Morgnarnir eru bestir

04:50

Bleik skál full með banana- og kanilgraut.

Fallega skreytt með afgangs salthnetumulning og bláberjum, sem yfir nóttina, breyttust í rúsínur. Fallega skreytt... en samt... svo grá! Greyið.

Hefði ég nú aulast til að skera út á þetta svo gott sem banana og smá eplakrums þá væru þessar myndir gullfalega fínar.

Buxur gott fólk, síðmorgunbuxur og sokkar í stíl við grautarskálina. Planað, ráðlagt og skipulagt.

Eða þannig.

Átvaglið mundi sumé eftir kuldakasti síðustu myndatöku og fyrirhyggjusemin drap næstum græðgispúkann í morgun. En bara næstum... því buxurnar voru á röngunni og vasarnir stóðu út í loftið eins og eyrun á Guffa.

En grauturinn var góður. Eins og alltaf yfirleitt.

Bananabiti extraordinaire skríður úr felum! Ekki svo viss um að honum hafi þótt það góð hugmynd 2 sek eftir að þessi mynd var tekin.

05:22 

Hjólað af stað í ræktarhýsi með aukahring og lúppu í ferhyrning.

Enganvegin umhugað um eigin öryggi, tók ég myndavélina og vídjóaði dásamlegheitin, á tvíhjólinu, í morgunsárið. Að stýra með einari, á hjóli, með myndavél, og tala við sjálfa sig í leiðinni án þess að taka kollhnís er... kannski... ekki... jafn stórkostlegt afrek og ég ætlaði mér að útlista.

Mmm... jebb.. gleymume'ssu!

Mikið, mikið.... miiikið sem ég elska að nýta morgnana í góðu veðri, kyrrð og blíðu.

Í miðjum hjólaklíðum hugsaði ég með mér af hverju í ósköpunum vindurinn næði að græta kvendið svona svakalega. Hvort hann væri viljandi að reyna að smokra sér bak við gleraugun til þess eins að vera með leiðindi.

Eftir 5 sekúndna vangaveltur, og vindbiturð, uppgötvaði ég þó, mér til mikillar aulahamingju, að glirnurnar hvíldu sig á höfðinu á mér. Húrra fyrir því.

10 stig, niðurávið, fyrir greindarvísitöluna og eggjaskurnleysið reyndar líka.

Eggjaskurn verandi ósýnilegi hjálmurinn sem situr á toppstykkinu!

En þrátt fyrir heimskulegheitin tel ég mig knúna til að segja ykkur frá þessu öllusaman... hví? Ég tók meira að segja mynd til sönnunar og gagns!

Hvaða hvati liggur hér að baki hef ég ekki hugmynd um en ég held ég skrái önnur 10 stig í kladdann hjá sjálfri mér fyrir vikið.

Niðurávið.

Sama útsýni og í fyrra, sami hringur. Með hið gullfallega, bláa, IKEA í baksýn.

Trúi ekki að það sé rétt svo tæplega ár síðan.

05:58

Handleggum formlega refsað.

Fyrir hvað munu þeir aldrei vita blessaðir.

07:00

Hleðsla gúffuð hratt og örugglega eftir æfingu.

 

Hjólið mundað og þeyst á hraða ljóssins í vinnustöðvar þar sem sturtan var tækluð og einum gríðarlega vel metnum kaffi sporðrennt í góðra félaga hópi.

07:30

Morgunklúbburinn.

Já, það eru greinilega allskonar klúbbar sem tilheyra ákveðnum tímum dags hér um slóðir og hádegissalatið bara í tveggja tíma fjarlægð.

*gleði*

Segið mér nú góða fólk, hvar kaupir maður sér almennilega eggjaskurn á höfuðið?

Athugasemdir

[Dossan (IP-tala skráð) 25.5.2011 kl. 11:20]

4:50

5:22

[Elín Helga Egilsdóttir, 25.5.2011 kl. 11:34]

Ahh já... mjög mjög gott :)

[Sveinbjörg Eva (IP-tala skráð) 25.5.2011 kl. 12:40]

Ég fékk minn fína hjálm frá Erninum Skeifunni :)

[Ragnar (IP-tala skráð) 25.5.2011 kl. 13:07]

Magnað, þú ert vöknuð á undan mér sem vakna 5:15 og finnst mér það nú nógu snemma :o Skemmtilegar líka allar þessar lappa myndir, held að þú sért að koma með nýtt trend í sumar ;)

[Elín Helga Egilsdóttir, 25.5.2011 kl. 13:16]

Sveinbjörg: Ach so,  auðvitað! Ætla að tékka á því.

Ragnar: Já.. veistu... ég hef tekið eftir því. Fætur virðast rata oftar en ekki inn á þetta blogg! Hahh

[Hugrún (IP-tala skráð) 25.5.2011 kl. 13:18]

Hvenær ferð þú að sofa á kvöldin? Úff ég varð bara þreytt við tilhugsunina að vera á fótum kl 04:50 og ekki að vera á leiðinni í flug...

[Elín Helga Egilsdóttir, 25.5.2011 kl. 14:06]

Er yfirleitt komin í ból fyrir miðnætti... eins og amma mín!

11:30 í síðasta lagi en oftar en ekki undir sæng með góða bók eða teikniblok kl 10 ;)

[Guðný (IP-tala skráð) 25.5.2011 kl. 20:20]

Vóóóó er þá ekkert erfitt að vakna eftir 5 og hálfan tíma??? eða verður maður svona mega ungur og hress af svona líferni til lengri tíma????  

[Elín Helga Egilsdóttir, 26.5.2011 kl. 08:00]

Hehe.. reyndar, ef ég er að klína augnlokunum saman mikið eftir kl. 11 þá opnast þau ekki aftur fyrr en 6 eða 7 tímum seinna. En yfirleitt, sama hvenær ég fer í ból, þá er ég að rumska um 4:30 - 5 leitið.