Salsa, hvenær dags sem er

Góðan daginn mín kæru!

Gerði einn af mínum uppáhalds grautum í morgun. Yfirleitt set ég nú heilt egg ofan á grautinn en æfingin á eftir kallar. Væri líka gott að bæta við þetta avocado, skinku.. setja ost út í grautinn svo eitthvað sé nefnt!

Salsa hafragrautur með ostsneið, eggi og tómötum

Sjóða saman:

1 dl grófa hafra

1 dl undanrenna

1/4 skeið prótein (má sleppa)

1 eggjahvíta

sletta hot sauce

Hræra blönduna vel saman áður en hún er soðin. Hræra líka vel í grautnum á meðan suðu stendur - eggið gæti annars fest sig skemmtilega við botninn á pottinum.

Hafragrautsskraut:

Ostsneið, að eigi vali, lögð ofan á heitan grautinn. Þar á eftir steikti ég eggjahvítu á pönnu, má vera heilt egg að sjálfsögðu. Mjög gott þegar rauðan lekur yfir grautinn. Lagði eggjahvítuna yfir ostinn. Þar á eftir setti ég kúskús og tómatbland ofan á eggjahvítuna, smá salsasósu, pipar, steinselju og loks sáldraði ég parmesan osti yfir herlegheitin.

Bjúútifúl morgunverður! Gersamlega æðislegur - eins og einn amerískur, ég segi það satt!

Osturinn að bráðna yfir grautinn... mmmm! Jæja, nóg í bili. Ætla að skella mér í ræktarhús og gera eitthvað sniðugt!

Myndavélaklikk

Haldið þið að myndavélin mín, þessi elska, hafi ekki bara ákveðið að éta upp batteríin! Líkur sækir líkan heim svosem.. eigandinn er átvagl! Ofurgrauturinn sem ég fékk mér í morgun verður því skilinn útundan og fær enga mynd af sér í bili, en mikið ofboðslega var hann góður!

Skyrgrautur með banana, muldri granola stöng, sultu og hnetusmjöri

1 skeið hreint prótein

1/3 bolli soðinn grautur

2 msk hörfræ 

kanill

Skjóta þessu inn í örbylgju þangað til nokkuð vel þykkt. Hræra þá saman við:

50 gr. hreinu skyri

1 tsk sykurlausri sultu

Hafragrautsskraut

1/2 niðurskorinn banani

1/2 mulin granola stöng

1 tsk hnetusmjör í skeiðina - sem ég að sjálfsögðu hræði saman við. Granola stöngin var æði með banana og smá hentusmjöri í hverjum bita. Mmm...

...þið leyfið bara hugmyndafluginu að njóta sín!

Þessum yndælis morgunverð lauk svo með mjög gómsætri plómu og tebolla.

Einfaldleiki

Stundum er matur bestur þegar notuð eruð fá hráefni. Þó góð hráefni. Þegar við vorum í Toscana sýndi það sig og sannaði trekk í trekk... pasta með smá olíu og kannski basil! Fullkomið!

Bjó mér til 'gamaldags' graut í morgun. Sauð upp í 1,5 dl mjólk - 1 dl hafra, 2 tsk hveitikím og prótein að sjálfsögðu. Toppaði grautinn með jaðraberi og hunangi, sem ég sósaði, og setti smá heimagert hnetusmjör í skeiðina. Jarðaberið setti ég frosið inn í örbylgju þangað til það varð að mauki. Hrærði svo saman við það hunangi í restina.

Gamaldags er kannski ekki rétta orðið, það hefði líklegast þýtt grautur með smá salti, sykri og mjólk út á. En það er ágætt að bæta próteininu í grautinn, sérstaklega fyrir æfingu. Gamaldas þýðir frekar að ég notaði t.d. ekki kanill (herre gud), vanilludropa, krydd.. ávexti, grænmeti, skinku, hnetur....

Ohh hvað þessi skál var ákkúrat fín!

Hver vill koma með mér til Toscana? Langar svo til Ítalíu aftur, yndislegur staður!

Hornafjörður um helgina

Fast og slegið. Beint í sveitasæluna til tengdó, oh það er svo notalegt. Get ekki beðið. Ætla að vera mikil kreppukerling og útbúa nesti fyrir 10 tíma keyrsluna, fram og til baka, sem bíður okkar. Stoppa... hafa smá picnic, teygja úr fótum og passa vel upp á að fá ekki rasssæri! Skráði mig líka í Fit Pilates í dag. Hef aldrei prófað og hlakka mikið til að sjá hvernig það kemur út. Hef heyrt margar góðar sögur af þessum æfingum.

Hvað er annað í fréttum...

... fékk mér súkkulaði kanilsnúning í morgun. Hann var massafínn! Hrærði saman próteini, möndlum, hnetum, hörfræjum, kakódufti, kanil og soðnum graut - beint inn í örbylgju í 30 sek. Grauturinn stífnar svolítið upp og verður eins og kaka. Sem er gleðilegt. Sullaði aðeins meira af graut þar yfir og toppaði með múslíi. Nei... ekki fallegasti grautur sem til er - en gott var gumsið!

Grautnum fylgdu svo nokkrir bitar af granola stöngunum sem ég gerði í gær. Þær eru að slá í gegn, rosalega góðar.

Einhverntíman var ég nú búin að lýsa yfir ást minni á mötuneytinu í vinnunni. Þetta er ástæðan fyrir því...

...og þetta! Svo ég tali nú ekki um skyrkælinn, kexskúffuna, ávextina og hrökkbrauðið! Ég elska skvísurnar í mötuneytinu!

Svona leit t.d. hádegismaturinn minn út í dag! Þetta gerist nú varla betra?

Fékk mér svo mitt venjubundna viðbit. Prótein, eplabitar og kanill saman í bolla og hitað í örbylgju. Stráði svo nokkrum rúslum yfir til að fá eplakökufílínginn. Rest af epli smurt með skyri og kanil stráð yfir. Heldur manni assgoti góðum fram að kvöldmat! Ekki láta ljótmyndina skelka ykkur... þetta er gúmmulaði!

Nú er það bara út að skokka, beint í sturtu, sturta í mig "ég er að fara að sofa" próteini, góna smá á sjónvarpið og beinustu leið í rúmið.

Banana og hafra pönnukaka

Yndislegt veður!!

Langaði í pönnsu í morgunmat. Langaði líka í hafra og jú, er á leiðinni í ræktina eftir klukkutíma tæpan. Breytti því aðeins uppskriftinni í takt við það, en set samt báðar hingað inn.

Banana og hafra pönnukaka - fyrir einn svangan maga

Það sem ég gerði:

15 gr hafrar, rúmlega 1/2 dl.

1/3 stappaður banani

1/3 skammtur hreint prótein

2 eggjahvítur

1 tsk hnetusmjör

Það sem ég hefði gert:

1/2 bolli hafrar

Heill stappaður banani

2 eggjahvítur

1 tsk hnetusmjör

Hræra saman og voila! Steikja á heitri pönnu báðum megin þangað til pönnukakan er elduð í gegn. Ég steiki mínar yfirleit stutt því þá verða þær ofurmjúkar. Sérstaklega ef ég nota prótein því það gerir pönnsuna þurrari en ella. Ef þið notið prótein, setjið þá meira af banana eða eggjum. Jafnvel AB-mjólk. Fullkomið! Ekki hafa áhyggjur samt sem áður, þetta smakkast ekki eins og eggjakaka. Rosalega gott og skemmtilegt. Hægt að setja hvað sem er ofan á. 'Stappa banana, smyrja yfir með hnetusmjöri og sultu', 'skinka, ostur og egg','hnetusmjör og múslí','prótein-skyrblanda og múslí', 'jarðaber og banani','hunang og kanill'....

...farin að rækta mig og pína hinn helminginn í leiðinni! Ahh, gott að byrja daginn á góðu veðri, heitri pönnsu og svakalegum lyftingum!

17. júní slagur í garðinum

Til hamingju með daginn ykkar í dag elsku fólk.

Vaknaði við mikið garg og brölt í morgun. Stökk framúr og kíkti út um stofugluggann. Komst snarlega að því að eitt illketti hverfisins var mjög einbeitt að leggja annan köttinn minn í einelti. Ég, að sjálfsögðu, eins og sannri kattamóður sæmir, stökk út hið snarasta og hljóp eins og vitleysingur stuttan spöl á eftir óvinakisa með tilheyrandi handapati og köllum. Mjög hreykin að hafa passað upp á köttinn minn stóð ég nokkuð fersk úti í garði, á náttkjólnum og tánum, og naut góða 17. júní morgunsins. Með hárið út í loftið og svefnkrumpur í andlitinu uppgötvaði ég þó skyndilega að ég er víst ekki ein í heiminum og fjórir einstaklingar úr húsinu mínu störðu undrandi á brjáluðu kerlinguna út í garði. Held að nágrannarnir séu að hugsa sig um hvort það sé sniðugt að eiga heima nálægt Crazy Cat Lady. En það er nú í lagi - þau hafa þá sögu að segja vinum og ættingjum! Hressandi!

Í tilefni dagsins ætlaði ég að vera góð við sjálfa mig og henda í banana-hafrapönnsur, svakalega góðar. Sú ákvörðun var skotin niður af góða englinum á öxlinni á mér í ljósi þess að ég er að fara í ræktina eftir nokkrar mínútur. Því var hafrakaka á boðstólnum. Bjó mér til eina um daginn sem ég frysti. Hafrakakan er þar af leiðandi sérstaklega mixuð og mæld eftir stöðlum og reglum sem máltíð fyrir æfingu. Svona um það bil.

Ef æfingin gengur vel kem ég líklegast ekki til með að geta gengið mikið á morgun en ég læt þetta yfir mig ganga.Það er bara svo hræðilega skemmtilegt að reyna á fæturna - er alltaf jafn stórhrifin af því hvað þeir þola mikið þessi grey.

Hafrakökuna setti ég saman úr 35 gr. höfrum, 1/4 úr banana, 1/2 skeið hreinu próteini, kanil vanilludropum og mjólk, rétt til að bleyta upp í. Ekki of mikið þó. Kökurnar verða rosa skemmtilegar þannig. Bananinn gerir kökuna karamellukennda. Lovit! Inn í örbylgju setti ég 2 frosin jarðaber og hitaði þangað til úr varð hálfgerð sósa og toppaði kökuna með jarðaberjunum, hunangsdreitli og smá létt AB-mjólk.

17. júní kjúklingur og pönnsur hjá mömmu í kvöld. Ég ætla að reyna að mixa eplaköku sem er það holl að leyfilegt er að borða hana í t.d. morgunmat. Hversu æðislegt væri það? Mjög æðislegt! Með henni skal snæða sojaísinn sem ég keypti í gær. Sjáum hvernig það kemur út!

Það er alltaf föstudagur

Finnst ykkur það ekki? Tíminn líður eins og honum sé borgað fyrir það. Um leið og vinnu líkur á föstudegi kemur laugardagur, þarnæst mánudagur og svo áður en þú veist af er föstudagur genginn í garð á nýjan leik. Mjög ruglingslegt að fá frídag í miðri viku. Ég er búin að vera með föstudagsfílínginn í stóru tánni í allan dag og bjóða góða helgi í þónokkuð mörg skipti. Þar af leiðandi gladdi það mig mjög þegar ég komst að því að það var grautur í vinnunni í morgun en ekki brauð - eins og er alltaf á föstudögum.

Múslígrautur með banana Agave skyrdrykk

Hrært saman og hitað í örbylgju: 

1/3 bolli soðinn grautur

1 skammtur hreint prótein

3/4 stappaður banani

1 msk hörfræ

1 tsk heimagert hnetusmjör

kanill

Hafragrautsskraut:

Skvetta Agave skyr. Má nota hvað sem er svosum. venjulegt skyr, AB-mjólk... og trefjamúslí.

Gott mál, glaður magi!

Prófaði líka nýtt mix nýtt í dag. Að minnsta kosti nýtt fyrir mér. Hráefni síðdegisbitans samanstóðu af einu litlu epli og hreinu próteini. Var samt að leita mér að einhverju heitu til að bíta í. Blandaði því próteinið mitt út í smá vatn, frekar þykkt. Skar eplið smátt og stappaði niður 1/4 hlut úr banana. Bætti banananum út í próteinið ásamt slatta af kanil og hrærði vel saman. Loks hrærði ég eplabitana út í og skellti inn í örbylgju í 30 sek.

NAMM - fílaði þetta í botn! Eins og heit eplakaka. Eplin urðu "Al Dente" ef svo má að orði komast. Svolítið mússí, heit en crunchy í miðjunni. Alveg frábært. Myndirnar svolítið subbó, afsakið það. Snyrtipinninn ég er ekki færari bland-mæster en svo þegar blöndunartækin eru lítill bolli og skeið!

Lét svo loks verða af því að kaupa bæði rándýran ís og fillet sem ég hef verið að forvitnast um. Afurðir sem sérstaklega eru ætlaðar fyrir grænmetisætur - "vegan" matarræði. Sykurlaus soja ís og fillet. Ég er yfirleitt skeptísk á allt sojatengt en er mjög forvitin því ísinn, svo ég taki sem dæmi, telur ekki nema 171 hitaeiningar fyrir hver 100 gr. af ís. Þar af eru 2,3 gr. prótein, 0,77 gr. fita og 17 gr. kolvetni. Ekki slæmt það! Ætla að prófa þetta tvennt á morgun. Verður gaman að sjá hvort þetta geri það sem það á að gera! Ef prufudýrin virka vel, þá gæti þetta verið sniðug leið til að hrista aðeins upp í matarræðinu!

Tvíþætt hafragrautsveisla

Af því að það er nú sunnudagur þá ákvað ég að ganga aðeins yfir hafragrautsstrikið og leika mér svolítið. Þar sem ég átti afgangs hráskinku og melónu síðan í gær, nýtti ég mér tækifærið. Ég er nokkuð viss um að margir taki andköf og hugsi með sér hvað verið sé að bruðla með úrvals hráefni í eina grautarskál - en þetta var mjög gott og trúið mér, þetta er ekki daglegt brauð á mínu heimili! Þó það væri að sjálfsögðu ekkert slor!

Þar sem ég var búin að ákveða hráefni í graut fyrir hinn helminginn þá vildi ég gera sætari graut handa sjálfri mér. Endaði að sjálfsögðu á því að við borðuðum grautana í mikilli sameiningu.

En getið þið nú bara hvað ungfrúin frékk sér!! Hafragrauts Splitt! Ójá!

Hafragrautur ríka mannsins

Sjóða saman:

1/3 bolli grófir hafrar

1/3 bolli kotasæla

2/3 bollar vatn

Nokkrir bitar cantaloupe melóna

2 niðurskornar ferskar döðlur

Nokkrir möndlubitar

Smá bútur af hráskinku. Kannski 1 msk

Hafragrautsskraut:

Einni sneið niðurskornum Camembert raðað fagmannlega yfir heitan grautinn svo hann nái að bráðna. Nokkrar þunnar sneiðar af Cantaloupe melónunni lagðar yfir ost og graut og restin af hráskinkusneiðinni ofan á melónuna. Þarnæst er niðurskorinni ferskri döðlu komið fyrir, bæði á hráskinkunni og yfir grautinn. Loks er meistaraverkið toppað með hunangsdreitli.

Rosalega skemmtilegur þessi. Hráskinkubitinn sem soðinn var með gefur mjög gott bragð í grautinn sem vinnur vel með sætunni í döðlunum og melónunni. Kotasælan gerir áferðina mjúka og rjómakennda og einstaka sinnum bítur maður í möndlu. Algerlega geggjað. Það er líka æðislegt að fá bragðið af ostinum með í spilið. Kemur flott út!

Hafragrauts Splitt fyrir undirritaða

Sjóða saman:

1/3 bolli grófir hafrar

1 skeið hreint prótein

1 tappafylli vanilludropar

1 msk hörfræ

1/3 bolli Undanrenna

1/3 bolli vatn

Hafragrautsskraut:

1 banani, skorin langsum og lagður á disk. Grautnum er þarnæst hellt á milli banana-helminganna og yfir þetta er stráð 1 tsk dökku súkkulaði, 1 msk hnetusmjöri og 1 tsk sykurlausri sult. Ég notaði hnetusmjör sem ég bjó til í gær. Þarnæst er jarðaberjum og hindberjum dreift yfir grautinn. Dropa af skyri er vandlega komið fyrir í miðju grautsins og herlegheitin toppuð með uppáhalds múslíinu.

Hversu ógeðslega skemmtilegt er að borða þetta? Tala nú ekki um gleðina sem fylgir því að fá bráðið súkkulaði í morgunmat. Mmhmm!

Þó svo sætir grautar séu að sjálfsögðu góðir, þá er alveg jafn frábært að fá sér grauta sem eru hinum megin við strikið. Hafrarnir bjóða svo vel upp á það!

Góðir grautar á góðum degi!

Hafrakaka að morgni

Ég veit ekki hvað skal kalla þetta. Þetta er í raun ekkert annað en hafragrautur, nær því að vera næturgrautur, sem búið er að fletja út á disk! En þar sem það er kökulag á þessari annars bragðgóðu klessu af höfrum og gumsi, þá skal gjörningurinn kaka kallast. Hrákaka jafnvel?!? Ekkert nýtt í þessum heimi svosem, bara enn ein leið til að borða hafragraut á morgnana. Skemmtileg leið líka. Grauturinn verður ekki nærri jafn mjúkur og næturgrautur nú eða venjulegur hafragrautur. Nokkuð þéttur eftir veru í ísskápnum enda lítill sem enginn vökvi í þessu. Athugið samt að 'kakan' er ekki hörð og ég borða þessa snilld yfirleitt alltaf með skeið. Mjög skemmtileg áferð og mjöög gott á bragðið að sjálfsögðu.

Köld hafrakaka

Þurrt:

1/3 bolli hafrar, eða uppáhalds múslí t.d.

1/2 skeið hreint prótein

1 msk hörfræ

kanill

smá hnetusmjör

Blautt:

1 msk mjólk. Ég notaði undanrennu.

1/2 vel þroskaður og stappaður banani

vanilludropar

Hafra-köku-skraut:

Jarðaber, bláber, banani, skyr-prótein blanda og muldar möndlur og valhnetur.

Hræra hnetusmjörinu saman við þurrefnin þangað til það hefur blandast nokkuð vel við. Þar á eftir hræra blautu vel saman við þurrt, setja grautinn á disk, móta köku og inn í ísskáp yfir nóttina.

Ég hrærði 1/2 skeið af hreinu próteini saman við 100 gr. af skyri og smurði yfir kökuna á mjög virðulegan hátt. Raðaði svo yfir þetta jarðaberjum, bláberjum og restinni af banananum. Draup yfir ávextina smá hunangi og muldi valhnetur og möndlur yfir allt heila klabbið í restina. Nahmmm!

Svo er að sjálfsögðu hægt að leika sér með þetta og bæta hnetum í 'grunninn', döðlum, hunangi, kryddum, í raun hverju sem þér dettur í hug. Sama gildir um toppskrautið. Alveg magnað hvað litlir hlutir og fjölbreytileiki geta glatt hamingjusamt matargat!

Múslígrautur og ber

Morgunmatur - betra seint en aldrei.

Vinnugrauta malla ég yfirleitt alltaf í örbylgjunni. Það er svo gott þegar búið er að stappa bananann við grautinn og hræra próteinið út í að skella öllu inn í örbylgju í smá stund. Þá stífnar blandan svolítið upp og verður skemmtilegri að borða. Múslíið fæ ég yfirleitt hérna í vinnunni en stundum á ég það til að grípa með mér smá extra skraut að heiman, ef ég er í miklu græðgiskasti þann daginn. Þessi skál var frábær!

Inn í örbylgju, 35 sek:

1 skeið hreint prótein

1/3 bolli soðinn grautur

1/2 stappaður banani

kanill

Hafragrautsskraut:

4 jarðaber, sneidd og skorin

nokkur bláber

5 möndlur

1 msk hörfræ

Quinoa "Keen-wa" flögur

Trefjamúslí

Já, þetta var góð skál af höfrum og fullkomið start á deginum.  Ég elska að hafa múslí í grautunum mínum. Crunch í hverjum bita. Sérstaklega skemmtilegt þegar ég bít í möndlu þar sem ég set þær heilar út á grautinn. Berin gefa skemmtilega súrt bragð á móti kanilnum á meðan bananinn fluffar og sætar allt upp.

Með þessu fékk ég mér hvorki meira né minna en Womans Energy yogi te í þar til gerðum jólabolla. Ég er ekki mikil tekerling, en drekk endalaust af þessari tegund!

 

Svolítið jóló stemmari svona í byrjun sumars!

 

Mikil hafragrautsvísindi í byrjun dags, og mikil dramatík yfir einni grautarskál. En svona er þetta, grauturinn er bara svo góður!