!

Laaaaaaaaaaawd allmighty!

Sjáið bara, elsku fólkið mitt, hvað ég fjárfesti í fínum dunk af hamingju!

Þessi fræ eru reyndar hvít. Veit ekki hvort það skipti einhverju máli áferðarlega séð, held nú varla, en við sjáum til... og já, ég gat ekki beðið og opnaði dúnkinn í bílnum í dag!

Þessi græna plastkrukka kostaði mig þó ekki nema hægra augað og frumburðinn! Já takk! Ekkert svo hræðilegt. Ég meina.. þeir hefðu getað beðið um bæði augun nú eða handlegg aukalega!

Hlakka samt svo mikið til grautaráts á morgun! Það er næstum því kjánalegt hvað ég hlakka mikið til.

Í kvöld blandaði ég sumsé eftirfarandi hráefnum saman:

• 1/4 bolli hafrar 
• 1/2 msk chia fræ (óóhhbeibeh)
• 1/2 bolla skyr
• 1/4 bolli vatn (eða mjólk... eða bæði)
• smá vanilludropar 
• ögn af salti

Hvað gerist á morgun í hafragrautsskraut-málum er eigi fyrirséð. Eftirfarandi kemur hinsvegar sterklega til grænna greina: Bláber, banani, múslí, hnetusmjör, sulta, hungang, rúslur, döðlur... guð má vita hvað!

Valkvíði? Rétt svo í stóru tánni já, en bara rétt svo.

Svo vil ég nýta tækifærið og vegsama hana Fanneyju Dóru sem mest ég má. Ég á barasta ekki orð hvað sumt fólk er einstaklega dásamlegt og vel af guði gert - þú ert perla mín kæra. Þakka þér kærlega fyrir mig

Vakna snemma, nýta daginn...

...hnýta daginn?

Ætlaði að fara í ræktina í morgun og brenna pínkulítið en veðrið var of gott til að sleppa. Fattaði þó ekki fyrr en aðeins of seint að nóta niður fyrstu skrefin í myndum  - þið getið svosum gert ykkur í hugarlund hvernig morgunrútínan er.

Frammúr - vatnsglas - bíða eftir því að þreytan fari úr augunum - bursta tennur - íþróttaföt - ipoda - út!

Tók einn snöggan ör-rúnt í morgunblíðunni - þvílík flemmings forréttindi mín kæru. Sjáið bara dýrðina... og IKEA.

 

Másandi video-beljan er að sjálfsögðu ég og þó það mætti halda að ég sé búin að hlaupa í 45 mín. samfleytt þá eru rétt 10 mínútur liðnar af örhlaupi undirritaðrar. HAHH!! Mér til varnar þá byrjaði hlaupið þó í urð og grjóti, upp í móti, ekkert nema urð og grjót-i... svona næstum. Fyrir utan stórkostlega lélegt hlaupa- og þol-form þá þarf nú ekki nema smáhreyfingu á litlu tá til að ungfrúin svitni eins þaulvön gufubaðsrotta í áskrift!

Mætti halda að ég hafi verið að klára maraþon. Gvöð hvað það er samt stórkostlega æðislegt að vera með tónlist í gangi sem hentar þínum eyrum á meðan hlaupi stendur.

1. Tíminn líður hraðar og þú ert í meiri fílíng.
2. Ég heyri ekki hvæsið í sjálfri mér þegar lungun eru með mótþróa. (truflar mig geypilega)
3. Ég get einbeitt mér að því að taka "lítil skref Elín, lítil skref.... lítil skref" í takt við gleðibylgjurnar sem leika í kringum hamar, steðja og ístað.

Leynilög með meiru!

Eftirfarandi hrygðarkvein, í bland við harmastunur, glumdi svo í Garðabænum "ON THE COOVER OF THE ROOLING STOOOOOOOONES...." í morgun þegar átvaglið tók geysifína bíómyndabyltu niður eina brekkuna og hrökklaðist með andfælum síðustu metrana í átt að Gúmmulaðihöllinni.

Núh.. yfirleitt, á þessu stigi máls, þá fer ég í sturtu og tek 30 - 40 mínútna pallaslökun + morgunmatsát áður en ég fer í vinnuna. Sökum myndatöku á graut, og því sem fram fer í þessum ágæta pistli, frestaði ég sturtunni þar til eftir grautarát.

Byrja á því að umskera aumingjans eggin í einn einfaldan. Ohh... þvílík sóun. Þarf að koma mér í Garra sem fyrst.

Vatn og vítamín. Geislar svoleiðis af þessu hollustan!

Mangó á hliðarlínunni. Ég stóðst ekki mátið þegar ég sá það í ísskápnum. Þetta mango var fullkomið - algerlega fullkomið. Sjáið svo hvað hnífurinn í bakgrunn er lýsandi fyrir framtíð gulu gleðisprengjunnar. Yfirvofandi mangó-ógn.

Svo á ég svona vanilló. Var búin að gleyma þessari dýrð og vá, þetta er snilldin einar í grautinn mín kæru. Snilldin einar. Gefur virikilega gott og milt bragð. Get svo svarið það ég man ekki alveg hvar ég keypti þetta! Held það hafi verið í Trader Joes í Bandaraíkjalandi.

Mangó og frosin bláber í blíðunni, svo glæsilega fínir litir. Beint út á pall. Bláberin fersk, og þessi skál hefði farið á lista yfir topp 150 bestu grauta sem ég hef smakkað!  

Grauturinn heppnaðist líka súper - alveg eins og deig. Ohohoo...

Að graut meðtöldum ásamt afkvæmi Hlöðvers, í uppáhaldsbolla, gerist startið varla betra!

Hræra - óguð - ógeð!

Lúlli ljóti! Eggjahvítur og bláber er efnasamband sem gerir sér enga grein fyrir fagurfræðileika grautarskála!

Guð minn góður. Þetta verður bara verra. það er eins og eitthvað hafi dáið í skálinni!

Hresst... og blátt... og gott!

Vinnan handan við hornið.

Meira kaffi. Haldið þið að ég eigi við vandamál að stríða?

Gott start inn í helgina. Mmmmmyyyeeees!

Eigið góðan og blessaðan dag strömparnir mínir!

Mikilvæg tilkynning

Ég uppgötvaði í fyrradag að þessar buxur...

...hafa klárlega skroppið saman í þvotti!!

Ég fleygði fótleggjafelunum með hefnd, og biturð, í hjarta út á pall - þetta eru ofurbuxur, mínar uppáhalds og allt það, en það er deginum ljósara að þær hafa skroppið saman í þvotti. Eina skýringin á þessari skyndilegu minnkun!

Í ljósi þessa ætla ég að halda áfram að borða þessa mini sítrónuböku.

Veit ekki hvað buxunum gengur til en þessi smábaka er betri en lykt af nýslegnu grasi!

Nei bíddu...

...ég tek þetta til baka!

Nýslegnugrasalykt er sumarfýla sem enginn má fara á mis við. Eins og gamla Kóka Kóla jólaauglýsinging. Jólin teljast vart til jóla nema auglýsingin hafi verið augum litin. Einnig er nauðsynlegt að sjá hana í sjónvarpinu! Annað er bara svindl!

Hmmhh... hvað var ég að tala um?

Jú, buxur .. já .. alveg rétt! 

Böku-teskeiðinni beini ég í átt að himinblámanum með miklum tilþrifum og lýsi hér með stríði, og almennu frati, á hendur þvottavélarinnar og þurrkarans sem afvegaleiddu brækurnar mínar.

Fæ mér svo annan bita af bökunni. Ohm nohm nom!

Munið eftir tónlistinni!!

Ég var í miklu stuði í morgun! Tók rassatækið föstum tökum og spólaði svoleiðis að það ískraði í græjunni!

Ef þið púslið músíkinni saman við rétta skapið, og gerð af æfingu, getið þið garanterað að æfingin verður svaðaleg! Ekki það að ég þurfi að segja ykkur það - ég var bara að enduruppgötva iPod stemninguna og réttulagavalið -> verandi mín uppáhalds ofurlög.

Þvílík dásemd!

Þetta var ekkert nema hrænræktuð morgungleði. Ég átti í mestu erfiðleikum með að dansa ekki og dilla mér! Hér er brotabrot af hamingjunni sem dundi í eyrum átvaglsins!

 

Þetta gæti svo mögulega verið máltíð fyrir æfingu!

Gumsið gæti mögulega innihaldið eggjahvítur! 

Ég gæti mögulega hafa bitið í kvekendið áður en ég pakkaði því inn.

Njótið dagsins

Óguð... ég dey!

Lyftingar og Bootcamp eru ekki... það sama!

Ónei!

Lyftingar og Bootcamp fara eflaust saman að einhverju leiti, ýta undir eiginleika hvors annars og getu einstaklingsins til að takast á við æfingarnar, en guð minn góður... að vera ofurlyftingakappi vs. ofur Bootcamp antilópa -> engin miskunn hvernig sem þú lítur á málið. Samtvinnað, og þú breytist eflaust í grískan guð.

Eins og yfirbugaður fettmúli sniglast ég áfram á síðasta andardrætti. Heilinn heldur þó að skrokkurinn sé til í tuskið. Líklegast er það banananum að kenna sem ég kokgleypti 5 mínútum fyrir æfingu. Vegna þessa sé ég sjálfa mig fyrir mér valhoppandi á grænu engi fullu af fiðrildum og regnbogum, en reyndin er aldeilis önnur - lungun emja, fæturnir gráta. Eins og önd á svelli hlunkast ég áfram, slefandi með tilheyrandi búkhljóðum. Másandi búrhveli stútfullt af rækju! Mínum Ástralíumjúka rassi reyni ég að drösla í átt að portinu þar sem hlaupið hafðist og einbeita mér að önduninni. Ég ranghvolfi augunum og hvæsi hástöfum, tel mér trú um að tvískipti tónninn í andardrættinum sé með eðlilegasta móti. Ég hljóma samt eins og stíflað trompet. Loks sé ég glitta í portið *tilhlökkunartryllingsspenningur*. Ég þykist gefa í en það stoðar víst lítið. Útlimirnirnir sveiflast óviðráðanlega í allar áttir og ég rétt næ að halda höfði. Ekki ósvipað hrossaflugu í vindi! Ég gæti ekki einusinni klórað mér á nefinu án þess að eiga í þeirri hættu að pota úr mér augað - fínhreyfingarnar eru horfnar. Ég slengist í átt að portinu góða eins og ormur einfætti. Það virðist vanta í mig öll bein. Kærkomin hvíld í nánd og hjartað verður örlítið hamingjusamara. Þvílík endemis andskotans gleði sem það verður að klára þennan viðbjóð. Hlaupið endaði ég guðdómlega. Líkt og stungin í bakið með samúræjasverði hrundi ég á hnén og slengdist í jörðina með einkennilegu skvamphljóði. Lungun tæmdust af lofti, frá mér kom eitt hávært fnas í bland við ískur sem gaf mér svona líka fínt blóðbragð í munninn. SIGUR! Ég komst alla leið! HAHH BOOTCAMP... ÉG VINN!

"ALLIR INN Í SAL -> 20 FROSKAR MEÐ HOPPI, 20 ARMBEYGJUR, 20 SIT UPS OG 4 FERÐIR Í STIGANUM. ENDURTAKA 5 SINNUM. ÞIÐ FÁIÐ 10 MÍNÚTUR TIL AÐ KLÁRA ÞETTA - EF ÞIÐ NÁIÐ EKKI AÐ KLÁRA ÞURFA ALLIR AÐ TAKA 500 METRA RÓÐUR OG BYRJA HRINGINN UPP Á NÝTT...."

Óguð!

Jah. Þetta er kannski ekki alveg jafn dramatískt og ungfrúin lýsir, en ég hef sagt það áður og segi það enn, þol og átvögl eiga litla samleið. Sérstaklega ef átvalið heitir Elín! Hef þar af leiðandi alltaf veigrað mér við hlaupum, jú, af því mér reynist það óyfirstíganlega erfitt. En ekki lengur, segir hún með miklum tilþrifum, setur hendur á mjaðmir og sveigir höfuðið svo langt aftur að það rignir beinustu leið upp í ranann á henni!

Nýjir tímar, nýjar áskoranir - byggja upp almennt þol, vöðvaþol í bland við styrk. Búin að taka ansi góðan hring í þessu ræktar- og lyftingaststússi öllusaman og alltaf jafn skemmtilegt að breyta til. Ég krumpast aftur í lóðin þegar það byrjar að dimma. Nýjasta markmiðið - að ná þrekprófinu!

2007 -> Franska kjallarabollan - tékk!

2007/2008 -> Mjónan, brennslutímabilið - tékk!

2008/2009 -> Laga ónýtt brennslukerfi - tékk!

2009/2010 -> Kött, móta/massa, rífa vel í járnið, lægsta fitu % hingað til - tékk!

2010 -> Svindlið, ultratone - tékk!

2010 -> Ástralía, kom mér niður á jörðina aftur og skrokknum á miðlínuna - tékk!

2010 -> Almennt úthald, þol og styrkur, antilópusyndrome - in progress!

Tala svo um að vita ekki í hvorn fótinn á að stíga! Fólkið mitt - þegar þið byrjið að rækta ykkur, ef þið hafið aldrei farið áður, ekki hika, ekki bíða en verið búin að setja ykkur raunsæ markmið og reynið að kynna ykkur málið örlítið áður en lagt er af stað. Jafnvel finna ykkur góðan einkaþjálfara.

Kannski maður þurfi að reka sig á vitleysurnar í þessu til að sjá að sér og læra, en ef ég hefði nú bara vitað 2007 það sem ég veit í dag varðandi t.d. mat og æfingar, þá hefði ég getað sparað mér mikinn tíma í koddagrát, batteríislausar æfingar og staðnanir. Munið bara að þið eruð ekki að gera þetta fyrir neinn nema ykkur sjálf sem innlegg á framtíðarreikninginn. Það segir enginn að þið þurfið að vera með kúlurass sem brýtur hnetur til að vera ofur og jú, þið megið alveg borða kökur!

Verið kát í eigin skinni. Ef ykkur líður vel þá er markmiðinu náð, ef ekki, standið þá upp ekki seinna en í dag og takið fyrsta skrefið. Hreyfing og góðar matarvenjur fylgja yfirleitt í kjölfarið og tilfinningin er stórkostleg, sama hvar þið eruð stödd líkamlega/andlega. Það er bara bónus. Eins og Nóakropp á ís!

Ég fór til dæmis Ástralíu og át á mig auka 5% ftu... það var gooooooott!

Halelújah, preis ðe lord...

Ahh já... best að gleyma ekki -> þetta er svo það sem ég borðaði í kvöldmat í dag!

Og þetta er það sem maturinn skildi eftir sig! Fallegt ekki satt? Ég held það ætli að reyna að ná heimsyfirráðum! Ég skírði það Ramon!

 

Kryddlegin hjörtu - klikka ekki! 

Bootcamp, er að fílaða.

Brosið fyrir mig

Nótt í hausinn á ykkur, eða eins og Ás'búðingar' segja - Natten Skratten!

Feiknarfrí og vorbeljur

Góðan og blessaðan snúðarnir mínir og snældur!

Þetta... var eitt... gott... frí! Jahérna!

Stundum þarf maður bara á letipúkanum að halda, svei mér þá. Margt og mikið búið að gerast síðan í apríl. Margt og mikið í vændum. Þar af leiðandi hef ég velt fyrir mér engu og öllu og viti menn - ekki komist að augljósri niðurstöðu - eins og almennilegum fílósífer sæmir!

Er það ekki stórkostlegt?

Er hinsvegar byrjuð að drekka kaffi eins og enginn sé morgundagurinn! Unglambið að fullorðnast eða hvað? Sporðrenni hverjum lítranum á fætur öðrum. Gott eða ekki - ég er ekki viss. En átvaglinu þykir það með eindæmum unaðslegt. Hér kemur svo mynd af fyrsta kaffibolla undirritaðrar! Fyrsta kaffibollanum í 26 ár takk fyrir danskurinn! Jah, takk fyrir ástralinn kannski meira viðeigandi - þurfti hvorki meira né minna en heila Ástralíuferð til að koma dýrinu upp á bragðið!

Af hverju er þetta svona merkilegt? Jú - því froðan svaðafína sést hér vel og í hana skrifaði ég að sjálfsögðu sjálfhverft E!

Já, en af hverju svona merkilegt ungfrú Elín? Nú - af því að ég kláraði kaffið!

Og af hverju er froðan svona svaðafín?

Af því að kaffidrykkjan sívinsæla byrjaði á svaðafínni froðu og skeið!

Án efa besta leið til að "drekka" Cappuccino. Ég segi það satt! Var hinsvegar litin horn- og forvitnisaugum trekk í trekk af áströlskum kaffisnobbum sökum froðuáts. Bað ítrekað um auka froðu í bollann minn til þess eins að gúmsla henni í trýnið á mér.

Froðan hefur enn ekki yfirgefið systemið og á sérstakan stað í hjartanu. Ein froða á dag kemur þó engu í lag nema áferðaperranum!

Froðufíknin var svo sterkt á tímabili, og nú tala ég eins og alvön lífsreynd til margra ára kaffidrykkjukona, að kjammsað var á baðfroðunni í freyðibaði til þess eins að halda geðheilsunni. Ég lét þó snarlega af þeirri iðkun þegar ég var farin að prumpa sápukúlum...

...nei ég segi nú sonna!

Hvernig atvikaðist þó kaffidrykkja hjá einstakling sem ekki gat hugsað sér bragð af kaffi í öðru en Tiramisu?

Í stuttu:

Cappucino froða -> kakó + kaffi -> latte + kaffi -> latte + 2*kaffi -> kaffi + smá mjólk -> svart og sykurlaust takk! Nú er það bara espresso eða short black sem bíður mín handan við hæðina.

"Hvað sagði Tarzan þegar hann sá fílana koma yfir hæðina????"

Ahh - fæ ekki nóg af þessum brandara!

Ástralía olli ekki vonbrigðum Snúbbarnir mínir. Maturinn ekki heldur og vinur minn kokkurinn Euan átti svo sannarlega þátt í að gera þessa ferð að mikilli át-fiestu! Guð minn góður og allir englarnir! Það segist hér með, skrifast, svart á hvítu og staðfest af alheilögum anda - ég hef aldrei... aldrei nokkurntíman á ævinni borðað jafn mikið á einum mánuði og Ástralíumánuðinum! Þvílík endemis andskotans hamingja fólkið mitt - afsakið orðbragðið! Hér er svo brota... brota brota brot!

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Tilkynnist svo hérmeð að besti ávöxtur í sólkerfinu er fundinn. Feijoa! Vex bara á Nýja Sjálandi - bragðast eins og Húbba Búbba. Ég grínast ekki!

 

Annað í Ástralíufréttum - Kisar detta ekki á bakið ef maður missir þá, klósettvatnið snýst réttsælis, brimbrettagaurar eru nákvæmlega eins og í bíómyndunum og allir ástralir segja "mate".

Meira um það seinna!!

Jæja. Hvað hef ég gert síðan ég kom heim?

Varð vitni að einu svaðalegasta íslenska sólarlagi sem ég hef augum litið í langan tíma!

Fékk mér tvö ný göt í eyrun. Með þessu áframhaldi verður ekkert eftir af þessum vesalingum!

Fór ég beint í ræktina? Beint að hreyfa mig? Beint að borða vel valið prótein og almennileg kolvetni?

Nei það held ég nú aldeilis ekki gott fólk!

Þar sem mitt líf er svo gott sem búið að vera opið öllum til góns og gláps ákvað ég að taka mér dágott andlegt-, blogg-, matar og hreyfifrí! Ahhhh! Endurnærð, uppfærð og tilbúin í svakaleg átök í sumar! Undirrituð búin að vera að "passa" sig jú, en "PASSA" sig. Látum það vera. Borða það sem ég vil borða, en þó innan skynsemismarka. Það er ekkert nema dásamlegt.

Er þó komin í fjórða gír aftur. Tek smá frí frá lyftingum og sveittum speglasal og ætla prófa Bootcampf núna í sumar - nýta góða veðrið og útiveruna. Ætla að byrja að lyfta aftur, ásamt Bootcamfinu, í júlí og sjá hvert það leiðir mig. Þol og almennt úthald er langt fyrir neðan velsæmismörk og smáhlaup skilur skvísuna eftir í slefpolli og óæskilegum kippum sem herja á alla útlimi. Einstaka sinnum ná kippirnir upp í hægra auga. Það er ó svo falleg sjón mín kæru - falleg, falleg sjón. Verður gaman að sjá hvernig ástandið á undirritaðri verður í september. Þá byrja lyftingarnar aftur á fullu.

Hohh.. gaman að breyta smá til. Gleðilegt að hafa farið til Ástralíu! Gott að vera til!

Mikið ofboðslega er veðrið búið að vera fallegt í dag! Mér líður eins og vorbelju!

Nú þegar ég hef skriftað - hver vill koma út með mér og hoppa með rassinn upp í vindinn og trýnið á ská? Ekki fussa á það fyrr þú þú hefur prófað. Sérlega gleðilegt. Sérstaklega þegar maður getur fiktað í ketti í og með.

 

 

 

 

 

 

 

 

 

 

 

 

 

 

 

 

 

Þangað til næst! Verð góð hvert við annað og njótið þess að vera til.

Ultratone niðurstaða og adios í mánuð

Gleðilegt sumar í gær! Of mikið ys og þys til að komast í blogg - fylgjast með flugumferð, öskufalli yfir Reykjavík og redda hlutum almennt áður en allt verður um seinan og ég þarf að komast til Akureyrar!

Allavega!

Fyrst vil ég byrja á því að telja upp staðreyndirnar:

1. Ég var að þjálfa samviskusamlega + borða rétt allan tímann.
2. Ég var ekki í yfirvikt og var í einhverju prógrammi sem átti að styrkja húð + vöðva. Ekki grennandi.
3. Ég fór í 10 tíma, þær á stofunni mæla með 20 til að sjá varanlegan árángur. (?)
4. Við erum að tala um mánaðar tímabil.
5. Yndislegar konur sem vinna þarna. Topp eintök

Persónulega og prívat - ekki fyrir mig.

Ég reyndi að hafa opinn huga, fylgjast með "ruslakistunni", lærinu slitna og maganum. Svæðin sem ég lagði áherslu á og satt best að segja get ég ekki sagst hafa séð ljósið. Jújú, þetta gerir eflaust eitthvað gagn því ég fann oft fyrir þreytu í vöðvum eftir herpinginn, fékk í eitt skiptið hálfgerðar harðsperrur. En hvað sjáanlegan árangur varðar, því miður mín kæru. Langsamlega best að eyða peningunum í líkamsræktarkort og hreyfa á sér rassinn. Það er líka svo skemmtilegt.

Ekki til skyndilausnir í þessum efnum elsku bestu. Þykir leitt að skemmileggja en nei, þær eru ekki til. Gaman að hafa prófað þetta og núna hef ég "hands on" reynslu af rafmagninu og get sagt mína skoðun án þess að blikka auga :)

Dæmi því hver fyrir sig, út frá því sem ég skrifa og þessum blessuð myndum hér að neðan. Ef þú vilt prófa, endilega prófaðu, en ef þú ert í vafa í gvöðanna bænum sparaðu peninginn!

Ég setti einungis fyrir/eftir myndir af magasvæðinu, ekki af því að spéhræsðlan er að drepa mig (þó hún gæti mögulega lamað mig), heldur af því að munurinn á hinum myndunum er svo gott sem enginn og 90% hafa mestan áhuga á þessum hluta líkamans. Ég verð bara að biðja ykkur um að trúa mér - ég sagðist líka ætla að éta sjóhattinn minn (sjóhattur - mjög mikilvægt) ef þetta hefði skilað ofur árangri.

Setti meira að segja brúnkukrem á belginn á mér til að "ýkja" ósjáanleg áhrifin.

Ruslakistan og lærið slitna eru enn söm við sig en það er allt gott og blessað. Það þarf víst að vera eitthvað til að klípa í ekki satt? 

Jæja mín elskulegu bestu. Ég krosslegg fingur um að komast til Ástralíunnar á morgun. Ég mun gera mitt besta til að blogga á meðan ég er úti. Ég kem jafnvel til með að henda inn einu örbloggi frá Heathrow ef ég kemst í rafmagn.

Þangað til næst, njótið helgarinnar og hafið það æðislegt í vorinu/sumrinu. Ég ætla að fá mér skyrgums med det samme! Skyrgums með bláberjum, banana og möndlum... óguðminngóður!

Hugmyndir að "hollari" eftirréttum

Svona af því að helgin er hinumegin við hæðina. Nokkrar hugmyndir að "hollari" útfærslum af góðgæti, millimáli, bita, áti...

...og já, ég rændi einstaka myndum/hugmyndum af netinu

Jógúrt með hunangi

Eins einfalt og það hljómar. Jógúrt með smá hunangi og jafnvel berjum/hnetum/krumsi og hamingju.

Banana ís - þetta er í miklu uppáhaldi hjá mér.

Skera banana niður í sneiðar, setja í ílát/poka, frysta, mauka! Til að gera þennan ofur þá væri hægt að setja út í blenderinn/matvinnsluvélina dökkar súkkulaðispænir og jafnvel smá mjólk. Bera fram strax - bara gott og alveg eins og ís. Treystið mér!

Banana frostpinnar

Skera banana niður í bita nú eða í tvennt. Pota priki upp í rassinn á aumingjans bönununum. Krakkar elska svona. Svo bara leika!

Velta hverjum banana upp úr dökku bræddu súkkulaði og dýfa ofan í hnetumulning/kókos/múslí. Líka hægt að velta þessum gulu hamingjusprengjum upp úr hunangi og svo hnetukrumsi.

Inn í frysti og japla á með bros á vör!

Bláber með bananasósu

Bláber í skál! Check!

Banani, smá ricotta ostur, létt ab-mjólk, sítrónusafi, hunang - blanda. Check!

Hella yfir bláberin og jafnvel toppa með súkkulaðispænum! Double check!

Grillaðir ávextir

Einfalt, fljótlegt, gott. Grilla t.d. banana/ananas/perur/epli/mango - ekki of mikið þroskað. Strá með kókos, jafnvel borða með hunangs jógúrti!

Eftirrétta panini/burrito

Tvær sneiðar af heilhveiti brauði nú eða heilhveiti tortillur, smyrja með smá náttúrulegu hnetusmjöri/sultu, jafnvel raða með jarðaberjum eða banana og kremja í grilli. Voila. Dreypa ogguponsu hunangi yfir brauðið eða t.d. flórsykri til að vera fensí.

Tortilla - náttúrulegt hnetusmjör - smá sykurlaus sulta - banani - vefja - BURRITO!

Jarðaberja og appelsínumix með pistasíum og ricotta

Ohhh... svo gott. Hræra saman t.d. 2 msk rauðvínsediki, 1 msk hunangi setja til hliðar. Skera niður jarðaber og setja í skál ásamt hnetum og niðurskornum appelsínum. (skera úr þeim kjarnann og reyna að sleppa öllu hvítu) Hella edikblöndunni yfir ávextina, hræra létt, setja á disk (reyna að sleppa vökva) og mylja ricotta ost yfir.. nú eða jafnvel geitaost. Ef þú vilt lifa hættulega geturðu saltað/piprað dýrðina smá - annars bara súkkulaðispænir eða kókos

Ofnbökuð epli

Annaðhvort hollari týpu af eplaköku eða taka eplin sjálf og baka þau. Af því ég öölska heit, krumsuð epli.

Skera innan úr þeim kjarnann og fylla svo holuna með einhverju gúmmulaði. Blöndu af hnetum/þurrkuðum ávöxtum/kanil/hunangi sem dæmi. Setja í eldfast mót, setja smá vatn í mótið og inn í 180° heitan ofn í 25 - 30 mínútur. Jafnvel setja ogguponsulitla smjörklípu ofan í hverja holu.

Svo væri líka hægt að kreysta safa úr appelsínu eða nota hreinlega appelsínusafa, hella yfir eplin áður en þau eru bökuð. Myndast ágætis "sýróp" sem hægt er að nýta nú eða.. úr því ég er byrjuð, búa til smá sýróp á pönnu fyrst. Appelsínusafi, hunang, kanill, negull, kardimommur - hita þangað til þykkt og hella yfir eplin og inn í ofn! Mmmmm....

...sagði einhver ís? Banana ís?

Frosin vínber

Inn í frysti og út eftir nóttina! Æðislegt að japla á svoleiðis á kvöldin nú eða barasta þegar maður liggur út á palli í góðu veðri með bumbuna upp í loftið! Bumba út í loftið -> mjög mikilvægt atriði í sólbaði! 

Svo væri eflaust hægt að útbúa allskonar sheika eða búðinga/mousse úr tofu og fleiri gleðilegheitum. Þetta er svona það sem mér datt í hug án þess að þurfa að hugsa mikið (já, ég er löt í dag) - einfalt, fljótlegt. Er líka með nokkrar hugmyndir af ágætis nartkostum þar sem uppskriftirnar mínar fela sig. Súkkulaðikökur, muffins ofl. 

Þið kannski hjálpið mér við að finna eitthvað fínt til að bæta við þennan lista? Hvað er ykkar uppáhalds? 

Æðisleg helgi að baki

Ákvað á föstudeginum að aðhafast ekkert um helgina. Njóta þess að vera letihaugur sem, í mínu tilfelli, þýðir heilalaus sófadýrsstemning með átvaglsívafi! Ahhh... ljúfa lífið!

Tók mig nú samt til og gerði baksturstilraun í gær. "Deigið" kúrir inn í ísskáp í þessum töluðu orðum og hlakkar mikið til að eiga stefnumót við ofninn eftir æfingu í dag. Hafrakökur með meiru.

Hef tekið þá ákvörðun að prófa Ultratonið! Tilraunin er hér með hafin! Mætti galvösk í morgun  með grautinn og át hann mjög virðulega á meðan ég beið eftir tímanum mínum! Hann er nú ekki girnó á að sjá greyið. Óhóflegt magn af kanil og brúnn banani eftir ísskáp er því miður ógleði fyrir augað en gott fyrir bragðlaukagúbbann!

Eins og geimskrímsli lá ég þarna skjálfandi, herpandi, kremjandi í 30 mínútur á mis-háum stillingum. Valdi mér eitthvurt prógram sem heitir "Stinnandi, styrkjandi" - hljómar krúttaralega ekki satt? Verður líka gaman að sjá hvort lærvöðvinn taki við sér. Ætla nú samt sem áður ekki að eyða 30 tímum í þá tilraun, held mig við tíu og gef blátt áfram, skítkalt mat á þetta ferli!

Þar sem ég ætla mögulega að birta 'fyrir og eftir' myndir í einhverju formi, með bumbuna á mér ásamt fleiru, allsbera og óhulda framan í alþjóð þá bið ég ykkur vinsamlegast um að vera "góð". Það er ekkert óskaplega þægileg tilhugsun að "bera" sig á "netinu". Eiginlega barasta ekkert þægileg. Skoppandi rassar í sundi eru ekki meðtaldir, þar gilda líka önnur lögmál!

Hér eru svo stríðsáverkarnir eftir "átökin". Ræktin vinnur... guð minn góður. Ræktin vinnur með yfirburðum!

Sá sem kemur auga á músina á myndinni hér að ofan vinnur! 

Tökum aftur upp Ultratone þráðinn í apríl mín kæru! *trommusláttur*

Góður dagur í vændum og tilraunakökur í kvöld

Lífsrót, allt að gerast, breyttir tímar

Allskonar rót í gangi, búið að vera í gangi og verður áfram í gangi. Bæði gott og slæmt rót - en það gerir lífið bara spennandi og skemmtilegt. Hvar er fúttið í því að hanga á miðlínunni allan daginn? Fáar skemmtilegar sögur hægt að spinna út frá því.

Hvað er annars næst á dagskrá?

Ætla að prófa minn fyrsta Hot Yoga tíma á eftir. Hlakka mikið til að sjá hvort spítukvendið nái að liðka aðeins á sér bífurnar og bakið. Ég er komin á þau skemmtilegu tímamót í mínu lífi að ég get ekki beygt mig eftir hlutum á gólfið án þess að þurfa að beygja mig í hnjánum! Svakalega fín í uppréttri stöðu en um leið og átvaglið byrjar að fetta sig er voðinn vís! Eins og búið sé að stinga priki upp í óæðri endann á undirritaðri sem nær alla leið upp í haus - afsakið martraðirnar sem gætu ásótt ykkur eftir þessa fallegu lýsingu. Verður spennó að sjá hvernig þetta fer - ójá.

Það er möguleiki að villivaglið sé að fara í svaðalega gleðilegt ferðaleg. Meira um það seinna!

Ultratone! Ég er nokkuð viss um að allir séu að velta þessu fyrirbæri fyrir sér. Virkar það, virkar það ekki? Er ég að eyða peningunum mínum í tilgangslausa kippi og spenning fyrir smá kitl í rasskinnarnar? Ég er nefnilega með slitinn vöðva í vinstra læri. Fór í ultratone prufutíma til að sjá hvort ég kæmi einhverju lífi í hann greyið þar sem hann er dofinn og ónýttur. Afgreiðsludaman stakk upp á því að ég tæki bara heildarpakkann, blöðkur á bumbu/rass/læri/ruslakistu úr því ég væri að þessu og jújú, af hverju í ósköpunum ekki? Reyndar hægt að velja um margar mismunandi meðferðir. Þarna lá ég og kipptist til eins og rúllupylsa í nokkrar mínútur. Skvísan lofaði þessa meðferð svo svakalega að ég snérist eins og úldinn ullasokkur á rigningardegi og vildi ólm taka stöðuna á þessu til að geta "afsannað" þá kenningu. Ég trúi jafn mikið á svona "meðferðir" og "megrunarkúra"! Hún talaði t.d. um að fitnessfólk færi í þetta rétt fyrir keppnir til að "strekkja" aðeins á sér. Auðvitað nefndi hún það einnig að matarræðið þyrfti að breytast hjá þeim sem væru að spögúlera í þyngdartaps-meðferð ofr. En ekki hvað ég bara spyr? Hvað um breytt matarræði og almenna hreyfingu?  Ég var að spögúlera í því hvort ég ætti að láta peningaplokka mig og leyfa ykkur jafnvel að fylgjast með. Fyrir og eftir myndir, allur pakkinn. Hvað segið þið um það? Svona úr því að ég er á "réttu róli" og allt það. Þetta er kannski bara þvæla, kreppa og peningaeyðsla - gæti samt orðið áhugavert! Hmmm.. spáum í þessu.

Mötuneytið mitt er annars að standa sig með prýði eins og ávallt. Eftirfarandi dýrð var gleypt á örfáum mínútum á slaginu 11:15. Gat ekki beðið lengur. Skrokkurinn var alveg á síðasta snúning.

 

 

 

 

 

 

Keila frá því í gær. Fiskiprinskeila og möndlur í eftirrétt! Klukkan er 14:33 og allt er í lagi!

Fyrir þá sem ekki vita - þegar ég tala um "ruslakistuna", þá er ég að vitna í stórkostlega hliðarsvæðið aftan á baki, rétt fyrir ofan rassinn! Bakspikið undursamlega. Þaðan kemur mörin til með að leka af mér þegar sól skín í helvíti! Ömmu andskotans til mikillar hamingju! En það er bara krúttaralegt - eitthvað til að klípa í!

Jæja... hot yoga mín kæru. Here I come!