Hádegisfiskur og interval í eftirmiðdaginn

Þarf ég nokkuð að segja eitthvað meira?

Titillinn er svo assgoti lýsandi í þetta skiptið.

Hefði svosum getað skrifað "Safnar þú naflakuski?" þó svo það komi innihaldi pistilsins ekki á nokkurn hátt við og kæmi án efa einhverjum til að kúgast og gráta smá.

Svolítið kjánalegt ekki satt?

Eða hvað?

Hádegisfiskur og grasið góða.

 

Ristaðar furuhnetur.

Mig dreymir... ristaðar furuhnetur.

Interval eftir vinnu. Tek þennan hring hér.

Öxlin er samt eitthvað að pirra mig. Ekki alveg nógu smart. Ef hún fer í fýlu eftir æfingar dagsins verður hún sett í einangrun.

Kjánalegt að fara á æfingu ef öxlin er í fýlu ekki satt?

Eða hvað?

Endurtekin skrif gera ekkert gagn þegar titillinn er svona ægilega fínn, er það nokkuð?

Froðusnakk er ekki jákvætt snakk geri ég ráð fyrir.

Ok.. hætt.

Hibiscus iChiaskyrgrautur með hindberja-balsamic sýrópi

Ég er öll í morgunmatnum þessa dagana.

Sveik ykkur meðal annars um lasagna á sunnudaginn.

Svei þér Elín Helga Egilsdóttir... megir þú bíta í appelsínubörk rétt eftir tannburstun!

 

Jæja, nó komið af skömm og skælingu, vindum okkur að þessari snilld!!!

Ójá... ó... já!

Dásemd.

Dýrð.

Viltu sjá meira? Ókei...

...ég álasa þér ekki.

Gerðu svo vel!

Þetta smakkast jafn vel... og mér þykir það líta girnilega út!

Og mér þykir þetta líta mjög... girnilega út!

Ég er að borða þetta núna.

Ef það slettist grautur á skjáinn hjá þér bið ég þig um að afsaka.

Selbitaðu hann bara af.

 

Hibiscus yogi te. Það er rautt þema í dag!

Setja um það bil 20 gr. hafra í skál ásamt 1 msk chia.

Og hella tevatninu yfir.

Leyfum chiafræjunum að drekka nóg. Þau eru svo þyrst greyin.

Ahh, ákkúrat! Já takk.

Ég vil ekki lifa í heimi án Chiafæja. Ef, fyrir einhverja ónáttúrulega tilviljun, plantan sem framleiðir þessa litlu hamingjubolta þurrkast af yfirborði jarðar, þá vitið þið hvað þið þurfið að gera.

Bæta loks út í gumsið smá vanilludropum, kanil, salti, skyri og torani sýrópi. Allt eftir smekk.

Ekki sullusmekk þó.

Ætli ég hafi ekki notað um það bil 100 gr. skyr, 1 tappa vanilludropa, 2 tappa torani, örsalt og 100 tonn af kanil.

Rökhugsun mín er óbrigðul í kanilmálum.

HRÆRA!

Og blandið hefur tekið fölbleikan lit.

Alveg eins og litaspjaldið sagði til um.

Taka nokkur hindber og bæta þeim við dýrðina.

1 tsk mulin hörfræ.

HRÆRA!

 

Hindberja-balsamic sýróp

• Hindber... nema þú vijlir bláber, jarðaber, æðiber. En þá breytist væntanlega nafnið á sýrópinu. Þú gætir svosum haldið hinberjaþættinum í nafninu þrátt fyrir að berjategundin breytist. Það sem gerir þig glaða(n) er það sem blivar.
• Sletta balsamic edik
• Torani sýróp

Hvernig fer ég að?

Frosin ber í skál og sletta yfir smá balsamic ediki og torani sýrópi.

Henda inn í örbylgju með hrærustoppum þangað til nokkuð þykkt. Ég held ég hafi verið með þetta inni í 3 - 4 mín með stoppum.

Voila!

Aðeins nær.

Því í minni bók er þetta guðdómlega gleðilega önaðslegt og ég vill að þetta verði partur af lífi mínu... alltaf.

Bókin mín er einstaklega skemmtileg.

Ef vill þá er hægt að bæta út í þetta smá vatni og hunangi og sjóða vel niður. En þá myndi ég vera fensí og fín og malla þetta í potti... á hellu, eins og almennilegt fólk.

En ég er ekki almennilegt fólk.

Ég er latt fólk.

Örbylgjan er vinur minn. Ekki... hata örbylgjuna!

Sýrópinu hellt yfir grautarskyrchiakássuna...

...og meistaraverkið tekið út í myndum.

Þú veist þig langar í.

Ef þig langar ekki í, þá þarf ég því miður að tilkynna þér að það vantar í þig langarann.

Held þeir fáist í IKEA.

Svona nú. Take it all in!

Bara smá í viðbót... njóttu sem mest þú mátt.

Ok... komið gott.

Við viljum ekki eyða þessu upp með eintómu góni!

Borða takk!

Þó ég sé löngu byrjuð að borða. Þetta mall er aðeins of hratt að breyast í Þátíðarmall.

Amen.

Gott?

Er þetta gott?

Sýrópið verður að hálfgerðri karamellu eftir ísskápsveruna. Ótrúlegt en satt þá kemur te-ið með skemmtilegt eftirbragð, hélt það myndi ekki eiga sér stað sökum sýrunnar í skyrinu en Torani virðist gera skyrkraftaverk. Upp úr þurru bítur maður svo í súrt ber, sem hefur yfir nóttina orðið eitt með grautnum, og átvaglið ískrar af hamingju.

ÍÍÍSKR!

Takk fyrir mig.

Förum í sólbað!

Stórkostlegt þetta veður.

Dásamlegt.

Ég hefði ekki komist í gegnum þennan dag án þess að minnast á veðrið.

Æði!

Eftir að hafa gúllað í mig, minni eftir-æfingu karamellukenndu rís-próteinsamloku, hljóp ég út í bíl sökum láréttrar rigningar sem gerði það eitt að hitta beinustu leið upp í trýnið á mér, þó svo ég væri ég með höfuðið grafið ofan í bringu.

Furðulegt regn hér á Íslandi. Leitast við að hitta ákkúrat inn í eyrun, augun... beinir stórum dropunum beint ofan á hvirfilinn. Ófétið á henni.

Út úr testosterónsprengjunni, sem karl faðir minn notar sem sérlegan hestajeppa og gengur undir nafninu "All that is man" eða "ATM" eða hreinlega bara "Bankinn", reyndi ég að valhoppa og fleyta mér dömulega með vindhviðunum... kom í ljós að vindhviðurnar voru ekkert í fleirtölu heldur í einni stórri öldu af óstöðvandi vind frussi í bland við rigninu, fljúgandi laufblöð og einstaka fugl sem réði ekki neitt við neitt.

Alveg að komast inn í vinnuskjól hljóp ég sem fætur toguðu, með hárið stútfullt af hrati, fyrir hornið og við mér tók allsvaðalegt vindflóð, svo svaðalegt að ég stóð á öndinni, eins og litlu börnin, gapandi eins og fiskur. Í sömu andrá kemur enn önnur vindhviðan og bókstaflega vippar peysunni minni langleiðina upp fyrir ljósaperuna.

Þarna stóð ég með bumbuna svoleiðis skjanna hvíta, beinustu leið út í loftið, augun upp á gátt að reyna að ná andanum aftur. Gat litla björg bumbunni veitt. Hún var kviknakin greyið í góðar 15 sekúndur.

Afhýdd eins og um banana væri að ræða.

Meiri andskotans frekjan í þessu veðri!

Eins dásamlega unaðslega krúttaralegt og það er svo.. að sjálfsögðu. Stórkostlegt... fiðrildi!

Hádegismaturinn stóð fyrir sínu! Risa-grænmetisdiskur!

Smá feta...

...smá balsamic...

...smá kotó og hakk.

Eftirmatur var, meðal annars, fullkomlega vel þroskað döðluhræ.

Mjúk og karamellukennd.

Ein froða! Því froða er dásemdin einar!

Mmmmm...

Ásgeir minn kær í vinnunni vildi að sjálfsögðu ekki vera eftirbátur í myndamálum. Glæztur bollinn hans var því myndaður í leiðinni. Það er víst bannað að skilja útundan!

Síðasta eftirrétta-hádegisátið í dag!

Þrírétta eftirréttur takk!

Hneturnar mínar.

Dásamlega yndislega krúttaralega veðurblíða!

Spakmæli dagsins: Jákvætt viðhorf kemur ekki til með að leysa allan þinn vanda, en það gæti farið í taugarnar á nógu mörgum til að gera það fyrirhafnarinnar virði!

Hádegið í hnotskurn

Svona til að vega upp á móti öllum grautarpistlum þá kemur smá grænt og gleðilegt fyrir augað.

Kjúlli og leynigulrætur. Fékk mér líka ómyndaða brauðsneið með kotasælu.

Vil svo benda á þennan pistil hjá henni Röggu snilla.

Mín skoðun er þó sú að best sé að halda sínum "trúarskoðunum" fyrir sjálfan sig nema einhver spyrji.

Aldrei gott að predika óumbeðinn, sama á hvaða sviði það er.

Klippt og skorið... amk skorið

Intervalið í morgun var sveitt!

Ég þarf samt að herða mig í þessum æfingum. Þarf að vinna í því að stúta mér alveg svo ég standi á öndinni.

Þyrfti þar af leiðandi að redda mér önd!

Einum of notalega ljúf við við sjálfa mig. Stoppa hiklaust þegar ég verð of þreytt. Sérhlífin með eindæmum.

Sem er duló því ég get pínt mig óendanlega þegar ég er að lyfta.

Undursamlegt sítrónu iChiaskyr í morgunmatinn. Hrært í gærkveldi, ískápað og orðið fullkomlega áferðaglatt þegar að áti komi eftir æfingu. Dýrðin innihélt 100 gr. hreint hrært Kea, 1 tsk Ómægod3 lýsi, sítrónusafa, sítrónubörk, 2 tappa torani sykurlaust sýróp, 1 msk chia og 1 tsk mulin hörfræ. Suddalegur sóðmundur! Svo gott á bragðið og áferðið og átvaglið og hamingjan!

Hádó stendur fyrir sínu. Stórt feitt ofurgrænmetissalat ásamt Rip, Rap og Rup. Hlakka alltaf til að borða þetta í vinnunni. Glæpsamlegabrakandinýtt og ferskt grænmeti!

Svo er líka búið að skera gleðina niður fyrir mann! Svoleiðis dekrað við átvöglin hægri vinstri. Mikið skemmtilegra að borða niðurskorið grænmeti því maður getur gúmslað því saman í eina hrúgu. Borða grænmeti yfirleitt hreint og beint í heimahúsum því ég er letigrís fyrir utan þá óumflýjanlegu staðreynd að það.... að skera niður grænmeti, er um það bil drepleiðinlegasta athöfn sem átvaglið stundar!

Jú... og skipta um á rúminu!

En það kemur þessum pistli ekkert við.

Grænt hádegi

Allt sem er grænt grænt... og smá rautt!

Og einn fiskur.

Eftirréttur.

Takk fyrir mig!

(Er ég ekki að standa mig vel í smápistlagerðinni? Klæjar samt í fingurna mig langar svo að skrifa eitthvað meira sbr. þessi rulla sem er að verða til hérna... hún er samt ekki um neitt.)

EOL

Í grófum dráttum

Um það bil næstum því með allskonar tilfæringum og plássi fyrir breytingar og án fyrirvara skyndiákvarðana!

Ætla samt að reyna að koma æfingunum þannig fyrir að fjölbreytnin verði sem mest og jafnvel einhverjar vikur, taka einvörðungu lyftingaræfingar sem reyna á allan skrokkinn - alla vöðvahópa. Þá er ekki til neitt sem heitir fóta-/bak eða handadagur. Þá munu æfingar eins og hnébeygjur, réttstöðulyftur, framstig, armbeygjur, stiff, plankinn, push-press, upphífingar ofr. eiga hug minn allan.

Intervalið verður aldrei eins og fer eftir nennu undirritaðrar hverju sinni ásamt innskotum frá Stunukonunni.

Ef ég nenni ekki að lyfta einhverja vikuna - þá lyfti ég ekki rass, geri kannski bara interval í staðinn eða bootcamplegar ofuræfingar! Sem ég kem svosum til með að gera á interval/brennsludögum.

Voða frjálslegar næstu vikurnar, en gróft, klippt og ekki mjög skorið ætla ég að haga minni dagskrá svona.

• Mánudagar: Lyfta bak og brjóst
• Þriðjudagar: Interval
• Miðvikudagar: Lyfta lappaxlir
• Fimmtudagar: Interval
• Föstudagar: Lyfta bís og trís + létt SS brennsla
• Laugardagar: Fer eftir skapi og almennri hamingju. Kannski ég taki smá jóga hér? Ef ég er í stuði og ef skrokkurinn er sáttur, eina inverval-æfingu eða létta SS brennslu. Annars bara njóta lördagsins og jafnvel vesenast eitthvað í eldhúsinu! Alltaf hægt að baka eitthvað!
• Sunnudagar:  Liggja upp í sófa og bora í naflann á mér!

Samkvæmt ofangreindu plani tók ég skóflurnar fyrir í morgun. iKHG (Ískáps-KaffiHvítuGrautur) étinn um 6 leitið, æfing 7:30 og beint heim í... jebb... PRÓTEIN-NÚÐLUR! Peeerrrralega gott. Kem með mynd eftir súperlyftingar næsta mánudags! Núðludýrðina kem ég til með að éta oftar en einusinni, tvisvar og þrisvar. Svo mikið er fullvitað og alveg víst.

Æfing morgunsins hefur þó skilað árangri.

Hvernig veit ég það?

Jú... puttanir á mér hlíða ekki taugaboðum frá heilanum. Þeir eru allskostar ósáttir, standa út í loftið og láta illa þegar ég reyni að hamra á lyklaborðið. Gripið myndi ulla á mig ef það væri með tungu!

Svo hitti ég hana Röggu í ræktinni í morges! Mikið assgoti lítur hún ógeðslega vel út manneskjan! Djísús! Ég þarf að byrja aftur á fullu í lyftingum + gríðarlegu áti, Bootcampið skildi mig eftir eilítið rýrari en í byrjun sumars. Verð vonandi fljót að koma mér í sama gírinn aftur!

Hádegismaturinn samanstóð svo af eftirfarandi hamingju!

Njótið lífsins og dagsins mín kæru - það þarf að vinna upp alla vonskuna sem fingurnir á mér eru að dæla út í heiminn!!

Smáfærsla

Hádó - numero 3

Þetta ku vera pestókjúlli, gras og 6 tonn af avocado.

 

Kaffó - numero 4

Ávextirnir búnir, ekkert grænmeti + kotasæla til á hrökkbrauð.

Ég græt!

Og brosi!

Hver veit nema við sjáumst barasta aftur á eftir? Í kvöldmat? Hver veit?

Jahérna!

Afmæli á afmæli ofan

Kampus búinn í dag. Morgunkampus og það var helvíti fínt bara. Afsakið óviðeigandi orðbragð.

Áttum m.a. að gera hangandi maga-"þurrkur". Lyfta samanlímdum fótleggjum upp í átt að hægri hendi/vinstri hendi til skiptis. Þarna hékk ég eins og óeldað beikon og hristist í mínútu þangað til ég gafst upp. Það var stórkostleg sjón! Beikonmagann þarf því að mastera!

Held svo að ég sé að gera einhvern fjárann vitlaust í uppsitum. Fyrir utan þá óbilandi staðreynd að situ-ups á malbiki er ekki góð hugmynd. Ég stefni þó á svöðusár næst. Held það sé ágætist markmið!

Og júvíst! Ég má alveg kalla á vælubílinn einstaka sinnum.

Amman átti afmæli í gær. Við nettengdum gamla heksið. Nú verður hún óstöðvandi í internet rápi og almennum njósnum um fjölskyldumeðlimi, grútspillta pólitíkusa og nærbuxurnar hennar Pamelu Anderson. Sé hana í anda fyrsta með fréttirrnar, sama úr hvaða áttum þær koma.

Hádegismatur!

Svengdin var næstum búin að ganga af átvaglinu dauðu í morgun. Get svoleiðis gvöðsvarið fyrir það. Með herkjum tókst búknum að skríða áleiðis í átt að eldhúsinu. Augun tárvot, neðrivörin titrandi. Hurðina inn í mötuneyti sá ég í hyllingum. Sem betur fer, nærstöddum til mikils happs, og sjálfri mér til lífs, rakst ég á einmana rúsínu á gólfinu. Á henni var nokkuð af kuski og eitt hár en ég lét það ekki stoppa mig. Át hana í snatri. Blessunin gaf mér orku í síðustu skriðurnar og kraft til að setja nokkra matarbita á diskinn minn.

Hungrið var slíkt að þegar ég tók fyrsta bitann þá titraði Skóflan.

Skóflan verandi hægri handleggurinn eins og hann leggur sig. Handleggurinn sem skóflar jú mat upp í svartholið. Bókstaflega... skóflar! Aðfarirnar eru stundum svo mikilfenglegar að undirrituð þarf, hið minnsta, radíus upp á 5 metra til að geta notið átsins og að allir meðétarar séu óhulltir og enn með a.m.k. annað augað óskaddað. 

Móðir mín kær á svo afmæli í dag. Í tilefni þess... you know it.

ARGENTÍNA... STEIKHÚS... 19:00.... MUUUUUUUU!!!!

Meeeeeeen! Ég finn bragðið af steikinni. Bara að hugsa um fyrsta bitann eykur munnvatnsframleiðslu um 26%. Líka hjá fólki í kringum mig og ég hef ekki minnst orði á þetta! Næstum!

*tilhlökkunartryllingsvillimannaspenningur* með rjóma.

Ég sé dýrðina fyrir mér:

Átvaglið: "Nei takk... ekki elda hana neitt. Skelltu henni bara á diskinn. Kannski flott ef þú ættir smá dijon sinnep? Eða... nei annars. Komdu bara með ketið... beint af kúnni. Ég þarf engin hnífapör!"

Power Shot

Þessi hattífatti kom í heimsókn til mín í morgun. Takið eftir hvað hún lævís á svip!

Þetta er svo það sem hún færði mér.

Sjá upplýsingar um skotið hér!

Eina sem ég ætla að varpa ljósi á er að þetta er unnið úr einu jurtinni sem lifði af Hiroshima. Ætli það sé sniðugt að gúlla eftirlifandi Hiroshima jurtum í sig?

Eitt skot. Með röööri. Á að veita manni auka "boozt" þegar systemið er þreytt og lúið.

Óguðminn góður...

guð... minn... góður...

"Og þú kallar þig frænku mína!!!"

Eins og að drekka nýkreyst vatn úr gömlum ullasokkum... sem vafnir hafa verið utan um loðtær af sveittum karli, ofan í heitum... rökum... stígvélum, í hestaferð.

Og nei, ég hef ekkert á móti sveittum hestaköllum með loðtær... ég vil bara ekki sleikja sokkana þeirra!

Hef ekki misboðið aumingjans bragðlaukunum svona hræðilega í langan tíma. Veit ekki hvort þeir komi til með að gleyma þessu í bráð. Fyrirgefning er ekki sjáanleg handan við hornið.

Grátandi bragðlaukur: "Eftir allt sem við höfum fyrir þig gert. Jæja ljúfan... þú baðst um þetta... manstu hvernig bláber bragðast Elín... ha... manstu það? Við mælumst til þess að þú munir það mjög vel... höfum ákveðið að taka það bragð úr umferð í smá tíma!".

Enda kláraði ég ekki alveg.

Fiskur og grænmeti í hádó, ávextir í eftirrétt. Eintóm gleði - rúmum klukkutíma eftir lopasopann. Ég er hvorki hressari, sprækari eða meira til í að hlaupa 42 kílómetra en í gær.

Held ég láti mér nægja skvettu af köldu vatni í trýnið og einn Ásbúðarhring þegar letipúkinn kíkir í heimsókn. Jafnvel góðan blund.

Táfýlubragðið situr enn aftast á tungunni og heilinn er í óða önn að forrita þessa skítafýlu inn á vonda listann!