Æðislegt gróft speltbrauð

Enn og aftur er hún Erna, í vinnunni, að gera snilldarlega hluti í eldhúsinu. Í dag bakaði hún fyrir okkur gróft speltbrauð með hnetum, kókos, múslí, sólblómafræjum! Allskonar gúmmulaði og ómæ... þetta var gott brauð. Ég man ekki nákvæmlega hvar hún sagðist hafa nælt sér í þessa uppskrift, en sá sem hrærði saman í þessa snilld í fyrsta skipti á svo sannarlega hrós skilið. Ég bara varð að deila þessu með ykkur!

Gróft speltbrauð

3 bollar spelt eða heilhveiti

1 eða 1 og 1/2 bolli múslí (heimagert best)

1 bolli sólblómafræ

1 tsk sjávarsalt

3 tsk lyftiduft

3/4 bolli heitt vatn

1/2 líter AB mjólk. Um það bil.

Út í þetta má svo bæta því sem hver vill. Kókos, hnetum, þurrkuðum ávöxtum....

Hræra saman og baka við 200°C í klukkustund. Ef þið viljið að brauðið fái harða skorpu, hringinn í kring, þá er gott að taka það úr forminu eftir ca. 30 mínútur, inn í ofn aftur á hvolfi, og klára bökunartímann. Þannig er brauðið best að mínu mati. Ég er mikil skorpukerling og brauðenda-æta! Átvaglið sönglaði af mikilli gleði þegar ég beit fyrsta bitann.

Brauðið var sammála mér... mikil innlifun! Sjáið bara hvað það er glæsilega fínt!

Ákkúrat brauð eins og mér þykja best! Með hummus, súpum, eitt og sér... þétt, bragðgott, mettandi, sykurlaust og áferðin fullkomin! Hver biti inniheldur fræ eða hnetu og skorpan.. ohh.. mmhmm! Þetta verður bakað um helgina!

Athugasemdir

[Erna (IP-tala skráð) 2.9.2009 kl. 13:19]

Þetta er nú meira svindlið! Á meðan ég borða brennt falafel með dularfullri hvítri sósu og spagettíi er verið að dæla í þig þvílíku veislufæði. Á bara ekki til orð yfir þetta dekur! Þetta brauð er alveg rosalega girnilegt!!

 ;)

[Elín Helga Egilsdóttir, 2.9.2009 kl. 13:27]

Held að dekur sé rétta orðið! Þær eru mjög æðislegar, eldhúsofurhetjurnar í vinnunni, að hjálpa 'heilsufíklunum' að vera heilsufíklar! Gæti ekki verið flottara 

[Gurra (IP-tala skráð) 2.9.2009 kl. 16:33]

Frábært og girnilegt brauð. Ætla að prófa þetta í kvöld með minni úftærslu

[Dossa (IP-tala skráð) 2.9.2009 kl. 16:43]

Hahaha - mér fannst þetta vera ungi inni í brauðinu á myndinni með andlitinu

Mér finnst unginn í brauðinu bestur - ó sóle míó!!

[Elín Helga Egilsdóttir, 2.9.2009 kl. 16:52]

Um að gera Guðríður. Þetta brauð er meiriháttar gott!

Unginn er flottur. Eins og hann sé að skammast þarna á brauðsneiðinni!

[Inga (IP-tala skráð) 4.9.2009 kl. 14:02]

Ég prófaði að baka þetta brauð og það er alveg hreint dásamlegt! Með þessu borðaði familían ost og heimalagað pestó og karlmennirnir, sem eru hreint ekki fræ- og hnetuætur eins og húsmóðirin, hreinlega möluðu af ánægju. Kærar þakkir fyrir að deila uppskriftinni með lesendum :)

[Elín Helga Egilsdóttir, 4.9.2009 kl. 15:25]

Ohh en gaman að heyra þetta Inga og mín er svo sannarlega ánægjan!  Svona gullmolum má enginn missa af.

[Hrafnhildur Þórisdóttir (IP-tala skráð) 7.9.2009 kl. 14:19]

Kæra Elín mikið finst mér gaman að fylgjast með síðunni þinni það er svo mikið að góðum uppskriftum og svo segir´þú svo skemmtilega frá  mig langar svo til að baka brauðið sem þú vitnar í enn mig vantar að vita á hvaða hita á að baka brauðið. kærar þakkir fyrir að gera lífið snona skemmtilegt  allavega fyrir mig og ég efast ekki um að fleyrum finnist það. kveðja Hrafnhildur

[Elín Helga Egilsdóttir, 7.9.2009 kl. 15:15]

Sæl elsku Hrafnhildur mín og þakka þér kærlega fyrir þessi fallegu orð. Ég er alveg orðin meyr í hjartanu eftir að hafa lesið þetta

En brauðið skal bakast við 200°C í um það bil klukkustund. Vona svo sannarlega að þér líki vel, brauðið er æðislega bragðgott og skemmtilegt.