Einföld hráefni, æðisleg útkoma

Gott, gott, gott! Fjögur hráefni umbreyttust í æðislega máltíð með aðstoð herra Foreman og náins vinar hans, örbylgjuofnsins! Jújú, nútíma letieldamennska í sinni hreinustu mynd! Ungfrúin var svöng þegar hún kom heim úr vinnunni og skrokkurinn hreinlega gargaði á mat hið snarasta.

Frosin kjúklingabringa inn í örbylgju og afþýdd með hraði. Eftir það var dýrið kryddað með oregano, timian, basil, pipar og smá salti og skellt í grillun a-la Foreman, ásamt tómötum og rauðlauk. Á meðan hitaði ég sæta kartöflu í örbylgjunni. Þegar mín heittelskaða sæta kartafla var að verða til skellti ég henni í grillið með hinu gúmmulaðinu svo hún fengi nú líka fallegar grill rendur. Allt fyrir útlitið!

Yfir tómatana fór smávegis þurrkuð steinselja og salt. Aukalega hafði ég með þessu lauk-chutney blandað saman við AB-mjólk. Kom æðislega vel út. Hefði eiginlega ekki þurft því kjötið og tómatarnir voru svo safarík blanda, en kjúllinn og kartaflan áttu vel saman með sósunni. Mmmmhh...

Voila! Hollt, gott, fljótlegt - hráefni sem flestallir eiga til á lager! Bambinn kátur í dag!

Athugasemdir

[inam (IP-tala skráð) 28.8.2009 kl. 17:48]

Bíddu Elín, sæt kartafla inní örbylgju, nenniru að útskýra það fyrir mér aðeins....??

[Elín Helga Egilsdóttir, 28.8.2009 kl. 18:46]

Sæt kartafla - inn í örbylgju - stilla á kartöflustillingu - hita þangað til mjúk!

Ef heil sæt kartafla - stinga hana með gaffli nokkrum sinnum - ofur kartöflustillingin - mjúk!

Ójes beibí!

Held það sé líka alveg hægt að henda þeim beint inn í örbylgjuna án þess að nota einhverja snobbstillingu.