Djúsí gulrótarkaka

Sökum veikinda og uppdópunar hendi ég inn föstudagskökunni. Útbjó þessa fyrir 2 vikum.

Fyrsta skipti sem ég útbý gulrótarköku held ég. En hún er svakalega... svakalega góð og ég er ekki mikið fyrir gulrótarkökur sjálf. Reyndar er þessi útbúin með olíu, þyrfti að finna eina góða með smjeri. Það er hinn alheilagi kaleikur baksturs. Smjör, smjör og meira smjör. Ekkert sem slær því við!

Gulrótarkaka, mjúk og bragðgóð

2,5 bollar hveiti

1 1/4 tsk lyftiduft

1 tsk matarsódi

1,5 tsk kanill (já, ég nota mikið)

1/2 tsk múskat (nutmeg)

1/8 tsk negull

1/2 tsk salt

3 bollar rifnar gulrætur

1,5 bollar sykur

1/2 bolli púðursykur

4 stór egg

1,5 bolli olía

Vanilludropar, eftir smekk

Sítrónubörkur, eftir smekk

Aðferð:

Hræra saman í stórri skál hveiti - salt. Setja til hliðar. Í matvinnsluvél, saxa niður gulrætur með því rifjárni sem fylgir vélinni. Ég notaði minnsta rifjárnið svo gulræturnar yrðu næstum að hálfgerðu mauki, þykir betra að bíta ekki í gulrótarbita í kökunni minni. Felurætur! Rífa niður um það bil 3 bolla af rótum, kannski 5 - 7 gulrætur. Fjarlægja gulrótahrat úr matvinnsluvélar-skálinni og setja til hliðar. Í matvinnsluvélinni hræra saman eggjum og sykri þangað til létt og ljóst. Kannski 20 sek. Hella olíunni þá hægt og rólega út í og láta vélina ganga á meðan. Hella síðan blautu saman við þurrt, ásamt rótum, þangað til allar hveitirákir eru horfnar og bæta þá út í deigið vanilludropum og sítrónuberki.

Hella í bökunarform og baka í 175 gráðu heitum ofni í 30 - 40 mín, eða þangað til prjónn, sem stungið er í kökuna miðja, kemur til baka hreinn og fínn.

Leyfa köku að kólna vel áður en kreminu er smurt á!

Þetta veit ég... svona er ég nú klár.

Þetta ætti ég amk. að vita. En átvögl eru og verð átvögl. 

Smjör-rjómaostakremssmurningur á heita múshí köku eru mistök sem ég endurtek ekki aftur í bráð. Litla þunna kremröndin sem sést þarna í kökunni miðri átti einmitt að vera millilagið en nei, nei Elín Helga... smurningin þurfti að eiga sér stað strax.

Dýrið var því penslað með kreminu ógurlega og kakan bókstaflega lak í sundur. Það sem þið sjáið hér er eitthvað sem ég náði að púsla saman með allskonar prjónum og öðrum tiltækum eldhúsáhöldum. Ágætis redding svosum, kakan ekki síðri á bragðið og meira krem fyrir mig að "bjarga".

Krem (hræra saman)

450 gr rjómaostur

140 gr. smjör

1 - 2 msk sýrður rjómi

1 tsk vanilludropar

2,5 bollar flórsykur (eða eftir smekk)

Ég bætti svo út í þetta handfylli af ristuðum kókos

 

Hún er æðisleg á bragðið. Virkilega. Kannski svolítið sæt, mætti jafnvel sleppa vanilludropunum (ég er samt svoddan vanillukerling, get aldrei af þeim séð). Hún er mjög djúsí og mjúk og deigó og gaman að bíta í og kremið - kremið er æði! Sítrónubörkurinn kemur líka með skemmtilegt spark í hvern bita.

Þeir sem vilja gætu svo t.d. bætt út í degið rúslum og/eða hnetum.

Athugasemdir

[Vala Árnadóttir (IP-tala skráð) 13.8.2010 kl. 14:16]

Guð minn góður, ég dræpi fyrir gulrótarköku núna !! Þær eru minn veikleiki og ég reyni að forðast staði þar sem þær eru í boði, en svei mér þá held ég skelli í eina á morgun

[Elín Helga Egilsdóttir, 14.8.2010 kl. 12:06]

Þær eru nefnilega lymskulega gúrmey ofurgóðar... og þetta krem! Gwaaaad!

Mikið eru vel heppnaðar kökur gleðilegar fyrir átvögl og önnur vögl!

[Hungradur (IP-tala skráð) 15.8.2010 kl. 07:26]

Girnileg kaka!  Ég vildi óska thess ad thú notadir dl í stad bolla í thínum uppskriftum.

[Elín Helga Egilsdóttir, 15.8.2010 kl. 10:13]

Til þess er google frændi.

1 us bolli = 2,3 dl

Svo er bakstur líka svo mikil um það bil vísindi - það er það sem ég elska svo geypilega

[Hungradur (IP-tala skráð) 15.8.2010 kl. 22:11]

Thakka fyrir upplýsingarnar fraenka.  En ég held ad thú hafir algerlega rangt fyrir thér vardiandi thad ad bakstur sé um thad bil vísindi.  Nei nei nei...thess vegna notar fólk nákvaemar vigtir vid bakstur.

http://www.dummies.com/how-to/content/measuring-ingredients-for-baking.html

"You probably know someone who bakes a lot, and it seems like she just tosses this in and that in and presto, out come cookies or a pie or something delicious. It seems like magic, so you may wonder how important it is to be accurate in measuring. The answer is: very important. Proper measuring is critical to baking. Baking is a science, and when you mix together ingredients, you're creating chemistry, albeit edible chemistry, so being precise is important. There is balance between flour, leaveners, fats, and liquids."

Read more: http://www.dummies.com/how-to/content/measuring-ingredients-for-baking.html#ixzz0wiIT4cen

http://www.essortment.com/food/understandingfl_swgp.htm

"Measuring is very, very important in baking."

Ég baka naestum aldrei kökur en á thad til ad baka braud.  Ég hef gerst sekur um ad slengja saman tví í stóra skál sem ég tel ad braud eigi ad innihalda eftir auganu.  Útkoman hefur verid thokkaleg en misjöfn.

[Elín Helga Egilsdóttir, 15.8.2010 kl. 22:46]

Öss.. ég svoleiðis slengi hinu og þessu saman. Skúbba sjaldan hveitið af málunum, nota vanilludropa í tappafyllum og tek út matskeiðar með hverfandi arnar-sjón.

En jú, það er rétt. Ég nota málin mín, en hvort þau eru nákvæmlega árréttilega fyllt, mæld og skafin get ég ekki sagt til um