Sweet'n'spicy hnetu- og fræmix

Er nammidagur í dag? Það held ég nú! Ég bara varð að setja þetta hingað inn, svo gott er það. Krydd, hunang, hnetur, fræ - ristað í ofni. Hið fullkomna nart-snakk! Geri þetta stundum hérna heima þegar ég vil narta nú eða til að bjóða gestum. Elska hnetur og fræ.

Sweet'n'spicy hnetumix

1 tsk olía

1,5 tsk púðursykur

1,5 tsk hunang

1 tsk kanill

1/8 tsk - salt, cardamommur, engifer, paprikukrydd, negull

Smá svartur pipar

1/2 bolli möndluflögur, eina sem ég átti.

1/4 bolli pistasíur

1/4 bolli 5 korna blanda og sólbómafræ

 

Hræra fyrstu 6 atriði saman og inn í örbylgju í 30 sek. Hella hnetu- og fræmixinu saman við kryddblönduna og hræra þangað til allt gums er vel þakið. Inn í 175 gráður heitan ofn, 10 - 12 mínútur. Hræra í krumsinu eftir 5 mínútur og passa að það brenni ekki. Taka út úr ofni þegar möndlurnar eru rétt brúnaðar, og leyfa að kólna! Njóta....

Þetta er líka æðislegt yfir salat, með AB-mjólk, ofan á graut, með ís! Gæti hámað þetta í mig endalaust! Skemmtilegt hvernig þessi krydd vinna saman, sterkt, sætt, salt... sæælgæti!

Bráðum tími á berjamó

Fullkomin skál af wonderfulness! Ferskur og góður morgunmatur eftir fína HIIT brennslu. Ég var næstum því búin að fá mér hafragraut sökum loftkulda en gat ekki séð af bláberjunum inn í ísskáp í annað en kalt skyr!

Get ekki beðið eftir berjamó í haust!

Próteinblandað hrært kea skyr, bláber, ferskja, múslí, möndlur og möndlusmjör í skeiðina!

Bragðgott OG gordjus á litinn!

Pizzakvöld

Komst að því um daginn, mér til mikillar furðu, að ég hef ekki sett inn á þetta blogg mitt heimatilbúna pizzu! Af hverju, veit ég ekki - en tók mig til og útbjó æðislegt gums í tilefni föstudagsins!

Kjúklingapizza á heilhveitibotni

Bjó til pizzasósu úr því sem ég átti. Nennti ekki út í búð. Var komin í gúmfey heimafötin mín. Sauð saman 1 dós af niðursoðnum tómötum, tómatpúrru, balsamic edik, pínku hunang, dropa af tómatsósu, oregano, basiliku, tveimur hvítlauksrifjum og niðurskornum sveppum. Ofboðslega bragðgóð og skemmtileg. Ætla að prófa að bæta kanil í sósuna næst. Ójá.

Pizzabotninn fékk ég lánaðan frá Café Sigrún. Hann klikkar aldrei 100% heilhveiti, hollusta og gleði. Ég reyndar henti honum saman, áleggið ofan á og beint inn í 180 gráðu heitan ofn í 15 mín, svo grill í 10. Kom ekki að sök. Hann var æði. Notaði reyndar heilhveiti, alveg frábært. Ég og þunnir pizzabotnar erum vinir! Ofan á herlegheitin fóru steiktar kjúklingalundir, steiktir sveppir og laukur...

...paprika, tómatur og sæt kartafla frá því í gær. Á minn helming fór sveppa léttostur og smá mozzarella. Á helminginn hans mister Paulsen fór camembert og mozzarella! Þið megið geta hvor helmingurinn tilheyrir undirritaðri!

Ekkert ævintýralegt í gangi eins og döðlubitar, kanill, jalapeno, pestó, avocado... bara venjuleg "þetta á ég til í ísskápnum" pizza. Sé mest eftir því að hafa ekki grillað dýrið en góð var hún.. mmmm!

Á morgun ætla ég hinsvegar að leika mér svolítið, bjó til nægilega mikið deig í aðra pizzu með...?

Beikonbitum, döðlum, fetaosti og furuhnetum?

Döðlum, banana og hráskinku?

Heimagerðu pestó sem sósu, hnetum og osti?

Svissuðum lauk og sveppum í balsamikgljáa og eitt egg ofan á?

... og svo framvegis!

Uhh.. valkvíði! Sjáum hvað gerist á morgun! Kannski dreymi ég eitthvað sniðugt í nótt sem gefur mér hugmynd um pizzategund morgundagsins!

Grillum á okkur gat

Mamma og pabbi ákváðu, í snatri, að keyra hringinn í kringum eyjuna okkar og skildu ungviðið, með nýfengið bílpróf, eitt eftir í uppeldisstöðvunum! Systir mín kær var því í mat hjá okkur í kvöld og í tilefni þess voru kjúklingalundir á matseðlinum. Tókum þetta skrefinu lengra og bjuggum okkur til grillpinna og náðum næstum því að grilla alla máltíðina! Byggsalatið slapp við grillið - ég var samt alveg á því að pakka því inn í álpappír og skella í grillun!

Kjúklinga grillspjót

Allt grænmeti sem þú hefur lyst á. Rauðlaukur... ohh, grillaður rauðlaukur. NOM!! Paprika, sveppir og tómatar urðu fyrir valinu. Tómatarnir brunnu af aumingjans prikunum og hurfu ofan í grillið mér til mikillar óhamingju, nota því svoleiðis ekki aftur. Kjúklingurinn penslaður með blöndu af BBQ sósu, honey dijon sinnepi, hot sauce og salsasósu.

Byggsalat með sólþurrkuðum- og ferskum tómötum, ólívum, fetaosti möndlum

Ætlaði að sejta út á byggið pestó en haldið þið að gúmmulaðihellirinn hafi ekki verið pestólaus! Ótrúlegt! Saxaði því niður nokkra sólþurrkaða tómata, ólívur, ferska tómata og steinselju. Notaði smá af olíunni af sólþurrkuðu- og ólívunum. Setti líka út í salatið fetaost og niðursneiddar möndlur! Svakalega gott. Byggið er að sjálfsögðu eitt af mínum uppáhalds kornum. Æðislegt að borða það! Áferðin er fullkomin! Næst þegar ég geri svona meðlæti hef ég niðurskorinn rauðlauk með - matargestur kvöldsins er ekki rauðlauksæta!

Grillaðar sætar kartöflur með paprikukryddi og oregano

Ekki mikill galdur hér á ferð. Skera niður kartöflurnar, ég notaði eina stóra. Setja smá olíu og salt, paprikukrydd eftir smekk ásamt oregano. Pakka inn í álpappír, setja á grillið og grilla þangað til mjúkar. Fylgjast vel með bögglinum svo kartöflubitarnir, sem liggja á botninum, brenni nú ekki.

Grillaður laukur - sælgæti

Í lokin, komman yfir JÍHA-ið. Grillaðir laukar af öllum stærðum og gerðum. Rauðlaukur, venjulegur laukur og hvítlaukur. Pakkað inn í álpappír og grillað í mauk. Þeir verða svo sætir og djúsí.. mmmhmm!

Æðisleg máltíð í alla staði. Grill-eitthvað er alltaf gott, alltaf sumarlegt, alltaf gleðilegt.

Heilhveiti graskers kanilsnúðar með döðlumauki

Kerlingin er með snúðamaníu! 

Nýta restina af graskersmaukinu og þar sem ég er nýbúin að útbúa kanilsnúða, af hverju ekki aftur? Ef svo má að orði komast! Þetta eru meira brauðsnúðar með kanilbragði en hverjum er ekki sama ef útkoman bragðast vel!

Heilhveiti graskers kanilsnúðar: 12 - 14 stk

Hita ofn í 180 gráður.

Deig:

2 og 1/4 tsk ger

1/4 bolli volgt vatn

3/4 bolli graskersmauk

1/4 bolli undanrenna

1/4 bolli létt AB-mjólk

1 msk hunang

2 og 1/2 bolli heilhveiti

2 msk mulin hörfræ (má sleppa)

1 og 1/4 tsk salt

1,5 tsk kanill, 1/4 tsk múskat og negull/engifer.

1/2 tsk vanilludropar

3/4 bolli hveilhveiti

1 msk olía

Fylling, grunnur:

12 ferskar kramdar döðlur

1 tsk kanill - eftir smekk

2 msk hunang

3 msk létt AB-mjólk

Leysa gerið upp í volgu vatni - 5 mínútur um það bil. Á meðan blanda saman mjólk, létt AB-mjólk, graskeri og hunangi. Hella þá gervatninu út í graskersmaukið og blanda léttilega. Bæta þá við 2,5 bollum hveiti, 2 msk muldum hörfræjum, vanilludropum, salti, kanil, múskati og negul. Hræra létt saman, gott að hræra í vél ef möguleiki er á því, þangað til deigið er orðið mjúkt. Nota þá restina af hveitinu, msk í senn, og hnoða inn í deigið á hveitistráðum fleti. Hnoða deigið í 10 mínútur eða þangað til það verður teygjanlegt, aðeins klístrað viðkomu en festist ekki við puttana.

Hella þá msk af olíu í skál og setja deigkúluna í skálina.

Velta deigkúlunni upp úr olíunni, breiða svo klút yfir skálina og leyfa að standa í heitu rými í 45 mín, eða þangað til deigið hefur tvöfaldast að stærð. Sem átti sér ekki alveg stað hjá mér, en það stækkaði nokkuð.

Hnoða deigið niður og fletja það út í ferhyrning. Ég ætlaði að hafa deigið þykkt, en ég held það vanti þann litning í mig. Eins virðist ég ekki geta búið til brauð nema fylla það af hnetum, fræjum og korni....

Mjaka fyllingunni á deigið. Ég notaði sleif.

Leika sér. Setti smá af möndlum, granóla, sólblóma og graskersfræjum.

Rúlla upp og skera

Raða í eldfast mót þeim sem komast þar fyrir. Ég bakaði þá tvo sem eftir urðu sér. Leyfa dúllunum að hefast í 15 - 20 mínútur. Eldfasta mótið notaði ég til að sjá hvort einhver munur væri á mýkt á degiinu ef allir eru saman saman.

Henda inn í ofn í 20 mínútur eða þangað til fallega gylltir. Kæla svo í 10 - 15 mínútur.

Njóta! Ég fékk mér að sjálfsögðu einn strax... eða tvo. Kannski fjóra!

Skar svo eitt dýrið í tvennt til að sýna betur innvolsið. Sá á myndinni fyrir ofan lítur hálfparinn út eins og "Road kill" greyið! Græðgin alveg að drepa undirritaða!

Niðurstaða:

Virkilega góðir á bragðið - eins og nammi. Döðlumaukið gerir þá að sjálfsögðu mjöög djúsí og karamellukennda í miðjuna. Ef þið fílið "blautar" súkkulaðikökur þá fílið þið þessa. Munið bara að þetta er 100% heilhveiti svo þeir eru ekki fluffy eða "léttir" í sér. Hver snúður eru um það bil 5 kg... svona næstum. Kanillinn skilar sér vel. Svo eru þeir líka æðislegir á litinn út af graskerinu. Graskerið gerir deigið líka mýkra. Fullt af flóknum kolvetnum, trefjum, hollri fitu og próteinum. Enginn sykur, bara hunang og döðlur sem er mikið meira en nóg.

Hvað myndi ég gera öðruvísi næst?

Ef viljastyrkurinn leyfir... hafa deigið þykkara og baka snúðana sér! Ef þið viljið minna "djúsí" snúð, nota minna af fyllingu.

Verður eitthvað næsta skipti?

Jafnvel næstu skipti!

Góður matardagur

Stundum á maður 'góða' matardaga og stundum á maður 'slæma'. Það sem telst vera góður matardagur í minni bók er dagur þar sem allur maturinn 'gengur upp'. Þig langaði ótrúlega mikið í graut um morguninn, svo þú fékkst þér graut. Hefðir ekki getað beðið um neitt betra en fisk og kartöflur í hádeginu og viti menn, það er einmitt það sem boðið var upp á. Jæja, þið vitið hvert ég er að fara með þetta. Dagurinn í dag hefur verið skráður og skjalfestur sem góður matardagur!

Byrjaði daginn á graut með kanil, kanilpróteini (ójá, kanilprótein), muldum hörfræjum og hnetumixi. Kanil, prótein, graut og hörfræ hrærði ég saman og toppaði svo með hnetunum. Möndlur, pistasíur, valhnetur og kasjú. Hnetur eru eins og nammi í mínum heimi, ég eelska hnetur!

Morgunmats eftirmatur, uppáhalds uppáhald þessa stundina! Eðalfín ponsupera!

Hádegismaturinn - perfecto! Fiskur, grænmeti, gleði! Þessum disk fylgdi svo hálf appelsína, 2 þurrkaðar döðlur, 1 þurrkuð ferskja og pínkulítið af kotasælu.

Eftirmiðdagssnarl! Íííískalt, brakandi grænt epli...

 ...og kanilprótein með múslí! Já, ég er ógeð og bætti meiri kanil út í próteinið!

Kvöldmatur. Toppurinn yfir I-ið! Hreint, hrært Kea skyr, vanilluprótein og BLÁBER! Smá múslí og möndlur yfir. Búin að hugsa um þetta í allan dag! Allan dag!

Eftirréttar daðla, fersk, með macadamiu hnetu, 85% súkkulaðibita og eðal fína möndlusmjörinu mínu!

"Einmit það sem mig langaði í" deginum er hér með alveg að ljúka hvað mat varðar! Fullkominn í alla staði!

Heilhveiti 'kanilsnúðar'

Kanilsnúðar eru mikið uppáhalds hjá mér. Sérstaklega þessir mjúku, djúsí ofursnúðar. Ekki jafn hrifin af hörðu flötu snúðunum en allt er kanilsnúður í harðindum!

Vildi prófa að búa til heilhveitisnúða og sjá hvort eitthvað æðislegt myndi gerast!

Hráefni:

3/4 bolli volg undanrenna, ekki heit

2 og 1/4 tsk þurrger

3 bollar heilhveiti

1 tsk lyftiduft

2 msk hunang

1 - 2 tsk kanill

1/4 tsk salt

5 msk Létt-AB mjólk, olía eða eplamau. Ég notaði AB.

Fylling, grunnur:

2 msk hunang

2 msk sultan góða

1 msk Létt-AB mjólk

1 tsk kanill

Fylling, gúmmulaði (Það sem ég gerði):

Möndluflögur (allt deigið), múslí (1/4 af deigi), möndlusmjör (allt deigið), rúsínur (helmingurinn), mulin hörfræ (allt deigið).

Byrja á því að hita ofninn í 180 gráður. Hita svo mjólkina og strá gerinu þar yfir og láta bíða í um það bil 5 mínútur. Ágætt að bæta hunanginu við blönduna á þessum tímapunkti. Hræra vel saman 2 bolla af hveiti, lyftidufti, kanil og salti í stórri skál. Bæta þá Létt-AB mjólkinni við ásamt gerblandinu. Hræra vel saman. Bæta við 1/2 bolla af hveiti og hræra saman. Dusta rest af hveiti, 1/2 bolla, á t.d. eldhúsborð og hnoða deigið þangað til búið er að hnoða svo gott sem rest af hveiti inn í deigkúluna. Um það bil 20 - 30 skipti. Þá skal fletja deigið út í ferning, nokkuð þunnt. Þá er grunninum af fyllingunni hellt í miðjuna á deginu og með spaða er henni dreift um deigflötinn. Rest af fyllingu, ef vill, er þá bætt við. Hnetum, möndlum, fræjum...

Deiginu er rúllað upp skv. lögum og reglum, eins þétt og kostur er á...

...og skorið í 1 - 2 cm. þykka bita.

Raða á bökunarpappír og inn í ofn í 20 mínútur. Ég setti ekkert ofan á snúðana áður en ég setti þá inn í ofninn.

Niðurstaða:

Æðislegir á bragðið, virkilega, og áferðin er frábær. Fengu frábæra einkunn frá Svöbbu systur, pabba og mistar Paulsen. Svolítið þurrir, en viðráðanlega (aðallega ysta lagið), og geggjaðir með mjólk. Bestu snúðarnir voru rúsínusnúðarnir. Mæli ekki með múslí! Möndlurnar gera alltaf sitt gang og ef maður myndi nú bæta valhnetum og döðlubitum.. oh men!!

Hvað myndi ég gera öðruvísi næst?

Tvöfalda grunn fyllinguna, setja meiri AB-mjólk og/eða olíu í deigið/fyllinguna, pensla snúðana með eggjablandi áður en ég set þá inn í ofn og jafvel toppa með sultu. Hef degið kannsi þykkara næst og geri snúðana stærri.

Verður eitthvað næsta skipti?

Ójá.... þessa geri ég aftur!

 

Ef þið hafið aðrar hugmyndir um það hvernig best væri að búa til hina fullkomnu ofurheilsusnúða, í gvöðanna bænum ekki vera feimin að tjá ykkur

Balsamic kjúlli með timian, rauðlauk og möndlum

Æji já, þessi kjúlli var svaka fínn. Reyndar er kjúlli alltaf fínn en gúmmulaðið og sósan sem fylgdu honum slógu í gegn! Geri þetta án efa aftur, jafnvel með fisk. Það tekur um það bil 40 mínútur, frá byrjun til enda, að elda réttinn. Ég notaði heilan kjúkling, niðurskorinn. Væri líka hægt að nota t.d. 4 kjúklingabringur, skinn og beinlausar.

Hráefni f/4

4 bein- og skinnlausar kjúllabringur

1/4 bolli heilhveiti

3/4 tsk salt og pipar

2 msk olía

1 stóran rauðlauk, skorinn langsum og svo í mjóar lengjur.

Möndlur eftir smekk.

2 msk balsamic edik

1 bolli kjúklingasoð/kraftur (ég notaði tening)

1/2 tsk þurrkað timian eða 2 tsk ferskt.

Byrja á því að hella 1/4 bolla heilhveiti, 1/2 tsk salti og 1/2 tsk pipar á disk. Velta bitunum, eða bringunum, upp úr hveitiblöndunni og steikja í 2 msk olíu á heitri pönnu. Tæplega 10 mín á hvorri hlið, eða þangað til bringurnar eru steiktar í gegn. Taka þá bitana til hliðar og breiða álpappír yfir til að halda á hita.

Nú skal hella rauðlauknum og möndlunum á heita pönnuna og steikja í 1 - 2 mínútur. Subbumynd en gott bland! Næst þegar ég geri þetta ætla ég að bæta við sveppum.

Þá þarf að bæta út á pönnuna kjúklingakraftinum, timian, ediki ásamt restinni af saltinu og piparnum eða 1/4 úr teskeið. Leyfa að malla þangað til laukurinn er orðinn mjúkur og soðið orðið aðeins þykkara. Svolítið eftir smekk.

Ég tók bringurnar frá og bætti þeim út á pönnuna rétt áður en soðið varð reddí. Leyfði þeim aðeins að sjússa þar. Restina af kjúklingnum, læri og vængi, setti ég í eldfast mót og inn í ofn. Um það bil 10 mín áður en ég tók kjötið út úr ofninum hellti ég restinni af balsamic-lauk sósunni yfir. Flott með fersku grænmeti, grjónum og/eða brauði.

Mmmm.. verður gott að bíta í þetta í vinnunni á morgun! Óje!

Kósýness og leti heimafyrir

Veðrið er notalegt, góð helgi að baki og sunnudagurinn nýttur í almennt hangs og leti! Vöðvar rétt hreyfðir til að finna sér gott ét inn í eldhúsi og skipta um rás á sjónvarpinu. Ljúfa líf.

Hádegismaturinn var léttur og góður. Virkilega. Átti eina risastóra sæta kartöflu sem ég henti inn í 200 gráðu heitan ofn þangað til skinnið losnaði frá. Ætli hún hafi ekki fengið að malla í 1 eða 1,5 tíma. Verða súper sætar og djúsí þegar þær eru ofnbakaðar! Kartöfluna skar ég svo í tvennt og smurði með kotasælu-skyrblöndu.

Kotasæla, skyr, Dijon honey mustard, þurrkuð steinselja = hamingja! Toppað með papriku hummus.

Þetta létt- en ljúfmeti var svo klárað með einni af þessum yndislegu ponku litlu perum sem flæða í öllum verslunum. Rauðar og gular, æðislegar á bragðið! Þær sem ég hef bitið í, ég veit ekki hvernig skal lýsa því. Karamelukenndar! Mmmm...

'Pumpkin Pie' hafragrautur

Ár og aldir síðan ég fékk mér hafragraut! Hlakkaði líka mikið til að dýfa mér ofan í þessa skál eftir sprettina í morgun. Um að gera og nota graskersmaukið góða og skella í Pumpkin Pie í morgunmat. Amerískur þakkargjörðar-eftirréttur um mitt sumar á Íslandinu! Mikil gleði!

'Pumpkin Pie' hafragrautur

Sjóða saman:

30 gr. hafra, ég notaði grófa. Um það bil 1 dl.

1 skeið hreint prótein (má sleppa)

60 gr. grasker. Um það bil 1/4 úr bolla.

Kanill

Nutmeg (múskat?)

Mætti jafnvel setja einn negulnagla eða mulin negul. Ég gerði það reyndar ekki.

vanilludropar

1,5 dl vatn

Hafragrautsskraut:

Skyrsletta, 3 muldar valhnetur og kókos. Ef þið viljið vera extra góð við ykkur, þá setjið þið örlítið af púðursykri ofan á grautinn, sjóðandi heitan, og slettu af þeytirjóma í staðinn fyrir skyrið! Mmmmmm...

Þessi var geggjaður! Algerlega geggjaður! Held að graskersmauk verði mikill vinur minn í framtíðinni!