Gaman saman... með mat

Jahérna hér! Elsku fólkið mitt. Ég held, svei mér þá, að metið fyrir fjölskuldumatarboð og almennt át hafi verið slegið þetta árið og ágúst ekki liðinn! Þetta voru engar smá veislur get ég ykkur sagt! Eigum við að rifja upp frá því í apríl?

24.04 Búlgarskar pylsur, sæt kartöflusúpa og byggbrauð.

26.04 Kosningasamkoma. Túnfisksteikur, hambó, kjöt af öllum gerðum og súkkulaðikaka aldarinnar.

10.05 Mæðradagur. Hafraskonsur og heilhveitibollur.

17.05 Júróvision fiesta, ofurhambó og át fram eftir nóttu.

26.05 Heilhveiti crepe í Gúmmulaðihöllinni.

07.06 Hachala, æðislegi arabíski þorskrétturinn.

17. júní. Marbella kjúklingurinn góði, samviskulausa eplakakan og pönnsur.

28.06 Sumarið mætt á svæðið. Grillpinnar, kjúlli og nom brokkolísalatið.

10.07 Æðislegur glænýr Makríll, handsamaður af pabba.

11.07 Systra fiesta. Doritos kjúlli og með því.

12.07 Góður sumardagur. Humar, kjúlli og meðlæti.

17.07 Helgarveisla í Gúmmulaðihöllinni. Smokkfiskur, Marbella kjúlli og banana ís.

26.07 Hádegisbrunch fyrir foreldrasettið.

27.07 Móaflatarkjúllinn sívinsæli!

02.08 Verslunarmannahelgin. Hambó, humar, túnfiskur, smokkfiskur, hörpudiskur... ómægod!

Spáið svo í því, að inn í þetta safn vantar amk. fjórar matarsamkomur sem ekki voru myndaðar, skjalfestar eða skráðar. Það þýðir að vikulega hafi verið matar-hittingur af einhverjum toga. Engin furða að mamma hafi tekið tiltektarkast og rifið aumingja ofnotaða eldhúsið sitt niður! 

Okkur þykir svo sannarlega gaman að hittast, borða og hafa það gott. Við virðumst nýta hvert tækifæri til að slá upp matargleði og éta á okkur gat og ekki er allt búið enn! Ónei! Þrenn afmæli núna í lok ágúst, 19, 20 og 30, eldhúsfögnuður móður minnar, heimkoma veiðipabbans... Ég meina, er nokkuð óeðlilegt að halda upp á að ég hafi farið til tannlæknis í vikunni?

Hvað leynist í nammiskápnum?

Nammiskápurinn! Uppáhalds staðurinn í eldhúsi Gúmmulaðihellisins! Ef ég týnist, þá er mjög gott gisk að leita að mér hjá nammiskápnum, gónandi, fiktandi nú eða nartandi! Sanka að mér hlutum héðan og þaðan og er komin með nokkuð gott safn. Ef ég rekst á eitthvað sniðugt í leit minni að hinu fullkomna grautarskrauti þá kippi ég því með og það endar í nammiskápnum.

Þessi skápur inniheldur part af hafragrauts og morgunverðarmalli! Restina er að finna í ísskápnum í formi hnetusmjörs, þurrkaðra ávaxta, sultu, graskersmauks og/eða skyrs.

Meðal hráefna, af því sem til er í dag, eru súkkulaði og butterscotch bitar. Það er nom sem notað er um helgar og á átvaglsdögum! Aðallega út á grauta - mikið gott þegar þetta bráðnar ofan í grautinn!

Hnetubland - þetta keypti ég í Nettó. Allskonar góðar blöndur þar.

Hnetur af ýmsum toga. Gott að eiga út á morgunmat eða í bakstur.

Meira hnetu-, fræ- og ávaxtabland. Keypt í superofurmegastore í Smáralind. Man aldrei hvað hún heitir þessi búð! Eðal fínt út á grauta eða sem nasl.

Hunangssafnið. Acacia hunang er sparihunang. Blómahunangið kaupi ég í Bónus, mjög bragðgott. Litlu dósirnar gaf mamma mér frá Akureyri og svo eru þarna í felum "Pollen". Á eftir að finna góð not fyrir þau! Mjög vond á bragðið, en sæt - ágæt út á grauta.

Rúslurnar mínar. Í annarri dollunni leynast þó þurrkaðar apríkósur.

Hnetur og hnetur. Möndlur og pistasíur í stóru ílátunum. Makademia hnetur, blandaðar "grauts" hnetur, kókos og rúsínur að trodda sér inn á myndina.

Fræ. Sólblómafræ, sesamfræ, fimm korna blanda, hörfræ, furuhnetur.

Múslíin mín. Hafrar, hafra og ávaxtamúslí, hnetu- og fræ múslí, Sólskynsmúslí, allBran... svo er yfirleitt til Weetabix, special K og Cheerios.

Gott að mylja út á graut og/eða skyr. Núh... eða bara sem nart.

Hnetusmjörin, smávægis lager. Stóra dollan innihélt heimatilbúið kanil og rúslu möndlusmjör, litla dollan geymir hreint möndlusmjör, hinar tvær aðkeyptar en góðar. Blandaðar hnetur. Boxið felur mulin hörfæ.

Þá er það upptalið í bili. Stundum er lagerinn stærri, stundum minni - en skápurinn er góður! Ójá, skápurinn er uppáhalds!

Þakklæti

Ég held að maður staldri aðeins of sjaldan við og hugsi vandlega um þá hluti sem gera sálina hoppandi hamingjusama! Hlutir, stórir og smáir, einstaklingar, sambönd, umhverfi - sem maður tekur annars sem sjálfsögðum hlut dags daglega. Sérstaklega núna, þegar svínaflensa og bullandi kreppa dansa trylltan stríðsdans fyrir framan nefið á fólki og gera grín.

Það er ansi margt sem ég er þakklát fyrir í lífinu og ég hef nákvæmlega ekkert til að kvarta yfir. Mér verður það hinsvegar alltaf deginum ljósara hversu dýrmæt fjölskyldan mín og vinir eru og hversu frábæru fólki ég virðist hafa náð að sanka að mér undanfarin ár.

Hinsvegar, þá er þessi bloggfærsla tileinkuð foreldrum mínum. Þau eiga hana alveg út af fyrir sig! Jú, ég ætla sko að vera væmin og nýta mér vefinn til að auglýsa vel og vandlega hversu meyr í hjartanu ég er á þessum annars ágæta sunnudegi! Frábærara fólk og betri foreldra er ekki hægt að hugsa sér. Óteljandi margt sem þau hafa fyrir okkur systur gert!

Þau eru, og hafa alltaf verið, til staðar þegar ungviðið (ég og systir mín) höfum veinað. Allt frá magakveisu upp í mjög dramatíska og hormónatengda ástarsorg. Þau hafa lifað af frekjuköst af öllum stærðum og gerðum, gelgjulæti, prófstress, árekstra, bílskutl, matarnasista og horsnýtt gluggatjöld! Okkur systrum hefur aldrei nokkurntíman vanhagað um neitt og allaf þegar ég stíg fæti inn í gúmmulaðihöllina fylgja því notalegheit og kósýness!

Þar af leiðandi ákvað ég að skella mér til þeirra í morgun og útbúa smá "American style" hádegismat. Þetta er nú hálf ómerkileg matarveisla, til vitnis, um hversu vel ég kann að meta þau, en lítið er meira en ekkert ekki satt? Næst verður það kvöldmatur af stærri gerðinni! Jæja, í boði voru amerískar heilhveiti pönnukökur, steikt egg...

... brokkolísalatið sívinsæla...

...svissaður laukur og sveppir, niðurskornir tómatar, steikt djúsí beikon, bakaðar baunir og vatnsmelóna.

Forréttarnasl var svo hnetumix frá því í gær ásamt nýju hnetumixi. Sætt, karrýristað hnetu- og fræbland! Kom skemmtilega út en ég er hrifnari af hnetum gærdagsins.

Í tilrauna eftirrétt, ef eftirrétt skal kalla, bjó ég til hálfgert flatbrauð úr afgangs pizzadeginu síðan á föstudaginn. Sætt flatbrauð. Innihaldsefni meðal annars bananar og döðlur. Kom ekkert smá vel út. Fullt hús stiga í mínum sætabrauðskladda. Ég set uppskriftina inn í vikunni.

Skál í botn fyrir besta foreldrasetti hérnamegin Alpafjalla og takk fyrir að vera til bæði tvö!

Prótein pönnukaka með banana og möndlusmjöri

Þar sem mín hreyfing felst aðallega í því að lyfta þá borða ég svolítið mikið af próteinríkum mat til að viðhalda vöðvavef og reyna að stækka hann. Ég vil taka það fram að það er ekki nauðsynlegt að borða próteinkyns, hvað þá 20 gr. + af próteini, með hverri einustu máltíð 'nema' þú sért í sömu pælingum, nú, eða þér þyki próteinríkur matur afskaplega bragðgóður. Það er að sjálfsögðu ágætt að fá sér nart úr hverjum fæðuflokki í öllum máltíðum dagsins en almáttugur, það er ekkert til að missa svefn yfir. Sérstaklega ef þú ert að spá í því að umturna matarræðinu.

Fyrir mér, persónulega, snýst þetta frekar um að borða hollan og góðan mat. Lítið unninn með eins fáum viðbættum aukaefnum og kostur er á. Eggjahvítur, hnetur, baunir, fræ, fiskur, kjúklingur, korn... og svo margt fleira eru góðir kostir þegar kemur að prótein hugleiðingum og bara það, að fá sér ferskt salat með t.d. hummus eða guacamole, baunum, quinoa og einhverri góðri dressingu er frábært í hádegismatinn. Það þarf ekki alltaf að vera kjúklingur, kjöt eða duft til að uppfylla einhvern próteinskammt!

Hinsvegar, þá er það mjög auðvelt fyrir mig að nota próteinduft því jú, það hentar, það er fljótlegt og mér þykir það ekki alslæmt. Þar af leiðandi bjó ég mér til prótein kanil pönnsu í gær sem ég tók svo með mér í vinnuna í dag. 'Prótein pönnukaka' því jú, eggjahvíturnar innihalda prótein ásamt duftinu.

Prótein pönnukaka með bananasneiðum og heimagerðu möndlusmjöri

1,5 dl eggjahvítur (um það bil 4 - 6), tappi vanilludropar, 1 msk próteinduft og slatti kanill hrært saman og gúmslað á pönnu þangað til reddí. Ég nota ekki meira prótein en þetta því ef ég set of mikið verður pönnsan eins og skósóli og ef ég nota ekkert þá er þetta barasta eggjakaka ... gullinn millivegur! Þeir sem ekki nota prótein gætu t.d. sett mulda hafra í staðinn eða búið sér til crepe!

Ég raðaði bananasneiðum á pönnukökuna, pínku múslí fyrir crunch og nokkrum rúslum og toppaði með 1 msk. heimagerðu möndlusmjöri!

Möndlusmjörið er geggjað! 300 gr. möndlur, 1 msk kanill og 1 msk hunangi blandað saman, ristað í ofni og hakkað í spað! Ótrúlega bragðgóður skammtur! Geri þetta pottþétt aftur. 

Pönnukökunni rúllaði ég svo upp. Miklu skemmtilegra að borða hana þannig!

Þegar pönnsunni er rúllað upp, með öllu namminu inní, þá kremjast bananasneiðar og múslí saman með hnetusmjörinu. Úghh það er svo syndsamlega gott að bíta í hnetusmjör og rúslur inn á milli!

Pönnukakan inniheldur um 130 hitaeiningar og 27 gr. af próteini. Með banana og hnetusmjöri skúbbast hitaeiningarnar upp í 320, um það bil, að viðbættum 20 gr. af kolvetnum úr banananum og hollri fitu úr möndlusmjörinu og eggjahvítunum. Geggjað! Ef þú vilt, þá er hægt að setja hafragraut inn í pönnsuna líka, svo banana og eitthvað meira gúmmulaði! Það er mjöög gott!

Þegar þetta er borðað er eins og maður sé að svindla! En hey, aldeilis ekki! Pönnukakan er bara samsett úr eggjahvítum og próteini! Svona veisla væri líka fullkomin sem viðbit í eftirmidaginn. Hita t.d. epli í örbylgju, strá yfir með kanil og raða á pönnsuna eða nota ber, ávexti, kotasælu.... mmmm!

Sykurlausar smákökur

Ég skundaði niður í Smáralind í hádegismatnum og rambaði á Super Megastore eða hvað þessi búð heitir nú aftur. Búð sem hefur að geyma nánast allt sem maður þarf ekki á að halda en verður að eiga! Plastílát, eitthvað sem ég virðist aldrei eiga nóg af, matvöru, eldhúsáhöld, dót... og allt á 200 krónur eitthvað slíkt.

Ég stakk nefinu að sjálfsögðu inn í búðina, rölti þar einn hring og rak augun í matvöruhilluna! Þar sá ég nokkra poka sem á stóð, stórum rauðum stöfum, "Sugar-Free". Ég að sjálfsögðu staldraði við, las betur og komst snarlega að því að pokarnir innihéldu smákökur.

Súkkulaðibita, hafra, hnetu. Allskonar. Eins og sannri efasemdadollu sæmir reif ég einn pakkann úr hillunni og byrjaði að leita að næringargildi gumsins. Jújú, enginn sykur 'skráður' en honum er skúbbað út fyrir efnið Maltitol. Maltitol er í stórum dráttum sykur-staðgengill, sætari en eiginlegur strásykur, inniheldur færri hitaeiningar og fer hægar út í blóðið - er þar af leiðandi hentugri fyrir sykursjúka.

Nú er ég enginn næringarfræðingur og get lítið tjáð mig um 'hollustu'gildi svona köku. Ég, persónulega, myndi ekki gúlla þessu í mig bara af því þær eru stimplaðar sykurlausar. Hver skammtur eru um það bil 4 - 6 kökur, fer eftir gerðinni og 100 hitaeiningar. Í hverjum skammti eru 5gr af fitu, 15gr kolvetni, 2gr prótein og svo 6gr af þessu Maltitol sætuefni.

Ég hef svosum séð það verra, ég segi það ekki. Þetta er líklega ágætis "Ég þarf svo mikið kex" bani eða til að bíta í eftir máltíð. Það er líka notuð Canola olía í kökurnar sem er góða gerðin af olíu. En ég er efasemdin uppmáluð, ef ég fæ mér smákökur eða kex þá er það yfirleitt eitthvað sem ég hef bakað sjálf og það virkar bara flott! Allt sem merkt er sykur- og fitulaust fær alltaf hornauga frá mér!

En jú, þær eru sykurlausar og án efa aðeins betri kostur en smákökur sem eru stútfullar af sykri - ef maður passar sig að éta ekki allan pokann í einu að sjálfsögðu!

Nýta tímann

Hvað þykir mér gott að gera þegar ég er að elda og/eða bjóða í mat?

1. Vinna mér inn tíma með því að: Skera niður grænmeti, ávexti, leggja á borð, búa til eftirrétt, dressingar, morgunmat - allt hlutir sem hægt er að gera t.d. kvöldið áður eða fyrr um daginn, fyrir t.d. matarboðið ,löngu áður en gestirnir koma. Geyma skorið grænmeti og ávexti í lokuðum ílátum inn í ísskáp. Muna bara að nota skynsemina - epli, bananar, mango verða brún. Sumt kál á það til að líjast... þið vitið hvað ég meina. Ég sker oft niður grænmeti kvöldið áður, hendi því í lokað ílát og inn í ísskáp. Kippi því svo út og beint inn í ofn þegar ég kem heim úr vinnunni.

2. Hvítir diskar gera matinn girnilegri að mínu mati. Þeir ganga með öllu og maturinn verður bjútifúl. Líka hægt að para saman litaða diska með svipað lituðum mat - en jú, þá þyrfti maður að eiga marga litaða diska.

3. Ekki vera hrædd(ur) við að prófa eitthvað nýtt! Mjög mikilvægt! Þú veist aldrei hvenær og hvort þú búir til eitthvað sem hreinlega.. virkar! Yfirleitt er verið að bjóða vinum og fjölskyldu í mat svo ef þú klikkar á einhverjum exotískum mango eftirrétt með hvítlauksbragði, þá er ekkert annað í stöðunni en að hlæja að því, hlaupa út í búð og kaupa smá ís. Ágætis saga í næsta matarboði!

4. Hugsa um þarfir gestanna. Ef fyrirséð er að borða úti, og við eigum heima á Íslandi, hafa til reiðu t.d. teppi nú eða hitasvepp ef þú átt einn slíkan.

5. Minnstu hlutir eins og fallegar sérvéttur bæta miklum glamúr í hvaða matarboð sem er.

Gott dæmi um nýtingu á tíma er næturgrauturinn góði... og góður var hann í morgun! Ég vakna 5:45, stekk framúr, gleypi í mig grautinn og hann er horfinn 5:47. Flott ef ég er að mæta í ræktina klukkan 07:00.

Þessi karamellukennda snilld innihélt 40 gr. uppáhalds múslí, puffed wheat, quinoa flögur, 1/2 skeið hreint prótein, kanil, múskat, vanilludropa og mjólkurdreitill. Í morgun hrærði ég svo skyri og hunangi saman við og toppaði krumsið með banana og kókos!

Nammi í skál!

Hunang og kanill - töfralyf?

Ég er ekki týpan til að falla fyrir töfralækningum eða trúa því sem ég les nema grjótharðar sannanir liggi að baki. Ég myndi því segja að ég væri efasemdamanneskja með sveigjanlegu íhugunar ívafi. Ég er því ekki líkleg til að smyrja á mig eggjarauðum og velta mér svo uppúr kanil, bara af því ég las að það myndi lækna kláðann í eyranu á mér! Fyrir utan þá staðreynd að ég kæmi til með að lykta eins og kleinuhringur! Sem er svosum ekkert slæmt...

Mér var bent á heimasíðu um daginn sem tiltekur hvað hunang og kanill, undir sama hatti, geta lagað og/eða betrumbætt hina og þessa kvilla, í réttum hlutföllum þó. Nokkuð magnað. Ekki slæmt að gúlla í sig þessari blöndu og læknast af öllum fjáranum. Uppþembu, krabbameini, lélegri húð, kvefi, hármissi, magaverkjum svo eitthvað sé nefnt. Lykilorðin voru þó að með þessu lækki maður kólesteról og léttist. Sem vakti að sjálfsögðu mína athygli. Drekka blöndu af kanil og hunangi rétt fyrir svefn og svo strax að morgni á tóman maga. Voila, allt betra og mittismálið skreppur saman! Hmmm...

Ég fór að sjálfsögðu að gramslast fyrir á netinu um þetta undur og fann fullt af greinum sem virtust vera sama greinin aftur og aftur ... og aftur. Það væri því fróðlegt að fá að vita hver það er sem kom þessu á blað til að byrja með og hvaðan hann fær þessar upplýsingar.

Kanill er hefur þó löngum verið talinn góður til að halda kvefi í skefjum, magaflensu og öðrum meltingartengdum vandamálum. Einnig hefur það víst verið rannsakað að ef kolvetnaríkur matur er kryddaður með kanil þá kemur hann til með að halda blóðsykrinum í skefjum að auki við þá staðreynd að kanill hefur reynst einstaklingum með sykursýki 2, vel við að bregðast við insúlíninu.

Hunang hefur hinsvegar verið notað í mörghundruð ár sem meðal til að lækna hina ýmsustu kvilla. Það þýðir þó ekki að nota sætað, mikið unnið hunang til þess að byrja að hlúa að sárum og leika lækni, heldur þarf hunangið helst að vera ónunnið svo öll ensím og andoxunarefni séu enn til staðar.

Kanill og hunang eru því ágætis afurðir út af fyrir sig og eiga kannski einhvern þátt í því að laga mein sem á okkur mannfólkið herja. Saman eða í sitthvoru lagi - maður veit ekki. Satt eða logið, ég sel það ekki dýrara en ég fann það á internetinu. Elsku besta internet! Dæmi því hver fyrir sig!

Eitt er þó víst að þú veist ekki neitt fyrr en þú hefur prófað sjálfur. Það er því spurning um að snara í sig smá hunangi og kanil af og til. Verra gæti það nú verið, ég meina það!! Þetta er eins og að gefa litlu barni nammi!

Hvort sem ég læknist af magakveisu eða léttist um 60 kíló, þá þykir mér nú einfaldlega best að nota hunang og kanil út á grautinn minn. Eða taka nýristaða, sjóðandi heita beyglu. Stökka að utan, mjúka að innan og smyrja á hana hunangi þannig að það leki ofan í brauðið. Dusta yfir þetta kanil og smá múslí og borða með bestu lyst. Einfalt, þægilegt... ómótstæðilega gott! Fæ mér stundum próteinsjeik og eitt stykki hunangs-kanil gúmmulaðibeyglu strax eftir æfingu, það er, á nammidögum að sjálfsögðu!

Ef einhver getur frætt mig meira um þessi mál, endilega láta í sér heyra! Þó sérstaklega einstaklingar sem hafa prófað og geta gefið ráð og óráð!

Matvörur sem gott er að eiga á lager

Ég er nú enginn sérfræðingur og ís-, búr- og frystiskápar, hillur, skúffur og hirslur eru jafn mismunandi hjá fólki og fólkið er nú margt. En það sem ég tel að nauðsynlegt þurfi að vera til í mínu eldhúsi, svo ég hafi nú alltaf úr einhverju að moða, hvort sem tími gefst til að hoppa út í búð eður ei, er eftirfarandi:

- Sinnep, Dijonsinnep þó helst. Bæði gróft og fínt.

- Gott edik. Epla- og vínedik til dæmis.

- Ólívuolía eða olía af einhverri sort.

- Smjör.

- Hvítlaukur, ferskt engifer, sítrónur.

- Sojasósa.

- Ólívur.

- Niðursuðuvörur: Túnfiskur, baunir, tómatar...

- Tómatkraftur.

- Hnetur, möndlur. Hnetumix.

- Þurrkaðir ávextir. Rúsínur, döðlur, gráfikjur.

- Ostur. Parmesan, sneiðar, rjómaostur, smurostur, Camembert...

- Hunang.

- Sólþurrkaðir tómatar. Í olíu eða ekki.

- Súputeningar, kraftur. Fiski-, kjöt- og grænmetis.

- Kartöflur. Ég á alltaf sætar kartöflur.

- Grænmeti og ávextir að sjálfsögðu. Sérstaklega bananar, epli og perur.

- Hrísgrjón eða annað grjónakyns eins og bygg, quinoa, bulgur.

- Þurrkað spaghetti, pasta, penne... Allt heilhveiti á mínum bæ, langsamlega bragðbest.

- Hafrar og múslí.

- Egg.

- Eplamauk.

- 100% hreint og náttúrulegt hnetusmjör.

- Fjöldan allan af kryddtegundum. Salt, pipar, kanill, chilli..

- Mjólk, létt AB-mjólk er alltaf til, skyr, kotasæla.

- Ger, lyftiduft, matarsódi.

- Bökunardót!! Hveiti, agave, 70% súkkulaði, kakóduft, sykur...

Allt annað er eitthvað sem hægt er að rassakastast út í búð eftir.

Annars var ég að klára undursamlega fína og góða skál af heimatilbúnum prótein ís - hvað annað? Létt AB-mjólk, undanrenna, kanill, vanilludropar, skvetta af agave, vanillu "fyrir svefn" prótein og smá dökkar súkkulaðispænir. Allir saman í ísvélina og viti menn! Ísinn var góður. Ég knúsa ísvélina mína á hverjum degi!

Ella (L)lama - heilræði dagsins

Einbeiting, vilji og staðfesta - hversu ákveðin(n) ertu þú í að ná markmiðinu þínu?

Ef þið sjáið fram á að mikið þrekvirki sé fyrir höndum, sama á hvaða sviði það er, þá er gott að setja sér lítil markið og taka einn dag í einu með réttu viðhorfi og bros á vör. Með því móti er auðveldara að skipuleggja hvar best sé að byrja og hvernig best sé að nýta tímann. Æfingin skapar meistarann og þó svo markmiðinu sé ekki náð, þá var þetta tiltekna markmið partur af mikið stærri mynd - þar af leiðandi verður "sjokkið" eða vonbrigðin ekki jafn sár borið saman við eitt allserjar - risamarkmið sem fellur um sjálft sig!

Ekki hætta - aldrei hætta, hvort sem ferlið sé á byrjunarstigi eða lengra komið! Hindranir eru hvatning!! Ef hindranir verða á veginum þá er töluvert skemmtilegra að breyta þeim í áskoranir og finna leiðir til að sigrast á þeim. Með því móti getur þú deilt reynslunni með öðrum og veist í leiðinni hvað þarf til að yfirstíga hólana og hæðirnar. Þá veist þú líka sjálf(ur) að einstaka dæld stoppar þig ekki í því að ná markmiðinu sem þú settir þér til að byrja með.

Er ekki betra að tækla hindranirnar heldur en að láta þær hrannast upp?

Ég hef tekist á við þetta og unnið feitan og djúsí sigur. Ég hef séð aðra takast á við annað eins og þú getur það svo sannarlega líka!

Margt smátt gerir eitt stórt strumparnir mínir!

Litlir sigrar eru sætir. Stórir sigrar eru gómsætir!

 

Svo þurfa allir að byrja að borða mangó! Það yndislega góður ávöxtur!