Banana soft serve

Veðrið er ótrúlegt!!

Ég bara varð að prófa þetta aftur síðan í gær. Þegar ég vaknaði í morgun stökk ég beint upp úr rúminu og inn í frystinn að sækja bananana!

Þeir fóru ofan í matvinnsluvélina og eftir nokkra stund litu þeir svona út!

Svo svona.. aðeins byrjaði að maukast! Ég þurfti að stoppa nokkrum sinnum til að skafa hliðarnar á matvinnsluvélinni! Ég gleymdi nú að taka mynd af bananakúlunni sem myndast og matvinnsluvélin byrjar að hoppa út um allt!

Fimm mínútum seinna... LOKSINS! Lítur ekkert smá vel út! Athugið að þetta eru bara... bananar! Engu bætt við! En ef maður maukar þá svona lengi þá gerist eitthvað magnað... segið það satt. Væri kannski hægt að setja út í þetta vanilludropa en svei mér þá, það þarf ekki! Muna bara að bera fram strax! Ég sleikti líka blaðið á matvinnsluvélinni og var nokkuð sama um öryggi minnar eigin tungu!

Ávaxta og berjabomba í morgunmat! Mikið svakalega hefur maður það nú gott!

Með möndlusmjörinu góða og muldum hörfræjum! Möndlusmjörið var geggjað með þessu!

Þetta var alveg svakalegt! Og hugsið ykkur bara... ekkert prótein með þessari máltíð hjá undirritaðri! Ætti að fá verðlaun fyrir þetta!

Ég er farin á pallinn hennar mömmu! Sjáumst kannski í kvöld, töluvert viðbrenndari en núna!

Systra fiestaa

Laugardagur, nammidagur.... svo sannarlega!

Bauð brúna Spánardýrinu heim til mín í sjónvarpsgláp og mikið ét! Á boðstólnum var hinn sívinsæli Doritos kjúlli, sem hún er búin að þrá í hundrað ár, og eftirlíking af Doritos kjúllanum fyrir sjálfa mig.

Doritos kjúlla er, eins og flestir þekkja, púslað saman úr Doritos, ostasósu, salsasósu, kjúlla og osti.

Eftirlíkingin var góð. Rauðlaukur, sveppir, paprika og hvítlaukur steikt á pönnu þangað til meyrt, þá kryddað eftir smekk. Smá salsasósu bætt út á pönnuna og gumsinu helt í fat. Smá bbq sósa og hot sauce þar yfir, kjúllinn ofan á og smá salsasósa yfir. Næst er tómatsneiðum raðað ofan á kjúllan, nokkrum Camembertsneiðum ofan á tómatana og pínkulítið af gratínosti þar yfir. Æææðislega gott!

Með þessu var svo heimagert guacamole! Það er einfaldlega best!

Svabba að teygja sig í Doritos! Með þessu var salsasósa, auka Doritos, ostasósa og sýrður rjómi. Skar líka niður heilhveiti tortillur og ofnsteikti - mitt Doritos! Sumardrykkurinn ógurlegi hangir hress á kanntinum, sprite zero (eða kristall), appelsínusafi og frosin jarðaber! Mmmm...

Pínkulítið af þessu En ég var dugleg, fékk mér bara smá! Græna gumsið í fremri skálinni, wasabi hneturnar, er best! Hræðilega ávanabindandi!

Svo bjó ég til hálfgert banana soft serve. Banana ís! Frosnir bananar settir í matvinnsluvél og hrærðir saman í um það bil 5 mínútur. Fyrst mynda þeir hálfgerða kúlu, svo fer matvinnsluvélin á fullt og allt í einu gerist eitthvað stórkostlegt og þeir maukast saman.

Áferðin er fullkomin! Þetta er bilaðslega gott! Ég segi ykkur það - ég aulaðist til að bæta út í þetta próteini, sem var fínt líka en miklu betra þegar bananinn var bara! Ætla að fá mér svona í hádeginu á morgun, kem með flotta mynd þá!

Með berjum, nýbakaðri möndluköku, granola stöng og möndlusmjöri! Óguð!!

Jæja, ætla að halda áfram að horfa á fína skrokka í 300! Mjög greinilegt að þeir hafa aldrei upplifað nammikvöld eins og þetta!

Prótein pönnsa með banana, eplum, valhnetum og muldum hörfræjum

Aftur komin helgi og jú, aftur er það pönnsa. Ég var búin að gleyma því hvað mér þykja þessar pönnsur skemmtilegar. Kominn tími til að endurnýja kynnin! Ég var líka að kaupa mér eggjahvíturnar frá honum Garra - það verður því mikið um eggjakökur, pönnukökur og eggjahvítutengt át á næstunni!

Prótein pönnukaka með banana, heitum kanilstráðum eplum, valhnetum og hörfræjum

1,5 dl af eggjahvítum (4 - 6 stk)

1 msk hreint whey prótein

1 tappi vanilludropar

1 tsk, túmlega, kanill

1/2 banani, skorinn í sneiðar

Hræra allt saman nema bananasneiðarnar. Hita pönnu, spreyja pínkulítið af olíu á hana og leggja bananasneiðarnar á pönnuna.

Eftir það, hella eggjahvítunum yfir bananann.

Ég er letipúki og hitaði eplasneiðarnar í örbylgjuofni þangað til mjúkar. Raðaði þeim þá á pönnukökuna og stráði kanil yfir. Yfir eplasneiðarnar fór svo 1 msk af muldum hörfræjum, 2 muldar valhnetur, möndluflögur og smá múslí.

Ég bjó svo til "sósu" úr 1 msk hreinu próteini og vatni. Dreifði henni yfir herlegheitin.

Pakka pönnsunni saman. Bananarnir verða æði þegar þeir eru steiktir svona. Eins og karamella!

Mmmmhmmm...

Kanill og epli klikka aldrei! Eplapie í morgunmat!

Stelpukvöld í kvöld! Systir mín kær kemur til mín á eftir og við ætlum að nýta tímann vel! Góna á 'stelpumyndir', borða góðan mat og kjafta á okkur gat!

Stórgóður Makríll

Já, pabbi kom heim af sjónum í gær. Með honum fylgdi glænýr, nánast spriklandi Makríll sem var snæddur í kvöld af forvitnum og gráðugum fjölskyldumeðlimum!

Velt upp úr kryddi og hveiti og steiktur á pönnu. Virkilega, virkilega góður fiskur. Áferðin skemmtileg, bragðið æðislegt - minnti kannski á þorsk eða ál hvað áferð varðar. Mjöög gleðilegt smakk!

Með þessu var ferskt salat og Mango Chutney sem kom frábærlega vel út með fiskinum. Við ætlum að prófa að grilla hann næst. Nokkrir fiskar eftir! Enginn smá lúxus að eiga pabba sem kemur heim með allskonar gúmmulaði, flundurnýtt upp úr sjónum til prufu - lovit!

Eftirréttur kvöldsins, ef eftirrétt má kalla, var besta vatnsmelóna sem ég hef fengið í ár! Ég segi það satt. Rosalega safarík, sæt og crunchy! Nákvæmlega eins og vatnsmelónur eiga að vera. Í bakgrunn sést Wicked Paulsen gúmsla einni sneið græðgislega í sig! Á eftir þessari sneið fylgdi önnur!

Garðurinn hennar mömmu er í blómstra. Ég eeelska... garðinn hennar mömmu! Er svo fallegur ákkúrat núna. Það er svo notalegt að sitja út á palli, út á grasi nú eða í hengirúminu og njóta þess að vera til. Lyktin af öllum blómunum... ahh! Sumar!

Ohhh hvað þessi fiskur var ógeðslega góður!

Kanil og döðlu kjúklingur með ólívum og möndlu Dukkah

Jesús minn þetta veður! Hlakka mikið til í kvöld þegar ég fer út að skokka. Tók 5km miðnæturskokk í gær og þvílík hamingja sem það var! Mæli með því!

Þið sem lesið þetta hjá mér vitið vel að kanill er uppáhalds kryddið mitt! Mikið er hann ógeðslega góður. Ekki vera hrædd, hann passar fullkomlega með kjúkling! Palli bjó til meiriháttar kjúklingarétt um daginn og ég bara varð að deila þessari uppskrift með ykkur!

Kanil og döðlu kjúklingur með ólívum og möndlu Dukkah - fyrir 2

2 kjúklingabringur

7 - 10 ferskar döðlur, steinlausar

Kanill eftir smekk

Salt og pipar

Dukkah með möndlum, er í brúnni dós.

Hálfur rauðlaukur

Ólívur

Saxa döðlurnar smátt eða mauka. Skera laukinn og ólívurnar smátt og svissa á heitri pönnu. Bæta kanil við. Skera kjúllann í litla bita og setja hann út í lauk-kanil mixið. Salta og pipra eftir smekk. Þegar kjúllinn er steiktur í gegn er döðlumaukinu og dukkah kryddinu hellt yfir kjúllann og leyft að malla áfram á lágum hita í 2 - 3 mínútur.

Bara gott mín kæru. Bara gott!

Quinoa klattar og pönnusteikt grænmeti með dukkah

Gott meðlæti getur gert kraftaverk og góð krydd færa suman mat upp um mörg stig hvað bragð varðar. Meðlæti kvöldsins var svolítið gleðilegt. Ég bjó til quinoa kökur, eða klatta, sem komu skemmtilega á óvart. Pönnusteikta grænmetið, jah, er nú bara pönnusteikt grænmeti, en elsku besta Dukkah kryddið mitt breytti því úr Clark Kent í Súperman!

Pönnusteiktar quinoa kökur

Fyrst er 1/2 bolli af quinoa soðinn í 1 bolla af grænmetissoði. Ég bætti bara græmetiskrafti út í vatnið. Eftir að quinoa kornin höfðu drukkið í sig allan vökva, hellti ég þeim í skál og bætti einni fjörostsneið við. Ostinum leyfði ég að bráðna alveg og bætti þá við niðurskorinni papriku, pressuðum hvítlauk, þurrkaðri basiliku og 1/2 dl af eggjahvítum. Eftir að ég hafði blandað öllu saman skóf ég hverja köku upp með skeið og kom fyrir á heitri pönnu. Steikti vel á báðum hliðum eða þangað til falleg gullin skorpa hafði myndast utan á kökurnar.

Næst þegar ég geri þetta ætla ég að leyfa quinoanu að þorna betur, bæta við 1 dl af eggjahvítum og steikja kökurnar lengur á hvorri hlið. Ég þurfti að steikja þær nokkuð lengi svo þær héldust saman og brotnuðu ekki í milljón bita við snúninginn, en maður minn... góðar voru þær! Stökk skorpa, mjúkt innvols, æðislegt bragð.

Kökurnar væru virkilega skemmtilegar með t.d. kjúkling eða fisk. Örugglega æði að setja tómatsneið ofan á hverja köku, ost þar ofan á og stinga þeim svo inn í ofn, grill. Verður gaman að prófa sig áfram í þessu.

Grænmetisbland kvöldsins samanstóð af sveppum, rauðlauk, spínati og sykurbaunum. Steikt á pönnu, saltað smá og piprað og leyft að steikjast þangað til meyrt. Loks bætti ég Dukkahnu við og lét malla í 1 - 2 mínútur. Stráði svo nokkrum furuhnetum yfir grænmetið fyrir bragð og áferð. Algerlega geggjað!

Bragðgott meðlæti. Virkilega skemmtilegt að borða og bragðið - ójá, við skulum ekkert ræða það neitt frekar! Bara flott!

Prótein pönnukaka með banana og möndlusmjöri

Þar sem mín hreyfing felst aðallega í því að lyfta þá borða ég svolítið mikið af próteinríkum mat til að viðhalda vöðvavef og reyna að stækka hann. Ég vil taka það fram að það er ekki nauðsynlegt að borða próteinkyns, hvað þá 20 gr. + af próteini, með hverri einustu máltíð 'nema' þú sért í sömu pælingum, nú, eða þér þyki próteinríkur matur afskaplega bragðgóður. Það er að sjálfsögðu ágætt að fá sér nart úr hverjum fæðuflokki í öllum máltíðum dagsins en almáttugur, það er ekkert til að missa svefn yfir. Sérstaklega ef þú ert að spá í því að umturna matarræðinu.

Fyrir mér, persónulega, snýst þetta frekar um að borða hollan og góðan mat. Lítið unninn með eins fáum viðbættum aukaefnum og kostur er á. Eggjahvítur, hnetur, baunir, fræ, fiskur, kjúklingur, korn... og svo margt fleira eru góðir kostir þegar kemur að prótein hugleiðingum og bara það, að fá sér ferskt salat með t.d. hummus eða guacamole, baunum, quinoa og einhverri góðri dressingu er frábært í hádegismatinn. Það þarf ekki alltaf að vera kjúklingur, kjöt eða duft til að uppfylla einhvern próteinskammt!

Hinsvegar, þá er það mjög auðvelt fyrir mig að nota próteinduft því jú, það hentar, það er fljótlegt og mér þykir það ekki alslæmt. Þar af leiðandi bjó ég mér til prótein kanil pönnsu í gær sem ég tók svo með mér í vinnuna í dag. 'Prótein pönnukaka' því jú, eggjahvíturnar innihalda prótein ásamt duftinu.

Prótein pönnukaka með bananasneiðum og heimagerðu möndlusmjöri

1,5 dl eggjahvítur (um það bil 4 - 6), tappi vanilludropar, 1 msk próteinduft og slatti kanill hrært saman og gúmslað á pönnu þangað til reddí. Ég nota ekki meira prótein en þetta því ef ég set of mikið verður pönnsan eins og skósóli og ef ég nota ekkert þá er þetta barasta eggjakaka ... gullinn millivegur! Þeir sem ekki nota prótein gætu t.d. sett mulda hafra í staðinn eða búið sér til crepe!

Ég raðaði bananasneiðum á pönnukökuna, pínku múslí fyrir crunch og nokkrum rúslum og toppaði með 1 msk. heimagerðu möndlusmjöri!

Möndlusmjörið er geggjað! 300 gr. möndlur, 1 msk kanill og 1 msk hunangi blandað saman, ristað í ofni og hakkað í spað! Ótrúlega bragðgóður skammtur! Geri þetta pottþétt aftur. 

Pönnukökunni rúllaði ég svo upp. Miklu skemmtilegra að borða hana þannig!

Þegar pönnsunni er rúllað upp, með öllu namminu inní, þá kremjast bananasneiðar og múslí saman með hnetusmjörinu. Úghh það er svo syndsamlega gott að bíta í hnetusmjör og rúslur inn á milli!

Pönnukakan inniheldur um 130 hitaeiningar og 27 gr. af próteini. Með banana og hnetusmjöri skúbbast hitaeiningarnar upp í 320, um það bil, að viðbættum 20 gr. af kolvetnum úr banananum og hollri fitu úr möndlusmjörinu og eggjahvítunum. Geggjað! Ef þú vilt, þá er hægt að setja hafragraut inn í pönnsuna líka, svo banana og eitthvað meira gúmmulaði! Það er mjöög gott!

Þegar þetta er borðað er eins og maður sé að svindla! En hey, aldeilis ekki! Pönnukakan er bara samsett úr eggjahvítum og próteini! Svona veisla væri líka fullkomin sem viðbit í eftirmidaginn. Hita t.d. epli í örbylgju, strá yfir með kanil og raða á pönnsuna eða nota ber, ávexti, kotasælu.... mmmm!

Grænmetis sjúklingur

Ég er búin að vera sjúk í ofnbakað grænmeti alla vikuna og það virðist ekkert lát vera þar á. Ofnbakaðar sætar kartöflur, gulrætur, blómkál, laukur (allskonar), paprika... ohh það er svo gott! Bjó mér til semi tortillu í kvöld fyllta af ofnbökuðu ofurgrænmeti og afgangs kjúkling. Hitti svona líka beint í mark!

Tortilluna hrærði ég saman úr 1 dl eggjahvítum, 1 msk próteini, hot sauce, oregano, salti og pipar. Steikt á pönnu þar til eggin eru steikt í gegn. Tók þá grænmetið, kryddaði með chilli, papriku, engifer, dukkah og smá curry paste - nánast copy paste (Curry paste - copy paste.. hahh!) af síðustu máltíð, þið sjáið kannski mynstrið?

Rúllaði eggjahvítu tortillunni upp, utan um gumsið...

...afrakstur "erfiðisins" myndaður í bak og fyrir!

Ojjjj hvað þetta var gott! Endalaust kátur maginn ákkúrat núna! Holl, GÓÐ og fljótleg máltíð, full af hamingjusömum og gleðilegum kolvetnum, próteinum, fitum og guð má vita hverju öðru! Ég sit líka hérna með bumbuna út í loftið svoleiðis pakksödd!

Vona svo sannarlega að þið hafið notið kvöldmatarins jafn vel og ég! Mmhhhmm...

Sykurlausar smákökur

Ég skundaði niður í Smáralind í hádegismatnum og rambaði á Super Megastore eða hvað þessi búð heitir nú aftur. Búð sem hefur að geyma nánast allt sem maður þarf ekki á að halda en verður að eiga! Plastílát, eitthvað sem ég virðist aldrei eiga nóg af, matvöru, eldhúsáhöld, dót... og allt á 200 krónur eitthvað slíkt.

Ég stakk nefinu að sjálfsögðu inn í búðina, rölti þar einn hring og rak augun í matvöruhilluna! Þar sá ég nokkra poka sem á stóð, stórum rauðum stöfum, "Sugar-Free". Ég að sjálfsögðu staldraði við, las betur og komst snarlega að því að pokarnir innihéldu smákökur.

Súkkulaðibita, hafra, hnetu. Allskonar. Eins og sannri efasemdadollu sæmir reif ég einn pakkann úr hillunni og byrjaði að leita að næringargildi gumsins. Jújú, enginn sykur 'skráður' en honum er skúbbað út fyrir efnið Maltitol. Maltitol er í stórum dráttum sykur-staðgengill, sætari en eiginlegur strásykur, inniheldur færri hitaeiningar og fer hægar út í blóðið - er þar af leiðandi hentugri fyrir sykursjúka.

Nú er ég enginn næringarfræðingur og get lítið tjáð mig um 'hollustu'gildi svona köku. Ég, persónulega, myndi ekki gúlla þessu í mig bara af því þær eru stimplaðar sykurlausar. Hver skammtur eru um það bil 4 - 6 kökur, fer eftir gerðinni og 100 hitaeiningar. Í hverjum skammti eru 5gr af fitu, 15gr kolvetni, 2gr prótein og svo 6gr af þessu Maltitol sætuefni.

Ég hef svosum séð það verra, ég segi það ekki. Þetta er líklega ágætis "Ég þarf svo mikið kex" bani eða til að bíta í eftir máltíð. Það er líka notuð Canola olía í kökurnar sem er góða gerðin af olíu. En ég er efasemdin uppmáluð, ef ég fæ mér smákökur eða kex þá er það yfirleitt eitthvað sem ég hef bakað sjálf og það virkar bara flott! Allt sem merkt er sykur- og fitulaust fær alltaf hornauga frá mér!

En jú, þær eru sykurlausar og án efa aðeins betri kostur en smákökur sem eru stútfullar af sykri - ef maður passar sig að éta ekki allan pokann í einu að sjálfsögðu!

Innkaupadagurinn og bollarnir

Við náðum að klára um það bil allt bitastætt í gúmmulaðihellinum í gær. Síðustu bitar af grænmeti fóru í hallærismáltíðina, nammiskápurinn er svo til tómur og þegar ísskápurinn er opnaður heyrist drungalegt vindhljóð! Ég kem því til með að bæta úr því í dag, sem er endalaust almennilegt. Alltaf svo gaman að klára birgðirnar til að geta farið og verslað nýtt gleðiefni! Kætir mitt matgráðuga hjarta óstjórnlega!

Ágætis brennsla átti sér stað í morgun. Gamla góða 40 mínútna brennsluæfingin tekin með trompi á rassatækinu sívinsæla. Það verður nú samt að segjast eins og er, HIIT brennsla er töluvert áhrifaríkari og skemmtilegri brennsluaðferð. En eins og með svo margt annað, þá er ágætt að breyta til inn á milli.

Morgunmat var púslað saman upp í vinnu í tveimur mismunandi bollum. Annar bollinn, sumarlegi jólabollinn, samanstóð af vatni og Detox te...

...á meðan hinn bollinn, nokkuð vinsælli, samanstóð af örbylgjuhituðu hreinu próteini, kanil, smá graut og banana. Þá dýrð toppaði ég með nokkrum rúsínum, sólblóma- og graskersfræjum, 5 korna blandi og möndlum. Gæti trúað því að fræblandan hafi verið msk.

Bollinn útataður í kanil og bitinn upp úr útataða kanilbollanum fullkominn! Heitt, sætt, crunchy... mMmM!

Og já... það er mjög skemmtilegt að borða eðalgraut upp úr bolla!