Spurningum svarað

Kannski kjánaleg spurning, en ertu ekkert hrædd við að "fitna" aftur eða detta í sama farið?

Enganvegin kjánaleg spurning og á fullkominn rétt á sér!

Alltaf aftast í kollinum. Ruslakistan blessuð ásækir heilabúið og vitundina eins og skugginn og stundum fæ ég "Hóólí hell það er að koma aftur - best að brenna" tilfinninguna í heiladingulinn. Reyni þó eftir bestu að halda barasta ró minni og anda í bréfpoka eða einbeita mér að því að fyrirlíta tær almennt.

Eins og ég hef þó sagt, ég var kannski ekki í alslæmum málum fyrir, og ég vil meina að ég hafi náð að grípa í rassinn á Nóakropps-líferninu í fyrra laginu, en jú, þetta er alltaf aftast í kollinum. Ég er líka ein af þeim sem bókstaflega "má ekki" borða allt sem fyrir augum ber því ég bæti mjög hratt á mig auka mör og hamingju.

Systir mín sem dæmi, er slanga af guðs náð. Hún getur borðað hvaða hroðbjóð sem er án þess svo mikið sem blása úr nös eða... blása út. Ef ég gerði slíkt hið sama, án þess að hreyfa mig, þá kæmi ég til með að "stækka" heldur hratt :)

Ég er hið minnsta ein af þeim sem virkilega þarf að hafa fyrir því að halda mér á góðu róli, veit líka af því og er því nokkuð hress með að hafa náð á þennan stað sem ég er í dag, þó sérstaklega hvað t.d. matarræði varðar. Er búin að halda mér á þessum stað í rúmt ár.

Nú veist þú hvernig þú átt að "hegða" þér, hvað er rétt og hvað er rangt. Gerir þú einhverntíman eitthvað sem ekki myndi teljast "rétt"?

Gott dæmi er t.d. eftir ofurát. Massíft ofurát, þá helst þessi sem eru "óplönuð". Þó svo ég viti að það geri í sjálfu sér lítið gagn að drattast á brettinu/stigavélinni, 40 mín á dag næstu 2 vikurnar, þá langar mig óstjórnlega að láta það eftir mér. Líka það, að éta á sig gat einn daginn, og borða samt 6 máltíðir daginn eftir. Á það alveg til að hugsa "nei andskotinn, ég át um það bil 8000 kaloríur í gær, reynum að slaka á í dag".

Í svona tilfellum er ágætt að slökkva bara á heilanum og fara eftir plani. Jújú, ég hef alveg tekið brennslupakkann á þetta eftir að ég "sá ljósið", get ekki neitað því. Er þó yfirleitt snögg að snúa mig út úr því og halda venjulegu rútínunni áfram. En það tók smá tíma, viðurkenni það líka, að láta undan því sem í raun er "rétt" fyrir því sem þú telur að sé betra. :)

Einhver hreyfing mín kæru er samt betri en engin! Ég er alls... ekki... að setja út á það!

Þykja þér einhverjar æfingar leiðinlegar, eða leiðinlegri en aðrar?

Ein leiðinlegasta æfing sem ég geri er dauðaganga/framstig. Ég fæ grænar, gubba pínkulítið upp í mig og upplifi almenn, allsherjar ömurlegheit og satan.

1. Satt - allt sem er "erfitt" er "leiðinlegt" og farmstig/uppstig/dauðaganga er svo sannarlega erfitt með tilheyrandi blóðbragði í hálsinn ef vel er á því tekið.
2. Þegar ANNAR fóturinn er búinn, þá er HINN eftir. Tvöfalt... tvöfaldur tími. Ughh! *dauði**leti**sjálfsvorkunn*

En manni líður alltaf jafn ógeðslega vel þegar þetta er yfirstaðið! Sérstaklega þegar rass-sperrurnar daginn eftir byrja að pína þig.

Rass... kúlurass!

Er gaman að eiga Aspas?

Um tvo bíla að velja. Svartan og Aspasinn.

• Pabbúla: Jæja, svipaðir bílar, hvort viltu?
• Átvaglið: Grænan
• Pabbúla: Elín?
• Átvaglið: Grænan.
• Pabbúla: Elín, í alvöru..
• Elín: Grænan.
• Pabbúla: Þið eigið hvort annað skilið.

Vigtar þú þig reglulega, mælir og tekur fitu %?

Ég stíg á vigt kannski 1 - 2 í mánuði fyrir forvitnisskir. Hef ekki ummáls mælt mig í hálft ár eða tekið stöðu á % tölunni minni. Núna er ég svolítið að spila hreyfinguna mína eftir eyranu. Hef sett mér nokkur markmið í formi æfinga, ekki endilega að komast niður fyrir x kíló/ fitu%. Ef buxurnar fara að þrengjast óeðlilega mikið þá borða ég aðeins "minna". Ef þær víkka óeðlilega mikið þá borða ég meira. Það er, ef ég er eitthvað hvumpin í eigin skinni.

Langar helst að ná markmiðunum mínum fyrir næstu jól og halda jafnt og þétt áfram. Líður vel í eigin leðri þessa stundina og ætla mér að viðhalda því formi sem ég er í, og þá er ég ekki endilega að meira "útlits" formi.

Markmiðin eru meðal annars:

• 10 dauðar upphífur
• 15 hnébeygjur á einari, á báðum
• 5 armbeygjur á einari, á báðum
• 20 fullkomnar barbell complex með 25kg, samfleytt
• 20 fullkomnar concept róðravéla maga/bak æfingar
• 30 fullkomnir froskar með hoppi, samfleytt
• 100 armbeygjur

Hefurðu alltaf verið íþrótta álfur? Varstu mikið í íþróttum sem krakki?

Aldrei!

Eða... kannski ekki aldrei. Var í jazzballet í nokkur ár. Annað en það ekki neitt. Hef aldrei verið neitt sérstakleg íþróttalega sinnuð og hélt í alvöru talað að ég myndi aldrei verða það. Ein af þeim sem fékk alltaf 7 eða minna í íþróttum...

...þangað til þeir ákvaðu að breyta þessu blessaðir og gefa einkunn eftir mætingu, ekki eftir því hver gæti kastað bolta, úr 5 metra fjarlægð, á milli tveggja stanga sem voru 20 cm. frá hvor annarri!

Nei... ég er ekkert bitur.

Kom svo sannarlega annað á daginn :)

Datt ekki í hug að ég myndi nokkurntíman ná því að taka svo mikið sem eina armbeygju eða hlaupa samfleytt í 30 mín. Ná því í raun að massa mig upp, antilópast, tónast, mjókkast, matarræðast, vakna klukkan 6 til að ræktast... ast ast... bara... hvað sem er. Þetta er því mikill sigur og geypilegt afrek að mínu mati í mínum eigin íþróttaálfs kladda.

Stórgott.

Áttu "feituföt"? Þú veist. Föt sem þú átt á legar ef ske kynni að þú ætir pizzu í öll mál í heilan mánuð? Varaföt?

Vildi óska að ég gæti sagt nei. En ég get það ekki.

Ójá. Ég á feitubuxur.

Gerði samt nokkuð magnað um daginn og gaf öll "feitufötin" mín. Það tók á. Ég segi það satt. Föt í dag eru fok-andsk. dýr og ef ég þarf að fara að byrgja mig upp af nýjum flíkum sökum ofáts þá eru mér allar bjargir bannaðar.

Ég "neyðist" því til að halda mig á beinu brautinni! Svona... þannig ;)

Jú, ég á því EITT SETT (hoho, eitt sett) af varaflíkum ef ske kynni að alheilagur pizzaandinn smokraði sér inn í systemið og æpti "SVEPP OG PEPP OG XTRA OST" endurtekið!

Hvað er uppáhalds svindlið þitt?

Óguð. Stress. Hvernig er hægt að velja?

Stress stress stress!

EN því subbulegra, því betra, og subbulegt í minni bók er allt sem er sveitt!

Pönnsur, kökur, jólaönd, eplakrums, nautasteik - allt gott og blessað en í subbulegum ítroðslu-svindl-dögum er ekkert sem blivar nema "quick and dirty" og pönnsur eru dæmi um eitthvað sem skal njóóta.

ÞANNIG AÐ

Matarkyns:

• KOLVETNI OG BRÁÐINN OSTUR - deadly duo. Svindlblætið mitt.

Eiginlega sama í hvaða formi þetta tvennt er. Ostur og kolvetni er bara combó sem getur ekki klikkað í minni bók og bráðinn ostur gott fólk... dont even go there!

• Bolognese með miiikið af osti ofaná.
• Lasagna!
• KARTÖFLUGRATÍN!! óguð... ég dey!
• Doritos kjúklingur 
• Sveitt, djúsí ostapasta með hvítlauksbrauði á kanntinum!
• Pizza, pizza, pizza og pizza.
• Ostafondú!
• Risastór BLT samloka, ristuð, með beikoni/eggi/camembert (og mikið af honum).
• Panini!!!
• Bráðinn Camembert með sultu/hunangi á milli og valhnetum + ritz!
• Doritos með ostasósu. Bíó-Doritos! Láta flögurnar liggja í ostasósunni svo þær verði mjúkar og ógeðslegar og löðrandi í ógleðinni! Oghhh!
• Risastór nachoskammtur stútfullur af sósudrulli og bráðnum osti ofaná.

Nammikyns:

• Nóakropp/Nóapopp = súkkulaði, knús og kram
• Fylltar appololakkrísreimar
• Ís - rjómi - vanilla vanilla vanilla
• Eitthvað sem inniheldur karamellu, rjómakennt vanillublandað saltbragð og hamingja
• Hunangsristaðar, sykurhúðaðar, súkkulaðihúðaðar, hvernig sem er hnetur

 

Er með nokkrar svona spurningar á lager og kem til með að pósta í og með, með leyfi sendanda að sjálfsögðu. Gaman að þessu

Glæný 40 ára panna

Sjáið hvað hún er geggjaðslega fín!

Svona gersemi er ekkert nema gleðin einar að hafa til taks í sínu sérlega eldhúsi.

Amma mín átti hana!

Pönnsur eru fyrirsjáanlegar í nánustu framtíð! Mikið... af pönnsum!

 

Skotbolti með vinnunni á morgun. Lasagna og smá spælingar í bland.

En núna - kerti, leti, Juno.

Ahh!

31.12.2010

Heilt ár...

...og þrír dagar! Hmm hmm!

Hey, betra seint en aldrei. Stundum. Yfirleitt.

Sérstaklega þegar það kemur ekki að sök! Nei, ég er ekki með neinar afsakanir á nýárinu! Við, hreyfigúbbar og lífstílsbreytarar, komum aldrei með afsakanir fyrir nokkrum sköpuðum hlut. Við ákveðum, framkvæmum og viðhöldum!

Nema einstaka bloggskrifum og áramótapistlum... sökum leti... ég meina fingra-frís. Ég þarf að hlaða puttana fyrir næstu 362 daga.

Ég trúi þessu samt varla.

Mikið svakalega er tíminn fljótur að líða.

Í anda pistils síðasta árs tek ég mig til og rita þennan upp í svipuðum stíl. Stikla á assgoti stóru þó.

Þegar þú heldur að árið hafi verið tiltölulega óviðburðaríkt, þannig lagað, kemur annað á daginn. Ekki það að ég hafi fjárfest í villu út á Ítalíu, farið til Borneo og keypt mér ástralskan kóala fyrir gæludýr. Ekki það að ég hafi leyst NP vandamálið. Ekki það að ég hafi uppgötvað nýja köngulóategund og fundið nýtt frumefni. Ekki það að ég hafi átt í dularfullum ástarsamböndum við heimsfræga menn.

Athugið, ástarsamböndum... í fleirtölu! Ég nefni engin nöfn...

...*hóst* Josh Hartnett *hóst* Gerard Butler *hóst* Alexander Skarsgard *hóst*

...

Hvað?

Ekki það að maður þurfi að tiltaka alla smá-atburði sem áttu sér stað til að fylla upp í, eins og eftirréttir gera, til að blekkja sjálfið og halda að óviðburðarríkt ár hafi verið með öllu geypilega viðburðarríkt og regnbogar.

Alls ekki.

Gott ár er þó að baki ljúfust. Erfitt ár. Öðruvísi... ár. Nokkrum tímabilum í mínu lífi lauk, önnur tóku við. Hugarfarsbreytingar á mismunandi sviðum í bland við margar nýjar áskoranir. Sumar tæklaðar, aðrar ekki.

Eins og gengur og gerist.

Flutti aftur í Gúmmulaðihöllina eftir fjögur ár að heiman. Það var nokkuð skrautlegt. Eitt tímabil leið undir lok í byrjun árs. Kvaddi Gúmmulaðihellinn og sálirnar mínar þrjár sem áttu þar, og eiga, heima.

Pabbinn minn kær, sjómaður, eðalmenni og gleðibomba, var heima á afmælisdaginn minn! Það, elsku besta fólk, er sjaldséð. Sjaldgæft og sjaldheyrt!

1. Þegar ég fæddist.
2. Þegar ég var 13 ára.
3. Þegar ég varð 26 ára. 

Ég tók mynd því til sönnunar!

Hlammaðist á síður Séð og heyrt sem "Hafragrautarhetjan" og í kjölfar þess í útvarpsviðtal á Kananum þar sem Geir Ólafs tók fyrir mig lagið.

KONAN SEM Á 100 MYNDIR AF HAAAFRAGRAUUUUT!!!

"Hún situr í ruggustól út á palli vopnuð riffli og myndavél, sem hangir kæruleysislega um háls hennar. Þrýstir í táberg hægri fótar til að nýta allt sem stóllinn hefur upp á að bjóða. Vindhviða hrífur með sér skrjáfandi, gul og rauð, fallin laufblöð, haustboða, sem hringsnúast og dansa við fætur hennar. Með grautarskál í hægri hendi, og rifillinn í þeirri vinstri, stendur hún upp úr ruggustólnum sem brakar eilítið í, leggur grautarskálina varlega frá sér á gamalt, veðrað, borð sem á er fallegt pottablóm. Riffilinn leggur hún upp við bíslagið og grípur í myndavélina. Grauturinn í forgrunni, pottablómið í baksýn, vélin munduð. Allt eins og það á að vera. Hún gerir sig tilbúna til að mynda máltíðina. Annað augað í pung, hægra munnvik eilítið opið þannig rétt glitti í augntönnina. Með vísifingur hægri handar í viðbragðsstöðu, og öll skilningarvit í fyrsta gír, þrýstir hún létt á hnappinn og bíður eftir því að myndavélin nái fókus. Vélin gefur lokst til kynna að nú sé hún tilbúin, gefur frá sér nett "píp" og á sömu sekúndu þrýstir konan hnappinum alveg niður, varlega þó. Hljóðlátur, hlédrægur en ákveðinn, smellur gefur til kynna að morgunverðurinn hafi verið festur á filmu og tími sé kominn til að setjast niður og njóta þess að borða meistaraverkið!"

Kveðja, The Crazy Oatmeal Lady

Beyglurnar mínar gáfu upp öndina.

Hef ekki litið til baka, við höldum ekki framhjá bestu beyglunum. Hef þar af leiðandi uppskorið tefflon fingur. Get stungið hendinni inn í 200°C heitan ofn án þess að finna fyrir því, tek sjóðheitar smákökur upp með fingrunum án þess að fipast.

Ég held þetta sé vottur af ofurhetju-eiginleika.

Ofurhetjueiginleikinn minn er þó óumdeilanlega sá að geta útbúið hafragraut úr hverju sem er! Eins og James Bond getur útbúið sprengju úr límbandi og nagla!

Prófaði Ultraone.

Tvö orð "Sparaðu peninginn".

Ég heimsótti Euan vin minn til Ástralíu. Eðaleintak og ofurkokk með meiru.

Vinur minn til 11 ára hvorki meira né minna.

Ég fór... til Ástralíu! Ég trúi því ekki. Trúi heldur ekki að það séu 7 mánuðir síðan. Hvert fór þetta ár eiginlega??

Þetta var æðisleg ferð með meiru.

Í Ástralíu fór ég líka í þyrlu. Fyrsta skipti!!

Hef ALLTAF... alltaf alltaf viljað fara í þyrlu!

Það var geggjað!

Varð vitni að flottustu sólar-lögum hér á Íslandinu sem ég hef... jah, orðið vitni að í langan tíma, núna í sumar.

Hélt áfram að misþyrma aumingja eyrunum mínum.

Hægra eyrað er nú öllu götóttara en það vinstra.

Fór í Bútkampfh og tæklaði það ágætlega.

Setti mér nokkur markmið og náði þeim.

Það var andskoti gleðilegt fyrir antilópumóralinn.

Ekki jafn gleðilegt fyrir bakið á mér!

Eyddi dágóðum tíma í uppáhaldshorninu mínu í sumar.

Eyddi líka dágóðum tíma í hengirúmi.

Sumarið var yndislegt.

 

Uppgötvaði fimm ný "brögð" á árinu! Ekki brögð í tafli þó... hohohoo!!

Guð minn góður hvað ég er ógeðslega fyndin svona í byrjun 2011!!! Hlakkið þið ekki til ef þessi gígantíska kómík heldur svona áfram?

Alltaf jafn skemmtilegt að ná því að koma bragðlaukunum á óvart. Brögðin fimm eru:

*trommusláttur*

1. Kaffi - HÚRRA
2. Gráðost - HÚRRA
3. Ostrur - ekkert til að hrópa húrra yfir
4. Sellerí - HÚRRA
5. Torani - HÚRRA

Magnað að ég hafi virkilega byrjað að drekka kaffi!!!

Magnaðra að ég hafi smakkað kaffi áður og ekki fundist það frábært!

Magnaðast að ég hafi í raun ekki uppgötvað kaffi fyrr!

Ég uppgötvaði þennan eðal elexír svo svaðalega að ég setti hann meira að segja út í grautinn minn!

Kynntist Stunu.

Keypti mér Buddhaskálar!

Ég elska, elska þessar skálar!

Keypti mér uppáhalds - át - áhald.

Keypti mér herra Gymboss sem orðinn er geypilegur partur af æfingaprógramminu mínu.

Líka kökubakstri!

Eignaðist lítinn frænda og varð í kjölfarið "THE GODMOTHER"! :)

My little peanut!

Uppgötvaði enn um sinn í milljónasta skipti hvað ég er partur af yndislegum hópi af frábæru fólki.

Fékk heimsókn frá Ástralíu.

Reyndi meðal annars að éta heimsækjarann.

Náði að hífa mig upp!

Náði að taka hnébeygju á einari!

Uppgötvaði Chia fræ í Ástralíu.

Uppgötvaði chia fræ á Íslandi.

Og my oh my... ég nýtti mér fundinn svo sannarlega.

Flutti mig um set í vinnunni. 

Flutti í Hafnafjörðinn!

Fyrsta skipti sem Átvaglið á heima eitt og sér! Fyrsta skipti sem kvendið getur talist Hafnfirskt.

Keypti mér aspas!

Fyrsta skipti sem Átvaglið kaupir sér aspas!

Rakst á grautarlíf mitt hangandi upp á vegg! Það var nokkuð magnað... og dramatískt.

Var gestakokkur í vinnunni við góðar undirtektir vinnuétara!

"Elín... ótrúlegt!! Þú kannt í raun að útbúa mat, ekki bara taka mynd af honum!!!"

Útbjó ofurþorskréttinn Hachala. Arabískur... eða... segist vera arabískur að uppruna.

Skrifaði smá fyrir Heilsupressuna.

Ég sá líka stærsta stjörnuhrap sem ég hef nokkurntíman séð, núna í desember. Hef séð þau mörg ansi mögnuð en þetta var lyginni líkast. Held það hafi staðið yfir í góðar 10 sekúndur áður en það brann upp með tilheyrandi ljósasýningu, eldhnetti og bláu skotti. Varð eiginlega hálft létt þegar ég sá hlunkinn hverfa!

Ég sá líka ANNAN ASPAS! Alveg eins og minn Aspas! Ætlaði að hoppa út og taka af honum mynd en gugnaði á því. Skemmtilega við þann fund var að þegar undirrituð og bílstjóri hins Aspassins gripu athygli hvors annars tók við stórkostleg gleðisprengja, hamingjutryllingur og vink! Hahh!! Hefði það gerst ef þetta hefðu verið tveir silfurlitaðir Golf??

Nei... ég held nú ekki!

Ég hef líka kynnst mikið af frábæru fólki á þessu ári. Eignast nýja vini, kunningja. Það er alltaf jafn gaman að geta skráð nýtt, mjög gott fólk, á góðufólkalistann. Þykir líka alltaf jafn æðislegt að rekast á einstaklinga sem einhvernveginn smellpassa eins og þurrkarabuxur við rass.

Ég vil þó meina að ég hafi lært töluvert mikið um lífið- og tilveruna, alheiminn og alltsaman á því herrans ári 2010.

Mikið sem ég elska "Hitchhikers guide".

Lært mikið inn á sjálfa mig, bæði á andlega og líkmalega sviðinu. Fengið nokkur spörk í rassinn, gefið nokkur spörk í aðra rassa, þegið aðstoð, veitt aðstoð, hugsað um sjálfa mig, hugsað um aðra, lagst undir feld, ofaná feld og farið í feld.

Við mikinn fögnuð grínpís!

Nei ókei, fór samt ekki í feld... í eiginlegum skilningi þessarar setningar.

Þið þekkið þetta. Líklegast samskonar hjá öllum.

Þó svo ég deili mikið af sjálfri mér á þessum vettvangi þá er nokkuð margt sem ég læt ósagt. Margt hefur gerst bak við tjöldin sem ég, og mínir nánustu, höfum bak við eyru og nasavængi.

Get þó sagt að nokkuð magnaðir atburðir hafa átt sér stað á þessu ári sem ég bjóst ekki við og árið 2011 verður forvitnilegt með eindæmum. Mjög... forvitnilegt

Ég hlakka til.

Þetta var all svaðalegt át-ár, mikið tilrauna-ræktarár og gleðilegt með eindæmum.

Takk fyrir samfylgdina 2010 elsku besta fólkið mitt. Þið eruð eðall í rafrænu formi! Stefnum á hitting 2011. Þó það sé ekki nema bara yfir kaffibolla...

...því jú, núna er ég byrjuð að drekka kaffi!

Fyrir, eftir, á meðan og núna

Jæja, þá er þetta loksins komið heim og saman. Eftir mikla leit, graf og krafs.

Já, hér eru bumbumyndir og fleira í þeim dúr. Verið góð við mig!

Samt magnað hvað það getur verið ömurlega flókið að finna almennilegar myndir for helvede.

Get svosum ekki sagt að ég hafi einhverntíman verið í "hræðilegum" málum hvað holdarfar varðar. Sitt sýnist hverjum í þeim efnum. En í hræðileg mál var ég komin með þol, styrk og úthald almennt. Fékk töluvert spark í rassgatið þegar ég ætlaði mér að hjóla upp eina auma brekku, í fyrsta gír, móð og másandi eins og sprungin belja. Búkhljóðin svo svaðaleg að fólk var komið út í glugga til að athuga hvaðan harmakveinið barst.

Mér brást allur máttur þegar frammúr mér arkaði 134 ára gamall maður, gangandi við staf.

Það viljum við ekki lömbin mín. Ekki þegar þið eruð rétt að skríða í 21 ár.

Unglingsárin einkenndust af auraskorti, nammiáti, nóakroppi og kókdósum í bland við prófalestur og allt "heilafóðrið" sem honum fylgdi. Heilafóður sem fóðraði töluvert margt annað og meira en bara heilann skal ég ykkur segja... ójá.. svona er ég nú klár.

Þar af leiðandi er undirrituð hér í öllum formum, myndum, aðstæðum, stærðum og gerðum frá árinu 2004.

Spánn 2004.

Kvendið nýskriðin í 20 ár.

*kútsí kútsí kútsí kútsí*

Spánn 2005.

Bleiktoppa 21 árs, aðeins búin að skafa af belgnum á mér. Þarna var ég, í fyrsta skipti, nýbúin að vera í einkaþjálfun heilt sumar. Má segja að "ferlið" hafi byrjað þetta ár í kjölfar hjóladramans. Vissi samt nákvæmlega ekki rass í baun hvað ég var að gera þegar ég fór í ræktina.

Þetta er árið sem ég lét ég þau frægu orð falla:

"Guð minn góður hvað sumt fólk er bilað að nenna að mæta í ræktina kl. 6 á morgnana. Það er nú ekki allt í lagi með þetta lið!"

Góð Elín - góð!

Svo tók við átvetur mikill, ég skrapp í JSB eftir jólin, 2005/2006. Léttist um 10 kg. í átaksnámskeiði þar, þá orðin 66 kíló, og aftur tók við átvetur mikill.

Átveturinn sá einkenndist af kleinum og kókómjólk í morgunmat, samloku með ítölsku salati í hádegismat, oftar en ekki súkkulaði og kakó í eftirmiðdaginn og einhveruslags hamborgarasulli í kvöldmat.

Alltaf, alltaf ís eftir klukkan 19:00!

Jólin 2007/2008.

Febrúar 2007.

Besta Amsterdam-mynd hérnamegin Alpafjallanna.

Mæjó fröllur! Ekki góðar fröllur - en ég át þær samt!

Sumarið 2007 fór ég svo í Bootcamp með Ernu vinkonu. Léttist aðeins þar, var í 67 kg. rúmum og hélt af stað til Frakklands, elsku Frakklands og Ítalíu í því formi.

Bestaðasta eðaltjaldferð sem ég hef farið í. Ítalía vann - mikið endemis ofur sem ég elska Ítalíu.

Franskar sveitir vega þungt en Ítalía... *dæs*

Svona fór um sjóferð þá.

Byrjun september.

Miðbik september.

Lok september.

Úhlalahh.. orðin svolítið pattara- og frúkkuleg. Yrði flott ítalskt sí-rífandikjaft-kvendi í framtíðinni.

Er reyndar sí-rífandikjaft kvendi núna. Bara af ísklenskum uppruna. 

Krúttaraleg Ellusprengja.

Líklegast upp á mitt þyngsta hérna. Lenti í Frakklandi 67 kíló, sneri til baka tæp 76.

Dugleg stelpa!

En það var ekkert nema gaman... og gott engu að síður  Sjóóðandi heit, brakandi mjúk baguette og ostur í morgunmat. Heimalöguð sulta frá 107 þúsund ára gömlum bónda.

Yndislegt.

Þarna hafði ég þó fengið nóg og var komin með hálfgert ógeð. Labba smáspöl, hvað þá upp stigana í Colloseum, og ná vart andanum var ekki alveg að gera sig i minn bók.

Eða brók.

Svo ég ákvað að dúndra mér í að koma allserjar ástandi í sæmilegan farveg. Má segja að hér hafi ég tekið þetta af "alvöru".

Ferlið, áhuginn, matarræðið, æfingar.

Jólin 2008/2009.

Búin að vera í einkaþjálfun í tvo mánuði tæpa, eftir Frakklandið, og búin að léttast um 8 kíló.

Lyfingar í bland við brennslu.

Eftir þessi jólin vildi ég sjá hvort ég gæti, bókstaflega, lifað án þess að setja sykur inn fyrir mínar varir. Það heppnaðist.

Á afmælinu mínu 2009.

Tveimur mánuðm eftir jólakökur, ofát og allskostar gúmmulaði-svarthols ítroðslu. Ákvað að taka þetta með trukki og gera almennilega.

Ekki arða af sykri fór inn fyrir varirnar frá 1. jan - 1. mars.

Á þessum tíma varð bloggið svo til. Enda sést það vel í "Um höfund" ræðunni hvar ég var stödd í þessu annars ágæta ferðalagi mínu.

"En er ekki betra að bíta í eitthvað sætt ef þú veist að það er "gott" fyrir skrokkinn í leiðinni? Fáðu þér döðlur, fíkjur, rúsínur. Búðu þér til hafrakökur með banana - finndu þér sykurinn á öðrum stað en í t.d. nammiformi."

Mikið af vatni... Atlantshafið... hefur runnið til, jah, sjálfs sín síðan þá

Mánuði seinna... og 300 klst. brennslu.

JÁ... ég þoooli ekki að láta taka svona myndir af mér. Þessvegna tek ég þær yfirleitt alltaf sjálf, mis vel heppnaðar (mis-vel-heppnaðar) í spegli.

Jebb, þarna var ég í hálfgerðu tjóni.  Sjeikar, brennsla, meiri brennsla og jah... meiri... brennsla?

"GUÐ MINN GÓÐUR... ÉG BORÐAÐI KARTÖFLU... ahh ok, ég kveiki í henni með auka klukkutíma á morgun"

Heilbrigt ekki satt?

Þreytulegri en skúringamoppa. Lít út fyrir að vera 150 ára.

Maí 2009.

Sýnir sig og sannar. Þarft ekki að vera "heilbrigð(ur)" þó svo þú sért grönn/grannur. Það er stórkostlegur munur þar á gott fólk.

Númer 1, 2 og 3. Ef þér líður ekki vel, þá kemur það til með að sjást - alveg sama hvað talan á viktinni segir. Þið sjáið það bara á myndinni hér að neðan.

-> Takið samt efitir því hvað systir mín er eitthvað lítil og krúttaraleg á þessari mynd

Þarna var ég komin í smá sumarfrí og við tók ofurát.

Uppsöfnuð gremja og ömurlegheit í bland við áhugaleysi og hálfgerða uppgjöf.

Júlí 2009.

Ágúst 2009.

Búin að sitja föst í sama farinu allt sumarið. Alveg sama hvað ég barðist um í ræktinni eða hversu oft ég fór.

Orðin frekar súr í sálinni á þessum tímapunkti.

Sumsé, til að taka saman tímabilið frá því ég kom heim frá landi baguette og osta, fram að þeim tímapunkti sem ég stútaði öllu brennslusystemi.

Nýkomin frá Frakklandi lengst til vinstri - 6. október 2007, örlagaríkur kreppudagur með meiru. Hálfu ári seinna var ég komin niður í viktina sem ég er í dag eða 60 kíló. Það má sjá á mynd lengst til hægri. Þarna var ég hinsvegar búin að brenna frá mér vit og rænu - en eftir bókinni, hvíthærð með brúnkukrem.

Stórkostlegt!

Mánuði seinna, og um það bil 700 klst. brennslu.

Tók það saman að á þessu tímabili, miðað við ofnotkunina á rassatækinu (stigavélinni), þá hafi mér tekist að arka langleiðina til tunglsins. 

Á engar almennilegar fyrir/eftir bumbumyndir frá þessu tímabili. Því verr og miður.

Sumarið fór svo í almennt át og hamingju, eins og góð sumur eiga að vera. Sleppti mér í áður nefndu sukki og þyngdist um 5 kíló á tæpum þremur vikum. Vel af sér vikið ekki satt? Þetta gerist þegar maður er átvagl af guðs náð og sleppir nammidögum með eftirsjá í hjarta og lifir á loftinu. Aumingjans brennslukerfið allt í rugli og skrokkurinn harðneitar að láta í té þær hitaeiningar sem hann hefur nælt í á annað borð af hræðslu við að missa þær aftur.

Og nota bene mín elsku bestu, á myndinn hér að neðan, eftir að 5 kílóin bættust utaná kvendið, fannst mér ég vera með bumbu á við Buddha og skvap fyrir allan peninginn.

Biluð?

Já... það held ég nú.

Þar sem ég er lélegri en allt að láta taka af mér myndir, í þeim tilgangi að nóta niður árangur, þá eru þetta því miður einu myndirnar sem ég fann frá þessu tímabili. Engar byssumyndir eða bak-kremjur. Ég er svo léleg, ég er ekki einusinni í pósu!

Sem er að sjálfsögðu nauðsynlegt í svona efnum!

Gamla eldhúsið hennar mömmu, sælla minninga, kvaddi þennan heim, 2009, sökum ofnotkunar yfir sumartíðina. Spaghettisen sló heimsmet í fjölskyldufiestum og áti yfir höfuð.

Af því að við borðum jú alltaf yfir höfuð!

Eftir sumarið æpti ég hástöfum á Röggu til hjálpar og varð hún við þeirri bón svo um munar. Eftirfarandi póst sendi ég á hana 25. ágúst 2009 - nákvæm hérna.

"Sæl og blessuð

Ég sendi þér nokkrar línur um daginn varðandi sjálfa mig og þjálfunina mína.

Ég vil aftur þakka þér kærlega fyrir svörin sem þú gafst mér. Alveg frábær.

 

Nú er ég hinsvegar komin á þann punkt að ég verð að fiffa og hressa upp á prógrammið áður en ég mygla. Búin að vera í sumar að gera í raun... bara eitthvað! Ef þú veist hvað ég meina. Búin að vera að lyfta á fullu en aldrei neitt sérstakt prógram og er alveg týnd. Veit ekkert hvar best er að byrja eða hvernig best sé að sparka aðeins í rassgatið á sjálfri mér. Bæði hvað lyftingar, brennslu og mat varðar.

 

Lýst svo helvíti vel á þig og miðað við það sem ég hef lesið eftir þig þá veist þú 100% um hvað þú talar. Sé sjálfa mig í mörgum af þínum pistlum.

 

Ef þú hefur laust pláss fyrir eitt stykki geit sem er tilbúin í blóð svita og tár þá yrði ég ofurkát" 

 

Átvenjur bötnuðu til muna. Ásamt því að koma brennslukerfi í samt lag þá styrktist ég mjög hratt, léttist í leiðinni, sem er bara bónus. Ég á mér "þægilega og óþægilega" vikt. Góða viktin mín liggur á bilinu 58 - 65 kg. Allt undir eða yfir þessum tölum er 'óæskilegt' í minni bók og mér líður hálf kjánalega í eigin skinni.

Nema þegar ég var upp á mitt "besta" hvað vöðvamassa varðar. Þá var kvendið 65 rúm með 12% fitu utanáliggjandi. Leimmér að heyra "Ku-j-öööt".

KUU-JÖHÖÖT!

September 2009.

Búin að vera að lyfta a-la Ragga í mánuð, uppgötva allt sem ég "mátti" borða. Heimskulegt að segja þetta. En ég hreinlega vissi ekki betur.

Þið getið ekki ímyndað ykkur hvað ég var að gera mikið "rangt" í þessum matarmálum. Svei!!

Hér kveikti ég líka á perunni með viktarmál. Viktin segir ekki alla söguna mín kæru og árangur er hægt að mæla í auknum styrk, þoli sem dæmi.

Tók ekki nema, hva, rúm 3 ár að átta sig á þessu?

Nóvember 2009 - 2 mánuðir liðnir af Röggu-píníngum.

Metnaðurinn i botni og viktin blessuð tekin með út að borða!

Ef ég væri ofurhetja þá héti ég "Viktarinn" eða "Vik-tor"!

Árshátíð vinnunnar í nóvember 2009.

65 kíló og búin að týna 4 cm af ummáli og tækla lyftingar af krafti.

Bostonferðin sælla minninga.

Enn og aftur var étið á sig gat.

Cheeeeesecakefactory ostakökur! Óguð... ég dey!

Þarna var ég 63 eða 64 kíló, búin að bæta á mig töluverðum massa. Orðin mun, mun sterkari en fyrr um veturinn. Skelfilega gleðileg tilfinning það.

 

Hér urðu svo enn aðrar afskaplega "drastískar" breytingar.

Allt að ske.

Einu tímabili lauk og annað tók við. Bæði hvað líf varðar og háralit.

 

 

 

 

 

 

 

 

 

Áramótin/jólin 2009/2010.

Janúar 2010.

Byrjuð að skafa, skera og sneiða töluvert hérna.

Það er bannað... að gera grín að speglasjálfsmyndatökum! Bannað!

Febrúar 2010 vs Febrúar 2009

Afmælisdagurinn þetta árið. Ledderhósen með emo-hár. Gaman að þessu.

 

 

 

 

 

 

 

 

 

 

 

 

Mars 2010

Enn var "mokstri" áfram haldið.

Matarræðið búið að vera 110% síðan í janúar. Lyftingar 3x í viku, brennsla 3 - 5 daga eftir nennu og helgarnar frí.

Tæpum tveimur árum eftir að ég byrjaði á þessu öllusaman þá komst ég í þetta form. Að skafa af bumbunni tók mig frá jan - apríl 2010.

Mars 2010 til vinstri, apríl 2010 til hægri.

Jafn þung og eftir brennsluna miklu, jan - maí 2009. Spáið í því! Aðeins meira af vöðvum hafa bæst utan á kroppinn.

Jan 2009 vs. apríl 2010

 

 

 

 

 

 

 

 

 

Svo var förinni heitið til Ásralíunnar. Lands alls þess sem átvögl ættu með öllu að "forðast".

Óhh... dramatíkin.

Þarna arkaði ég um með lausan tauminn, og étarann í viðbragðsstöðu, í mánuð og át allt sem tönn á festi! Það var æði!! Uss það er svo mikið af allskonar eðalfæðuefni í þessu blessaða landi.

Skundað út á Akureyrarflugvöll, sælla eldfjallaminninga, í lok apríl...

...át um það bil svona upp á dag næstu 30 daga...

...brotlenti mánuði seinna í bakgarðinum hjá móður og föður, nokkuð sællegri en þegar ég fór af landi brott. Hér ku vera lok maí þessa árs.

Buxurnar góðu pössuðu ekki... eða... þú veist. Skruppu í þvotti og allt það.

Þarna var ég þó byrjuð að Bútkampfa eins og vindurinn. Fékk nóg af letinni í lok maí og ákvað að sparka aðeins í nennarann og koma mér af stað á nýjan leik eftir 2ja mánaða pásu.

Eldhress í sumarkampfi.

Júlí 2010.

Jasoh... tíminn fljótur að líða maður. Eins og þessi mynd hafi verið tekin í gær! 

Tók smá stefnubreytingu í æfingavali hér. Engar lyftingar allt sumarið.

Sigraði hlauparann!!! Eða.. minn hlaupara.

Náði að antilópast samfleytt í 30 mín án þess að kalla til Björgunarsveitina.

Ágúst 2010.

Ofursviti eftir einn-tvöfaldan, frekar massívan, Kampf-tíma.

Skírnarveislukökumatsofurátsgleði.

Eins og með barnaafmæli, þá eru skírnar-/fermingarveislur alveg jafn mikill hamingjuhæll fyrir Akkilesinn.

Stunan farin að smokra sér inn hérna, Bootkamp búið og lyftingar teknar í og með á nýjan leik.

Enn erum við í Ágústmánuði.

Og buxurnar blessaðar pössuðu utan um rassgatið á mér í annað sinn. Bara smá þolinmæði og þú nærð takmarkinu þínu. Tók mig rúman mánuð að komast í brækurnar á nýjan leik.

Ekki að það hafi verið "takmarkið" en ágætis viðmið engu að síður.

Tók mig líka 2 mánuði að vinna mig upp í 62 kg. í hnébeygju aftur eftir Ástralíuferð og sumarleti.

 

Október 2010

Hér er ég farin að taka Karvelio á þetta. Engar eiginlega "lyftingar", mestmegnis core æfingar með meiru - virkilega, virkilega kerfjandi og skemmtilegar. Góð og gleðileg tilbreyting og engin "brennsla". Þá er ég að tala um 30 - 40 mín. rassatækismyrðingu. Hef alveg látið það eiga sig núna í vetur.

Tækifæris magamynd fyrir þetta pistilsgrey. Best að hafa hana í svarthvítu sko. Einmitt.

Samt forvitnilegt að sjá muninn á mjög "sköfnum" maga og svo í dag. Eilítið öðruvísi samsettur. Kannski ekkert stórkostlegt, en smá.

Október 2010

Apríl/Mars 2010

Nóvember 2010

Árshátíð vinnunnar. Ári seinna.

2010 vs. 2009

 

 

 

 

 

 

 

 

 

 

 

 

 

 

Sælla... sælla... ó svo sælla minninga.

Árshátíðir geta... ég endurtek, geta... verið góðar "tíðir" daginn eftir.

Geta.

 

Þetta kvikindi var svo tekið núna í desember.

Líður alveg hreint ágætlega bara, fyrr utan pínínguna sem fylgir því að taka þessar helv... myndir.

Afsakið orðbragðið.

Hreyfing/matarræði allt innan skynsemis og hófmarka. Líkar það vel. Komin í rútínu og maginn sáttur við sitt. Orðin assgoti hraust á skrokkinn, búin að ná nokkrum hápunktum á árinu eins og einni dauðri, hlaupum og hnébeygju á einari.

Eitthvað sem ég gat t.d. ekki áður en ég fór til Ástralíu.

2004 - 2005 - 2007 - 2009febrúar - 2009mars - 2010

2004 - 2007 = Vissi ekki neitt, var bara að "lalla"

2007 - núna = Tekið með trukki! Hugsaði út í það sem ég var að gera.

Jól 2007 - 2008

 

 

 

 

 

 

 

 

 

Jól 2009 - 2010

 

 

 

 

 

 

 

 

 

En það sem mestu máli skiptir, og sem ekki er hægt að sjá á "mynd", er árangurinn sem ég hef náð! Frá því að taka 2,5 kg. í tvíhöfða í 12 kg. Um það bil 15 kg. í bekkpressu í 40, 20 kg. í hnébeygju í 62, aukið þol, aukinn styrkur, aukin hamingja og gleði. Svo eitthvað sé nefnt. Matarræðinu snúið 180 gráður réttsælis og lífstílnum í leiðinni.

Þetta hefur því verið ágætis ferðalag frá því að vita nákvæmlega ekki neitt um nokkurn skapaðan hlut tengdan hreyfingu til þess að vera bara ágætlega vel að mér í því sem "má og má ekki" bæði hvað varðar hreyfingu og mat. Er líka með þá vitneskju í kollinum hvað ég þarf að gera/borða til að létta mig/byggja mig upp/auka þol ofr. Eitthað sem ég bý að alla ævi.

Þetta eru ekki geimvísindi.

Það er jú hægt að fara eftir ákveðnum formúlum en mér þykir best að finna svolítið út sjálf hvað hentar fyrir minn skrokk. Það sem virkar fyrir mig, virkar kannski ekki fyrir Benjamín frá Biðukollu. Það sem ég þarf að gera til að byggja mig upp er kannski ekki rétta formúlan fyrir þig.

En það er ekkert að því að fá aðstoð, byrjunarreit, eitthvað til að vinna með og vinna sig út frá því.

Bloggið blessað varð til í mars árið 2009. Hefur tekið miklum stakkaskiptum síðan þá bæði hvað innihald og framsetningu varðar. Tala nú ekki um hugarástand undirritaðrar. Ég hef bæði elskað þennan vettvang og hatað. Hef jafnvel hugsað mér að hætta þessu alfarið en það er ótrúlegt hversu mikil hvatning það getur verið að fá alla ykkar jákvæðni beint í æð.

Þið eruð ekkert nema æðisleg!!

Ég er nákvæmlega enginn brautryðjandi á þessum vettvangi. Ég veit um andskoti marga sem gert hafa "stórkostlegri" hluti en ég í þessum efnum. En það sem ég setti mér sem markmið hef ég náð og viðhaldið. Með það er ég virkilega, virkilega ánægð. Fékk aðstoð frá nokkrum valinkunnum einstaklingum, tala nú ekki um fjölskylduna mína og vini, á leiðinni og hef kynnst mikið af góðu, góðu fólki.

Markmiðið sem þú setur þér er hvorki minna/stærra en þeirra sem í kringum þig eru - það er þitt. Púnktur. Haltu þig við það, ekki gefast upp og njóttu ferðalagsins.

Spaghettijól 2010

Jólin komu og þau fóru.

Með stæl.

Góðmundur og allir hans félagar léku lausum hala og áttu mikið meira en bara sjö dagana sæla. Eins og mamma orðaði það þegar undirrituð mætti í Gúmmulaðihöllina á aðfangadag.

"Guð minn góður, þarna kemur dökkhærða beinagrindin frá Hrauninu og étur okkur út á gaddinn!!"

Ég var kölluð Skeletor það sem eftir lifði kvölds.

Velmegunarbelgurinn stendur svo langt út frá miðjunni að stafurinn "Þ" ætti að skammast sín og taka "D" sér til fyrirmyndar. Tærnar sjást ekki þegar litið er niður á þær, fyrir utan þá óumflýjanlegu staðreynd að ég lít niður á tær bara almennt - ljótbífur með meiru, og þar sem einusinni gætu mögulega hafa talist verið útlínur á skrokknum eru óskilgreind mörk ítroðslu og geypileg góðæris ummerki. 2007 ofát án landamæra.

Stóðst ég jólaprófið í ár?

Já... svo um munar. Nokkurra daga áti var pakkað saman í eina kvöldstund og afganga daginn eftir.

Annar í áti sló ekki slöku við og var síður er svo eftirbátur sykurvímu og rjómasturtu aðfangadags. Vélindað fylltist rétt fyrir klukkan 21:00 á aðfangadag og ég þurfti að halla höfðinu aftur til þess að geta:

1. Andað
2. Borðað meira
3. Stundað annan í áti

Ég er ógeð.

Þriðji í áti var nokkuð slakari en forverar hans tveir, slakari í þeim skilningi að ekki var étið frá morgni til kvölds... meira bara... kvölds! Ef til er græðgisblætisguð í þessum heimi þá mun ég eflaust heimsækja hann í nokkrar vikur eftir að ég hverf yfir móðuna miklu.

Gott fólk, yfir helgina náði undirrituð að slurka í sig um það bil kílói af graut. Rúmlega. Geri aðrir betur. Ég og Rísó eigum að sjálfsögðu í leynilegu ástarsamandi, matarpervismi af hæstu sort. Einkennist af troðslu, þar til grjón eru uppurin, og eftirsjá þegar umrædd stund rennur upp.

Kærið mig!

Jólin eru þó alltaf yndisleg með meiru. Við höfðum það ljúft, gott og allt sem talist getur uppáhalds í þessum heimi. Mikið sem við erum heppin að geta átt, og leyft okkur, daga sem þessa í faðmi fjölskyldu og vina.

Látum myndirnar tala. Velmegunabumban var/er of hræðileg til að ég fari að sporta þeirri náhvítu synd framan í alþjóð. Ég vil helst ekki að þið missið matarlystina mín kæru. Þið verðið bara að trúa mér.

Yfir og út, þar til annað kemur í ljós.

Æði "hressar" jólasystur.

Grautarhermennirnir mínir! Ég át heila skál... ein... og óstudd!

Tók 2,5 daga í gjörninginn.

Jólalax með heimagerðri ofursósu.

Fjórir diskar og já, ég ét mig yfirleitt alltaf sadda af forrétt!

Sadda sjáið til... ekki pakksadda! Restin af kvöldinu fer í það.

HAHH!!

Þetta er nákvæmlega eins og atirðið úr Christmas Vacation - þegar kalkúnninn er skorinn!

Og já... ekki hafa áhyggjur gott fólk.

Afi fékk blessað jólarassgatið á öndinni! Ef aumingjans öndin hefði nú bara vitað hvað beið hennar.

Greyið!

Myndin hér að neðan er bönnuð innan 18!

Þið getið svo margfaldað neðangreindan skammt með 3,5.

Munið mín kæru, ég lýg aldrei til um magn af mat sem ofan í gapholið hverfur!

Margfalda þennan með 3,5 mínus kartöflur á 1 disk.

Millimál.

Í öll mál... helst.

Áthvíld og pakkaupprífelsi.

Kósíheit.

Kjaft, spjall, raus, mas, hlátur, meiri pakkar.

Gúmfey sokkar - ómissandi á jólunum!

Eins og með jólaöndina, ef það eru ekki sokkar þá eru ekki jól... óhh... dramtíkin!

Grautarstundin runnin upp mín kæru!

Óheilögrjómasletta með grjónum!

GUÐ MINN GÓÐUR

Fallegt ungrú... jólafallegt!

Jebb.

Eigum við að fara út í stærðfræðina hérna?

Marföldun í hæsta gæðaflokki.

Neðangreint * 7.

Og það var bara aðfangadagsátið, annar- og þriðji ekki með taldir!

Smá slökun áður en herskarinn mætir!

Átþreyta og kjötsviti upp á sitt besta!

Loks mætti rest af Speghettiliðinu í Höllina. Húsið var bókstaflega morandi í fólki!

Sæta fína Guðrún Hrefnan mín.

Sæta og fína Helgan mín.

Jólasnær með jólagleraugun

 

Annar í afgangs-áti.

Og nei, átið átti sér ekki stað í þeirri röð sem myndirnar gefa til kynna.

Þið megið vita það, ójá, að grauturinn er alltaf það fyrsta sem inn um varirnar fer annan í áti! Helst þrjár skálar.

Þar á eftir kemur laxinn og öndin en gröðguð í eftirrétt.

Þannig rúllar Spaghettilýðurinn!

Þriðji... í áti!

Frómasían og rækjukokteillinn hennar ömmu er ómissandi 26. át.

Jebb.

Sinnum 3.

Hérna gat ég hinsvegar ekki meir. 

Ketið fékk átvaglsfrí.

En ástæðan var einfaldlega...

...ójeah!

Eftirréttarsítrónufrómasía!!

Ég vil heyra ykkur segja FJÓRIR!

"FJÓRIIIIIIR"

Ofátsgræðgismúrinn hefur hérmeð verið felldur, sprengdur og grafinn! Tvöfalt. Þrefalt... Margfalt.

Svona nú... allar syndir og ósyndir upp taldar í máli og myndum.

Pheew *anda inn*-*anda út*

Vona að þið hafið ekki sofnað á leiðinni!

Svo er ekki nema korter í 2011. Vissuð þið þetta?

Jáhérnahéri og allir hans fylgdarmenn.

Súkkulaði biscotti með espresso, valhnetum og hvítum súkkulaðibitum

Enn eru tveir dagar í jólin og, trúið því eða ekki, fleiri ofur sykurbombuuppskriftir bíða birtingar síðan í fyrra.

Ég segi samt ekki meir. Held ég sé dáin og farin til himna!

2009 - ó hvað ég elska þig!

Súkkulaði biscotti með espresso, valhnetum og hvítum súkkulaðibitum

2 bollar hveiti

1/2 bolli kakóduft, ósætað

1 - 2 msk espresso duft eða instant kaffi. Malað.

3/4 tsk matarsódi

1/2 tsk lyftiduft

1 tsk salt

6 msk smjör, 85 gr. uþb

1 bolli sykur

2 stór egg, hrærð léttilega

1 tsk vanilludropar

1 bolli - valhnetur, gróft saxaðar og hvítir súkkulaðibitar

113 gr. dökkt, gott súkkulaði

Kanilsykur til að strá yfir

Aðferð:

1. Hita ofn í 175 gráður.

2. Sigta saman þurrefni - allt nema sykur.

3. Hræra saman smjöri og sykri á meðalhraða, þangað til ljóst að lit. Um það bil 2 mínútur. Bæta þá eggjunum út í og halda áfram að hræra, 2 mínútur.

4. Lækka hraðann og bæta þurrefnunum samanvið í þremur skömmtum, þangað til rétt blandað og deig er farið að taka á sig mynd. Blanda hnetum og súkkulaði samanvið.

5. Skipta deiginu upp í 2 stóra bita, eða 3... eða 4... fer eftir því hversu stórt biscotti þú vilt fá. Ég skipti því í 4 og fékk minni kökur. Fletja aðeins út svo myndist hálfgerður ferhyrningu. Deigið er mjög meðfærilegt. Ágætt að vinna þetta á smjörpappírnum sem þeir koma til með að bakast á.

6.  Setja inn í ofn í 15 - 25 mínútur. Fer eftir stærð. Mínir voru inn í 20 mín. Passa að hafa þá ekki of stutt, annars krumslast þeir í sundur þegar reynt er að skera í þá. Leyfa að kólna í 10 - 20 mín.

7. Skera í 1 - 1,5 cm þykkar sneiðar, leggja á hliðina og inn í ofn aftur í 8 - 10 mínútur.

8. Taka út úr ofni, leifa að kólna smá og loks færa yfir á grind til að kæla alveg.

9. Borða með kaffi, kaffi... kaffi og meira kaffi... deyja svo hamingjusamur... hmm?

Vonandi þó eftir allmörg hamingjurík og krúttaraleg ár.

Það má líka borða þetta með kakó eða mjólk, ég leyfi það.

Matarræði í grófum dráttum

Hef fengið nokkrar spurningar varðandi það sem ég er að borða. Eðlilega.

Matarræðið er það sem stoppar flestalla í að ná árangri og nákvæmlega þeim ofurrassi sem leitað er eftir.

Það er hægt að klifra allan skalann í þessum matarmálum en klippt og skorið fer það allt eftir því hverjar áherslurnar eru. Ertu að massa þig upp, létta þig, skera eða viðhalda þyngd? 

Það sem ég er að gera í dag er í raun barasta að borða það sem mig "langar" til að borða innan skynsemismarka. Ef ég myndi leyfa mér allan alheiminn, þá myndi ég svo sannarlega éta allan alheiminn. Þannig er það nú bara. Til að sporna við alheimsáti þá er t.d. hægt að vigta matinn - svaða fín aðferð til að passa upp á "inntöku" og í raun, komast upp á lagið með skammtastærðir ofl. Virkaði flott fyrir mig.

Ég er nefnilega manneskjan sem étur smjör þráðbeint uppúr dollunni sjáið til. Þó helst með smá kanilsykri.

Eitt verð ég þó að brýna fyrir ykkur og það er að enginn er nákvæmlega eins... ótrúlegt en satt... og það sem hentar mér hentar ekki endilega John Smith út í bæ. En viðmið, sjá hvað aðrir eru að gera ofr. er alltaf eitthvað sem gott er að hafa "við höndina". Þú breytir þá og bætir í takt við þínar þarfir og markmið.

1. Ég er yfirleitt vöknuð um 5 leitið. Skulum hafa það í huga.
2. Ég reyni að stunda hreyfinguna mína að morgni til - tímasetja kolvetni eftir æfingatíma.
3. Verð svöng með 2 - 3 tíma millibili og get eeekkert að því gert. Verð að borða svo ört því annars breytist ég í ömurlegt óviðræðuhæft fýluskremsel sem er ekki gott fyrir þolanda... eða alheiminn ef út í það er farið.
4. Miiiikið af grænmeti/1 - 3 ávextir yfir daginn
5. Ég er mjög hrifinn af fuglum og fiskum
6. Ég er aðeins meira en hrifin af beljum
7. Eggjahvítur eru góðar í minni bók... raunverulega... góðar = nohm! Þrátt fyrir bragðleysi.
8. Vatn, vant og já... vatn. Drekktu vatn. Það er ókeypis.
9. Holla fitan - (update 22.12 - það gleymdist, trúið þið því?) Avocado, möndlur, hnetur, fræ, feitur fiskur, ólífu olía...
10. FJÖLBREYTNI

Þannig að... dæmi um týpíska daga í hinum fullkomna Ellu heimi.

Venjulegur dagur - hvíld (yfirleitt sunnudagur - vakna milli 7 - 9)

• 09:00 - Einn einfaldur með hnetusmjöri og bláberjum/Chiaskyr með ávexti

• 12:00 - Risaofursalat (ávextir/grænmeti) + próteingjafi (kjúlli/kjöt/fiskur/egg/kotó) + kolvetni (grjón/teitur/brauð) + fitugjafi (hnetur, fræ, avocado, olía)

• 15:00 - Hámark/skyr + hnetur/eggjahvítur + avocado/skyr + ávöxtur/ávöxtur/kotasælubrauð með grænmeti/skyr einvörðungu/ávöxtur + hnetusmjör/grænmeti + hnetusmjör/hrökkbrauð með áleggi

• 18:00 - Salatfjall + próteingjafi + fitugjafi + lítill skammtur af kolvetnum (ef vill - sætar, brún grjón, gróft brauð...)

• Ef ég er að drepast fyrir svefninn (um 10 leitið) þá gúlla ég kannski smá hnetur eða kotasælu. Skyr. Prótein + hnetusmjör... eitthvað aðeins til að seðja það sárasta.

Æfing að morgni, lyft/ofurCore a la Karvelio

• 05:00 - Einn einfaldur með bláberjum/Einn einfaldur/GRAUTUR

• Æfing
• 07:30 - Hleðsla/Hámark/Hreint whey + hlaup/Hreint whey + cheerios/Hreint whey + beygla

• 09:30ish - Ávöxtur/lúka hnetur
• 11:00 - Hulk skammtur af grænmeti + það prótein sem er í boði í vinnunni (kjöt/kjúlli/nemo) + kolveti (teitur/grjón... ef í boði og ef vill) + fitugjafi (Hnetur/avocado/olía/fræ). Ef ekki kjúlli/kjöt/fiskur þá eggjahvítur, ef ekki eggjahvítur þá kotasæla, ef ekki kotasæla þá brauðsneið með osti eða eitthvað.

• 14:00 - Lítil dolla skyr og hnetur/salat eða ávöxtur + skyr/salat + eggjahvítur + hnetur/ávöxtur/hrökkbrauð + kotasæla + grænmeti...
• ...og svo framvegis. Það sem hendir er næst í vinnunni.

• 17:00 - Ávöxtur/lúka hnetur/próteingjafi - seðja það allra sárasta fram að kvöldmat.
• 19:00 - Hulk skammtur af grænmeti + próteingjafi (kjúlli/fiskur/kjöt/eggjahvítur) + fitugjafi (avocado/hnetur/fræ...)

• Ef ég er að drepast fyrir svefninn (um 10 leitið) þá gúlla ég kannski smá hnetur eða kotasælu. Skyr. Prótein + hnetusmjör, harðfisk, ávöxt... eitthvað aðeins til að seðja það sárasta.

"Brennsla"

Ansi langt síðan ég hef tekið reglulega SS brennslu (slow steady - langtíma, lítið álag). Engu að síður, þá væri þetta það sem ég myndi spísa eftir hana.

• Brennsla 
• 08:00 - Einn einfaldur með bláberjum og hnetum/Chiaskyr-hræingur/Ávextir + einn einfaldur/Skyr og ávöxtur

• 11:00 - Hulk skammtur af grænmeti + það prótein (kjöt/fiskur) sem er í boði í vinnunni + kolveti (ef í boði) + fitugjafi (Hnetur/avocado/olía/fræ). Ef ekki kjúlli/kjöt/fiskur þá eggjahvítur, ef ekki eggjahvítur þá kotasæla, ef ekki kotasæla þá brauðsneið með osti eða eitthvað annars skyr eða jógúrt.

• 14:00 - Lítil dolla skyr og hnetur/salat eða ávöxtur + skyr/salat + eggjahvítur + hnetur/ávöxtur/hrökkbrauð + kotasæla + grænmeti... þið þekkið þetta.

• 17:00 - Ávöxtur/lúka hnetur/próteingjafi - seðja það allra sárasta fram að kvöldmat.
• 19:00 - Hulk skammtur af grænmeti + próteingjafi (kjúlli/fiskur/kjöt/eggjahvítur) + fitugjafi (avocado/hnetur/fræ...) + lítill skammtur af kolvetnum (sætar, grjón, gróft brauð, spelt pasta...)

• Ef ég er að drepast fyrir svefninn (um 10 leitið) þá gúlla ég kannski smá hnetur eða kotasælu. Skyr. Prótein + hnetusmjör... eitthvað aðeins til að seðja það sárasta.

Helgarnar - 1 dagur í viku

Nákvæmlega sama og á venjulegum dögum nema ofurát sé á dagskrá. Þá Byrjar ballið iðulega kl. 18:00 og stendur yfir til kl. 24:00. Þá er allt sem á vegi minum verður étið. Stundum er ég "pen". Fæ mér bragðaref á kvöldin, jafnvel djúsí pönnsur í morgunmat. Spila þetta svolítið eftir eyranu. En í grófum, nákvæmlega eins og aðrir dagar nema 1 - 2 máltíðir yfir daginn sem leyfa allt milli himins og jarðar.

Í stórum dráttum. Þá er ofangreint sumsé "hinn fullkomni heimur", eins og staðan er í dag.

Hinn fullkomni heimur. Hljómar það ekki dásamlega?

Hinn fullkomni heimur í átvaglslandi "riðlast" ansi oft til og ég fæ mér hambó í staðinn fyrir risasalat og með því. Stundum sleppi ég "prótíngjafa" og fæ mér baunir. Aðlaga mig eftir því sem til er í vinnunni hverju sinni... eitt og eitt skipti, í og með, inn á milli skiptir ekki sköpum. Sérstaklega ef:

1. Maturinn sem þú skiptir út fyrir er "hollur".
2. Eitt og eitt skipti er ekki 10 sinnum í viku. 

Svo reyni ég barasta að hafa það að reglu að ef ég verð svöng 1 - 2 tímum eftir síðasta át, fá mér þá nart svo ég gúlli ekki fíl í næstum máltíð, og muna að setja meira á diskinn næst. Ef það er kaka í boði, þá borða ég hana ef ég hef lyst, hvort sem hún passar inn í "planið" eða ekki. Ef kaka er á boðstólnum alla daga vikunnar, þá borða ég hana að sjálfsögðu ekki alla daga vikunnar. Ef ég sleppi próteingjafa úr 3 máltíðum af X yfir daginn, þá eru það ekki endalok alheimsins. Gerist það oft í röð gæti það haft eitthvað að segja sért þú að reyna að byggja upp vöðva ofr.

Held þið áttið ykkur á því hvert þessi umræða stefnir hjá mér.

Allt er gott í hófi mín kæru og jafnvel of mikið hóf er líka gott í hófi.

Reynið því að finna einhverja leið sem ykkur hentar og haldið ykkur við hana. Gerið hana að ykkar því langtímaspáin verður mun auðveldari viðureignar þegar grænmetisfjallið, eða hvað það er sem flýtur bátnum ykkar, er forritað inn í systemið.

Þetta fer allt eftir smag og behag, áherslum og annarri hamingju. Gerið þetta bara skemmtilegt og njótið þeirra forréttinda að hafa í raun val um að éta kökusneið eða ekki. 

Njótið dagsins mín kæru.

EKKI Á MORGUN... HELDUR HINN!

Sheiiiibs.

Ekki á morgun heldur hinn

Hefst þá bakstur

Mjúkar saltkringlur

Mikið assgoti hef ég staðið mig vel í 2009 bakstrinum í fyrra.

Smá brauðgerð til að vinna upp á móti sykursjokki síðustu daga. Þið verðið ekki fyrir vonbrigðum með þessar. Treystið mér bara.

Ætla að útbúa þessar snúllur aftur í næstu vikur. 

Mjúkar saltkringlur

• 1,5 bollar volgt vatn
• 1 msk sykur
• 2 tsk salt
• 1 og 1/4 tsk þurrger
• 4,5 bollar hveiti
• 57 gr. ósaltað bráðið smjer
• Olía
• 15 bollar vatn
• 1 bolli matarsódi
• 1 stórt egg
• sjávarsalt

Aðferð:

1. Hræra saman vatni, sykri, salti og geri í skál. Láta sitja í 5 mínútur. Ætti að myndast froða. Froða er góð.

2. Blanda þá samanvið bráðnu smöri og hveiti. Ef þú ert með hrærivél, nota deigkróg og láta hræra þangað til deigið losnar frá hliðum skálarinnar. Annars bara hnoða.

3. Færa deigið í olíuborna skál, snúa klumpnum við svo hann húðist allur olíu. Breiða klút yfir skálina og leyfa deiginu að hefast í klukkustund.

4. Skipta deiginu í 8 - 16 hluta. Fer eftir því hversu margar kringlur þú vilt. Getur líka útbúið stangir. Rúlla deiginu í pulsur og gera svona!

5. Nú þarf að sjóða kringlurnar. Gerir þær mjúkar og gefur þeim fallega brúnan lit. Láta vatn og matarsóda sjóða. Færa 1 - 2 kringlur í pottinn. Eftir 30 sek, snúa kringlunni við og láta sjóða 30 sek í viðbót. Fjarlægja úr potti, þetta aðeins og koma fyrir á bökunarpappír. Endurtaka með rest. Ef kringlurnar detta í sundur í vatninu, taka þær uppúr eftir að suðu er lokið og púsla þeim aftur saman á bökunarpappírnum.

6. Pensla með eggjablöndu (egg og vatn) og strá með salti.

7. 225°C heitur ofn í 14 mínútur og voila! Saltkringlur til að vinna á móti öllum sykrinum! Færa þær strax á grind til að kæla og guð minn almáttugur... afsakið guðlastið.

Þessar kringlur eru geggjaðar!

Karamellu- og kanilpopp með pecanhnetum

Hef gert þetta margoft síðan síðustu jól með allskonar tilfæringum, breytingum og kryddútúrsnúningum. Hnoða poppið í bolta, búa til popp-sleikjó, húða með súkkulaðikaramellu, nota sem millilag í köku, bæta Nóakroppi út í, eplaköku-kanilpopp...

Þetta bregst ekki!

Gott fólk, má ég kynna eitt af mínu uppáhalds heimabruggaða ofurnammiátsgleðioghamingju! 

Karamellu-pecan kanilpopp 

• 12 bollar poppað poppkorn. Uþb 1/2 bolli baunir.
• 1 bolli gróflega saxaðar pecanhnetur
• 1 bolli púðursykur
• 1 tsk kanill
• 1/4 bolli sýróp eða hunang
• 113 gr. smjör
• 1/2 tsk matarsódi
• 1 tsk vanilludropar
• Smá sjávarsalt (Því salt og karamella... óbeiibeh)
• Hvítt súkkulaði

Aðferð:


1. Hita ofn í 120 °C og leggja bökunarpappír yfir t.d. eldhúsborðið! (Fer kannski eftir skammtastærð, ég bjó til popp fyrir heila þjóð)

2. Setja popp og pecanhnetur í stóra skál eða geyma í stórum potti. Ég hef þetta allt í pottinum sem ég poppa poppkornið í. Hann þarf að vera mjög stór.

Það er að sjálfsögðu hægt að kaupa tilbúið popp. Herre gud... bara svo gaman að heimapoppa!

3. Hræra saman púðursykri og kanil, í miðlungs stórri skál. En þó stærri skál en þú heldur. Ójá! Ekki vanmeta heita karamellu.

Skerið svo smjörið í litla bita og setjið yfir sykurinn og loks sýróp eða hunang yfir smjerið.

Sjááið'etta!!! Ohhhhhh smjöööör!

• Góði Guðmundur. Gefðu mér einn dag þar sem ég get étið smjör, sykur, ís, rjóma og súkkulaði einvörðungu, án stopps og án viðbjóðsseddutilfinningar, án þess að fá hjartaáfall og stútfullar æðar af almennri óhamingju!

Hmm... það er eins gott að við fáum ekki uppfyllta eina ósk frá æðri máttargíröffum yfir ævina. Þá á ég ekkert inni þegar ég stend fyrir framan ljónið í Afríku á komandi misserum.

• Ella: Óguð Óguð Óguð Ó-Góði Guðmundur...
• Guðmundur... ekki svo góði: NA-HAAAHAAA.... bíddu bíddu bíddu. Manstu um árið. Smjörið.. manstu. Hahh.. súkkulaði... jáá vina mín. Soner'etta. Sjáumst eftir smá!

4. Henda inn í örbylgju í 30 sek., taka út og hræra saman. Henda aftur inn í örbylgju í 2 mínútur, taka út og hræra aftur. Aftur, örbylgja, 2 mínútur - líka gott að fylgjast bara með því. Eftir þennan tíma ætti karamellan að vera byrjuð að bubbla mjög mikið. Ef hún bubblar ekki er hægt að setja hana smá inn í örbylgjuna aftur en passa verður að elda hana ekki of mikið. Annars harðnar hún og breytist í risakaramelluklump.

Sem er svosum allt í lagi. Ekki græt ég það.

En ekki það sem við leitumst eftir hér.

Hún ætti að líta um það bil svona út.

5. Fjarlægja úr örbylgjuofni og hræra vanillu og matarsóda samanvið. Blandan blubblar mjög mikið upp við þetta. Hræra vel, hræra fljótt - karamellan stífnar nokkuð hratt við þetta samspil ofurefna.

6. Hella karamellu yfir popp og pecanhnetur og hræra vel þangað til allt gums er karamelluhúðað.

Stilltu þig... ekki klára poppið!

7. Dreifa á bökunarplötu, útataða í bökunarpappír, og inn í ofn í 30 mín. Hræra í á 10 mín fresti. Eftir 30 mín tékka á poppinu til að sjá hvort það sé nógu hart. Ef ekki, baka í 5 mín aukalega. Annars taka út, salta smá, og reyna að éta ekki allt í einu.

Reyna.

Í alvöru, það er mjög, mjög erfitt að reyna að reyna ekki.

Mjög erfitt.

Bræða svo hvítt súkkulaði og dreifa yfir gleðina! Ójá, ég sagði það!

Bræða... hvítt... súkkulaði yfir herlegheitin. *yfirlið*

Þetta er eitt besta, og einfaldasta, ofurnammi sem ég hef smakkað... skulum ekki tala um karamellusprengjurnar út á ís.

Tilvalið í jólapakkann. Einfalt. Hægt að útbúa í tonnavís!

Usss!!!! Svei þér kerling!