Marzipan mascarpone ostakaka með súkkulaðihjúp

Vakna, búðast, baka, sturta, skírn, át, meira át, ofát, heim, syfja, leti = sunnudagsóhollustupistill.

Ef þér þykir marzipan gott þá klikkar þessi ekki.

Þannig er það nú bara. Ég lýg ekki... hún er... djöðbilaðslega fín!

Botn

200 gr. hobnobs, hafrakex, hvað sem er.

1/2 bolli bráðið smjör

1/4 bolli púðursykur

100 gr. möndlur, ristaðar upp úr smá af smjörinu og saltaðar

Fylling

250 gr. 60% marzipan

1/2 bolli sykur

680 gr. rjómaostur. Ég notaði 500 gr. mascrapone, 180 gr. rjómaost.

5 egg

Innan úr einni vanillubaun

1 tsk vanilludropar

3/4 tsk möndludropar

 

Aðferð

Botn

Allt í matvinnsluvél nema bráðið smjerið. Hræra þangað til smátt, þá hræra smjörinu samanvið og loks þrýsta ofan í 23 cm. smelluform og um það 2,5 cm upp kanntana. Inn í ísskáp á meðan fylling er útbúin.

Fylling

Í matvinsluvél hræra vel saman marzipan og sykur. Loks bæta við rjómaosti, vanillu og dropum og hræra þangað til vel blandað. Þá bæta eggjunum út í, einu í einu, og rétt blanda inn á milli. Ekki ofhræra.

Hella loks gumsinu ofan á botninn og inn í miðjan 175 gráðu heitan ofn þangað til kanntarnir eru stífir, en um það bil 3cm hringur í miðjunni hristist. Láta svo kólna inn í ofni í 10 mínútur. Renna hníf með hliðum kökunnar til að losa frá móti. Kæla svo í bökunarforminu á rekka í um það bil klukkustund og svo inn í ísskap í allt að 4 daga.

Ég keypti Anton Berg súkkulaði. Skar niður í litla bita og raðaði ofan á kökuna fyrir bakstur. Þrýsti svo ofan í fyllinguna og bakaði þannig.

Þar sem þessi bjútíbomba var á leiðinni í matarboð, óformlegt matarboð, en matarboð engu að síður, þá skilaði ég módelinu að sjálfsögðu aftur á sinn stað.

Ekkert sem súkkulaðisósa felur ekki!

 

Það er hægt að hella súkkulaðisósunni yfir dýrið og láta harðna, en kannski betra að leyfa fólki að skammta. Sovsan getur falið svolítið marzipanbragðið. Ofboðslega góð þessi köka, það verður bara að segjast. Þétt og góð. Langsamlega best beint út úr kæli þykir mér þó. Gaman að bíta í hana og áferðin fullkomin. Næstum karamellukennd. Spurning um að minnka aðeins marzipanmagið, 150 - 200 gr? Fer eftir því hvort osta eða marzipanfíkilinn hið innra er sterkari. Marzipanið gerir áferðina að sjálfsögðu aðeins kornóttari, 250 gr. sluppu vel til.

Voila. Marzipan ostakaka með súkkulaðisósu og rjóma.

Ég borðaði þessa sneið... aðra til... og svo um það bil 1/4 af allri kökunni eftir að ég andaði hinum tveimur sneiðunum að mér. Þið megið geta ykkur til um magn rjóma sem fylgdi með.

Mmmhmmmarzipan!

Já... ég nota z.

Og hvað skal barnið heita?

Á morgun fáum við að vita það!

Þangað til þarf ég að búa til eina köku og mamma pönnsurnar sínar.

Morgunmaturinn var æði fínn. Kem til mað að útbúa þetta aftur. Ekki of sætt, ekki of súrt, áferðin fullkomin. Skyrbragðið rétt tónar á móti sýrunni og sýrópið dregur svo niður í öllu heila klabbinu og gerir þetta fööööllkomið. Hrært saman fyrir rækt, inn í ísskap og gúllað klukkutíma seinna.

Samanstóð af kannski 200 gr. skyri, gommu af vatni, 2 töppum sykurlausa ofursýrópinu, 1 msk chia, 1 tsk muldum hörfræjum, Ómægdo3 lýsi og sítrónuberki.

Hversu mikinn sítrónubörk ég notaði er hægt að sjá á þessari illa förnu sítrónu.

Hún var röspuð á víð og dreif og lítur nú út eins og dalmatíusítróna.

Greyið.

Jæja. Út í sólina - búðina - baka..na?

Var annars að klára yndælis peru og lúku af möndlum.

Perur og möndlur eru góðir... góðir félagar! Það samband skal rækta!

Afmæli á afmæli ofan

Kampus búinn í dag. Morgunkampus og það var helvíti fínt bara. Afsakið óviðeigandi orðbragð.

Áttum m.a. að gera hangandi maga-"þurrkur". Lyfta samanlímdum fótleggjum upp í átt að hægri hendi/vinstri hendi til skiptis. Þarna hékk ég eins og óeldað beikon og hristist í mínútu þangað til ég gafst upp. Það var stórkostleg sjón! Beikonmagann þarf því að mastera!

Held svo að ég sé að gera einhvern fjárann vitlaust í uppsitum. Fyrir utan þá óbilandi staðreynd að situ-ups á malbiki er ekki góð hugmynd. Ég stefni þó á svöðusár næst. Held það sé ágætist markmið!

Og júvíst! Ég má alveg kalla á vælubílinn einstaka sinnum.

Amman átti afmæli í gær. Við nettengdum gamla heksið. Nú verður hún óstöðvandi í internet rápi og almennum njósnum um fjölskyldumeðlimi, grútspillta pólitíkusa og nærbuxurnar hennar Pamelu Anderson. Sé hana í anda fyrsta með fréttirrnar, sama úr hvaða áttum þær koma.

Hádegismatur!

Svengdin var næstum búin að ganga af átvaglinu dauðu í morgun. Get svoleiðis gvöðsvarið fyrir það. Með herkjum tókst búknum að skríða áleiðis í átt að eldhúsinu. Augun tárvot, neðrivörin titrandi. Hurðina inn í mötuneyti sá ég í hyllingum. Sem betur fer, nærstöddum til mikils happs, og sjálfri mér til lífs, rakst ég á einmana rúsínu á gólfinu. Á henni var nokkuð af kuski og eitt hár en ég lét það ekki stoppa mig. Át hana í snatri. Blessunin gaf mér orku í síðustu skriðurnar og kraft til að setja nokkra matarbita á diskinn minn.

Hungrið var slíkt að þegar ég tók fyrsta bitann þá titraði Skóflan.

Skóflan verandi hægri handleggurinn eins og hann leggur sig. Handleggurinn sem skóflar jú mat upp í svartholið. Bókstaflega... skóflar! Aðfarirnar eru stundum svo mikilfenglegar að undirrituð þarf, hið minnsta, radíus upp á 5 metra til að geta notið átsins og að allir meðétarar séu óhulltir og enn með a.m.k. annað augað óskaddað. 

Móðir mín kær á svo afmæli í dag. Í tilefni þess... you know it.

ARGENTÍNA... STEIKHÚS... 19:00.... MUUUUUUUU!!!!

Meeeeeeen! Ég finn bragðið af steikinni. Bara að hugsa um fyrsta bitann eykur munnvatnsframleiðslu um 26%. Líka hjá fólki í kringum mig og ég hef ekki minnst orði á þetta! Næstum!

*tilhlökkunartryllingsvillimannaspenningur* með rjóma.

Ég sé dýrðina fyrir mér:

Átvaglið: "Nei takk... ekki elda hana neitt. Skelltu henni bara á diskinn. Kannski flott ef þú ættir smá dijon sinnep? Eða... nei annars. Komdu bara með ketið... beint af kúnni. Ég þarf engin hnífapör!"

Hnetur betrumbæta

Nema þú sért með ofnæmi. Þá skulum við ekkert ræða það neitt frekar!

En þessi ófögnuður...

...ásamt tveimur lúkum af þessum fögnuði!

 

Gerir ófögnuðinn boðlegan átvaglinu. En það þarf að fylgja hnetugleði hverjum bita, annars fer hann ekki niður.

Eftirfarandi áthallæri á sér einungis stað þegar hreina skyrið blessað gleymist heimavið og húkir grátandi í frystihúsi Gúmmulaðihallarinnar.

Glöggir tóku svo væntanlega eftir því að ófögnuðurinn var myndaðu eftir át.

Sjóleiðis hallæri á sér stað þegar átvaglið vinnur matarbloggarann í einvígi.

Það sem þyrfti hinsvegar að eiga sér stað núna er ég, hoppandi eins og villikvikindi, út í sólina. Það sést bersýnilega á innihaldi og gæðum þessa pistils.

Power Shot

Þessi hattífatti kom í heimsókn til mín í morgun. Takið eftir hvað hún lævís á svip!

Þetta er svo það sem hún færði mér.

Sjá upplýsingar um skotið hér!

Eina sem ég ætla að varpa ljósi á er að þetta er unnið úr einu jurtinni sem lifði af Hiroshima. Ætli það sé sniðugt að gúlla eftirlifandi Hiroshima jurtum í sig?

Eitt skot. Með röööri. Á að veita manni auka "boozt" þegar systemið er þreytt og lúið.

Óguðminn góður...

guð... minn... góður...

"Og þú kallar þig frænku mína!!!"

Eins og að drekka nýkreyst vatn úr gömlum ullasokkum... sem vafnir hafa verið utan um loðtær af sveittum karli, ofan í heitum... rökum... stígvélum, í hestaferð.

Og nei, ég hef ekkert á móti sveittum hestaköllum með loðtær... ég vil bara ekki sleikja sokkana þeirra!

Hef ekki misboðið aumingjans bragðlaukunum svona hræðilega í langan tíma. Veit ekki hvort þeir komi til með að gleyma þessu í bráð. Fyrirgefning er ekki sjáanleg handan við hornið.

Grátandi bragðlaukur: "Eftir allt sem við höfum fyrir þig gert. Jæja ljúfan... þú baðst um þetta... manstu hvernig bláber bragðast Elín... ha... manstu það? Við mælumst til þess að þú munir það mjög vel... höfum ákveðið að taka það bragð úr umferð í smá tíma!".

Enda kláraði ég ekki alveg.

Fiskur og grænmeti í hádó, ávextir í eftirrétt. Eintóm gleði - rúmum klukkutíma eftir lopasopann. Ég er hvorki hressari, sprækari eða meira til í að hlaupa 42 kílómetra en í gær.

Held ég láti mér nægja skvettu af köldu vatni í trýnið og einn Ásbúðarhring þegar letipúkinn kíkir í heimsókn. Jafnvel góðan blund.

Táfýlubragðið situr enn aftast á tungunni og heilinn er í óða önn að forrita þessa skítafýlu inn á vonda listann!

Grautur... kaffigrautur

Jebb!

Ég er um það bil komin með þetta.

Um það bil?

Ég held barasta að ég sé komin með þetta. Kannski nokkrar trillur í viðbót og þessi verður ofur. Í morgun var gumsið of gott til að sleppa því að tala um.

Var þó pínkulítið sein fyrir og myndirnar sem ég tók eru hundfúlar og leiðinlegar. Gera snilldinni lítil skil en ég ætla að sigta þær "fínustu" út.

Jæja, ekki fleiri afsakanir ungfrú, komdu þér að efninu kvenmannsbelgur!!

HOKAY

Til að kaffigrauta til sigurs, ætla ég að kynna til leiks félagana SVS og NC!

*trommusláttur*

Sykurlaust Vanillu Sýróp!!!

Það er æði! Af hverju vissi ég ekki að það væri til sykurlaust sýróp?

Ég hef sumsé komist að því að til að kaffigrautur verði ætur að einhverju leiti, amk fyrir mig og mína sérvitru bragðlauka, þá þarf að vera smá sætubragð. Hvort sem sætan komi í formi mjólkurfroðu/hunangs/þurrkaðra ávaxta eða hvað. Í leit minni að hinum heilaga sætara kaffigrauts rakst ég á þessa sýrópsgleði í Krónunni og skúbbaði henni með til prufu. Viti menn - ég sá ljósið!

Í flundurhamingjukasti tók ég ósjálfrátt einn frosk með hoppi viðstöddum til mikillar skelfingar. Það var mjög dularfullt viðbragð. 

Ætla að fjárfesta í samskonar Heslihnetusýrópi. Heslihnetur og kaffi gott fólk? Það skal prófað!

NesCafé!!!

Ójá!

Af hverju datt mér þetta ekki í hug fyrr?

Í morgun innihélt hræringurinn því 20 gr. grófa hafra, 1/4 bolla vatn, 1/4 bolla nýmjólk (átti ekki möndlu- eða fjörmjólk), 1 msk chia, 1 tsk mulin hörfræ og 2 eggjahvítur. Inn í örra þangað til þykkt er að þínu skapi, með einstaka hrærustoppi. Út úr hitabylgjaranum og snúa sér að viðbótunum -> Salta, Nescafé-a eftir smekk, 2 tappafyllir sýróp, kanill og hræra.

Ef þið vijið áferðar ofurgleði-megagrauta, þá mæli ég með því að þið leggið grunninn að þessari grautarsamsetningu á minnið. Grunnurinn verandi áður en viðbætur eiga sér stað. Þið sjáið ekki eftir því! Vökvamagn að sjálfsögðu eftir þykktarsmekk - þessi er í þykkari kanntinum a la Ella.

Hafragrautsskraut

Mjólkurfroða, nokkrar tsk. af nýlöguðu kaffi (það er geeeggjað), möndlur og kakóduft.

Að sjálfsögðu borið fram í hvítum Buddha!

Svo... gott! Svo, svo gott elsku bestu.

Milt kaffibragð með smá kanilsparki á móti örlítið sætri vanillu. Mjólkin vinnur flott á móti kaffinu í þessum graut. Þyrfti þó að vera þykkari og meira æðisleg froða næst. Líka gaman að fá smá nýlagað kaffi í skeiðina, hræðilega notalegt. Knús og kram frá möndlum og grauturinn, uss. Ef einhverntíman hefur verið partý í áferðaheimi átvaglsins, og ég veit ég segi þetta oft, þá var það í þessari skál.

Kaffigrautur.

Fyrirbæri sem komið er til að vera!

Ekki meira, það brennur

Ojbara hvað ég gerði lúmskt erfiða æfingu í morgun. Á blaði var hún svo saklaus. Þarf að tækla monsterið betur á næstu vikum. Ná settinu el-perfecto, í einni bendu, lítil pása...

...engin fettmúlamiskunn hér takk!

Var með 20 kg. stöng á öxlum fyrir aftan höfuð. Þú hefur þá þyngd sem hentar þínu þoli/þreki. Það þarf ekki að vera með auka þyngd - taka þá aðeins fleiri endurtekingar. Kannski 20 stk.

Endurtaka eftirfarandi 3 æfingar 10 sinnum í röð. Ef þú getur 10 sinnum í röð, á sem bestum tíma. Muna eftir að halda forminu góðu, það er svo gígantískt mikilvægt.

1. Afturstig/hné upp, annar fótur í einu. Stíga aftur, lyfta svo sama fæti beint upp í 90° úr afturstiginu og beint úr 90° í afturstig á nýjan leik. Með hné eins nálægt jörð og þú getur - 15 endurtekningar á hvort fót.
2. Hnébeygja/jumping jack. Ferð vel niður. Þegar þú þrýstir upp, hoppa saman með fætur og beint niður í hnébeygjuna aftur - 10 endurtekningar. (Ég held að maðurinn í videoinu sé með rakettu í rassinum)
3. Armbeygjur/hopp. Byrjar í armbeygjustöðu. Tekur ein armbeygju, þrýstir þér, í hálfgerðu hoppi, upp í neðstu stellingu hnébeygjunnar. Eftir það hoppa jafnfætis aftur í armbeygjustöðuna. (Sjá þetta video, sek 48 - 52, sleppir svo hoppinu sem fylgir í kjölfarið.) - 5 endurtekningar.

Þar sem ég tók smá lappasession í morgun ákvað ég að nota þetta sem semi-blandaða-upphitun. Átti ekki mikið eftir í setti 4. Pff... Ég þarf að ná 10. Nota kannski aðeins léttari stöng næst.

Skrifa það bak við eyrað!

Hádegismaturinn var eðalfínn. Bolognese með meiru. Veiddi upp úr vinnufatinu hakkbolta, gaman að því. Eins og kjötbollur.

Þegar avocado er gott... ohooo. 

Jebb, held ég þurfi ekkert að klára þessa setningu.

*englahljóð*

Parmesan. Oh how I love thee!

Rétt upp hönd sá sem gæti lifað á osti... eða... skildu eftir... X í kommentakerfinu eða eitthvað.

Getur svosum rétt upp handlegginn fyrir framan tölvuskjáinn þinn - borið fyrir þig sérlega axlaæfingu ef einhver spyr hvað þú ert að gera!

Annars var smá keppni í Bootcamp í gær. Sá sem vann fékk frímiða á Expendables. Þurftum að halda fyrir ofan haus sandpokakvekendi og sú Kampfkerling og sá Kampfkarl sem héldu lengst út, unnu.

Ég vann! Hohoho..

Axlirnar eru hinsvegar ekki alveg jafn kátar með þá staðreynd og eigandinn. Á næstum erfitt með að klóra mér í trýninu. Hélt sandkvikindinu uppi í 3:50 minnir mig. Sem er nú hálf aumingjalegt, átti helling inni, frekar svekkt út í sjálfa mig en den tid, den sorg.

Svo er skírnin hjá litla Spaghettifrænda næsta sunnudag. Skondið. Ekkert nema spaghetti-stelpur í 40 ár og svo bamm... kemur ekki einn Lundi. Hohooo ég get ekki beðið. Undirrituð beðin um að vera skírnarvottur. Átvaglið rígmontið með stélið sperrt. Þá vitið þið það. Litla dýrið verður alið upp í frænkueldhúsi innan um allskonar eplakrums, grautarmall og át.

Inn á milli förum við svo í bíló, leikum Spiderman og tökum He-man með stæl.

Nema hann komi til með að leika með póný og barbie, sem er eðalfínt alveg - ég er hryllilega sjóuð í svoleiðis leikjum!

Grautarinnlit-útlit

Næst á dagskrá - kertaljós!

Þegar ég steig mínum sérlega fæti út í morgun tók á móti mér mjög svo svalandi loft. Þið kannist við þetta er það ekki?

Haustlykt. Loftkuldi.

Get svo svarið það. Fannst eins og það ætti að vera smá frost í jörðinni. Farin að hlakka mikið til dimmunnar og smá kuldabits.

Ég þarf að muna, mjög vel og vandlega, eftir þessum bloggpistli þegar ég er föst í skafli í febrúar að bölsótast eins og úldinn ullasokkur yfir hríðinni sem hamlar mér greiðum fótgangi í vinnuna! Sérstaklega þegar ein táin dettur af...

...sem væri svosum engin sorg. Þær eru svo ógeðslega ljótar!

En hvað sem ljótum frostbitnum tám skiptir, svona er nú átstaðurinn minn orðinn ber. Blautur eftir atvikum.

Garðhúsgögnin farin í bílskúrsfrí.

Mánudagsgleðigrautur - ekki borðaður utandyra.

20 gr. hafar, 2 eggjahvítur, smá vatn, salt og hörfræ inn í öbba. Skreytt með einni hvítu til, villimannslega stappaðri, bláum berjum, vanillu og möndlum.

Ægilega vel samsettur í litum þessi elska. Haustlegur með fjöldæmum.

Ég ætti kannski að vera með Grautarinnlit/-útlit!

Guð hvað þetta er smart. Sjá hvernig mandlan trjónir þarna á einu berinu - gerðir þú þetta sjálf?

Ahhh, Kampfakát í kvöld. Ekki farið síðan á mánudaginn síðasta.

Þetta verður hressandi.

Afrakstur helgarinnar og heilræði

Tók minn tíma í að losna við viðbjóðspestina. Ógeðis 24 tíma ódýr með meiru. Slokknaði jafn hratt á henni og kviknaði.

Sem betur fer hefur evil jesus yfirgefið systemið. Megi hann eiga sig og sitt hitamúkkandi sjálf eins lengi og kostur er á!

Takk fyrir pent.

Amen.

Þrátt fyrir miður skemmtilegan fimmtudag og "sofum þetta úr okkur" föstudag, náði ég samt að framkalla þetta.

Og þetta!!!!

Ég mæli ekki endilega með þessu!

En ég mæli með þessu!

Óguðogallirenglarnir. Meira að segja evil jesus.

Þetta er ein... góð... eplakaka!

*gleðihopp*

Og eitt "hollustu" baksturs heilræði, til þeirra sem ekki vita, varðandi smjer-/olíunotkun í bakstri.

Þið sem vitið - hendið til mín beini!

Í staðinn fyrir smjör/olíu er hægt að nota maukaða ávexti í baksturinn. Jafn mikið af maukuðum ávöxtum og uppskriftin kveður á um í öðrum fitugjafa. Ekki það að smjör og olía sé á vonda listanum mínum, ó svo langt í frá mín kæru.

Smjör fær mig til að brosa!

En prófið. Eplamauk, sveskjumauk.... Þurfið svosum ekki að útbúa það sjálf, geitð keypt það krukkað og fínt í hinum ýmsu verslunum. Eplamauk er fullkomið í t.d. súkkulaðilausan bakstur eins og súkkuaðilausar-muffins/brauð/botna á meðan t.d. sveskjumauk er betra í súkkulaðikökur og súkkulaðigums. Það er í raun bara sökum áferðar/bragðs. Sveskjumauk er aðeins "þyngra" ef svo má að orði komast.

Uppskrif væntanleg af eplakökunni. Kannski kökumallinu sem ég mæli ekki með líka... sé til með það.

Og já... þessi eplakaka er á "holla" listanum.

Létt og góð grænmetis og kjúklingasúpa

Ég elska súpur.

Ég elska líka mömmu mína. 

Mamman mín + súpur = Amen.. oh lord... haleluujah...

Það er eitthvað guðlegt við þetta dúó, það verður bara að segjast.

Hún gerir bestu súpur í heimi. Humar-/kjöt- og Osso búkkó þar efst á lista. Ógvöð.

Bara það að hugsa um þær fær munnvatnskirtlana í fúll svíng og hnén til að kikna. Ughhh!!!

Uppskrift og með því, vegna fjölda áskorana, beint frá ofursúpukvendinu komið.

Létt og góð grænmetis og kjúllasúpa a la madre - fyrir 700 Spartverja

1. Eitt stk. roðhænsn, skorinn í fjóra hluta. Hlutarnir kryddaðir og sett á þá smá olía. Síðan brúnaðir á pönnu. Lagðir til hiðar.
2. Ekki minna en 14 gulrætur. Þær skornar í grófa bita; best að helminga eftir lengdinni og svo settar til hliðar. Þær bíða steikingar með lauknum.
3. Laukur-aldrei minna en tveir venjulegir og aldrei minna en 4 hvítlauksrif. Þessir gaurar saxaðir og skornir, steiktir á pönnu með gulrótum þar til gljáandi.
4. Kartöflur-frekar minni en stærri-10stk.
5. 1/2 bolli brún grjón. 
6. Smjörbaunir-ein dós. Síðust út í súpuna.
7. Broccoli-einn sæmilegur haus skorinn í fleyga eftir endilöngu. Síðastur út í súpuna.
8. Sveppir-eitt box frekar minni en stærri.
9. Eitt gott búnt af vorlauk, en hann fer síðastur út í súpuna.

Aðferð:

Þegar búið er að steikja pútu, gulrætur og lauk, þá er stór pottur tekinn fram. Í hann fer einn og hálfur líter af vatni sem hefur verið sett í kjúklingakraftur (Oscar-tvær msk.) og 3 box af Knorr grænmetiskrafti. Síðan fer pútan út í og hún soðin dólgslega í 40 mín.

Átvaglsinnskot 

• Dólgslega soðið fiðurfé er mjög mikilvægt í þessari uppskrift - helst þannig að tryllingslegur stríðsdans fylgi í kjölfarið. 

Síðan fara kartöflur og grjón útí og 5 mín. seinna, laukurinn og gulræturnar. Soðið áfram í tuttugu mínútur. Þá fylgja baunir, broccoli, sveppir og vorlaukur. Ekki sjóða allt heila klabbið í meira en 65 til 70 mín. Frá byrjun til enda. (tékka hvort kartöflurnar séu í gegn). Þetta er allt kryddað eftir smekk og ekki gleyma Maldon saltinu!

Annað atriði, mjög mikilvægt: Muna að passa upp á bein þegar maður borðar kjúllasúpu. Ekki borða svo græðgislega að beinið standi þversum í kokinu.

Annað... átvaglsinnskot

• Fyrir utan þá mjög svo truflandi staðreynd að þú gætir í raun kafnað, þá er önnur, næstum meira, truflandi staðreynd að það gæti reynst hryllilega erfitt að borða meira af súpunni með kokið stútfullt af beinum! Já nei, við viljum ekki trufla einbeitinguna við átið á þann hátt!

Bon appetit!